COVID-19
សង្គមអន្តរជាតិ
អន្តរជាតិ
UNICEF ថាក្រុមហ៊ុនផលិតឱសថ២៨ អាចផលិតវ៉ាក់សាំង COVID-19 ក្នុងចំនួនច្រើនមិនធ្លាប់មាន
វ៉ាក់សាំងCOVID-19ដែលកំពុងអភិវឌ្ឍ។រូបភាព៖AFP
×![]()
អង្គការ UNICEF នៅថ្ងៃទី៤ កញ្ញា បានអះអាងថា ក្រុមហ៊ុនផលិតឱសថចំនួន២៨ នៅប្រទេសចំនួន១០ មានសមត្ថភាពក្នុងការផលិតវ៉ាក់សាំងCOVID-19 ក្នុងចំនួនដ៏ច្រើនមិនធ្លាប់មាន ក្នុងរយៈពេល២ឆ្នាំ ដើម្បីទប់ស្កាត់នឹងការឆ្លងជំងឺរាតត្បាតCOVID-19។ UNICEF ក៏បានប្រកាសដែរថាខ្លួននឹងជួយ ក្នុងការទិញ និងចែកចាយវ៉ាក់សាំងនេះ។ 
UNICEF រួមជាមួយនឹងអង្គការសុខភាពពិភពលោក (WHO)បានរួមសហការគ្នាក្នុងគម្រោង COVAX ដែលមានបំណងទិញ និងផ្គត់ផ្គង់វ៉ាក់សាំងដោយសមធម៌។ មកទល់ពេលនេះ ប្រទេសដែលមានធនធានចំនួន៧៦ បានបេ្តជ្ញាចិត្តក្នុងគម្រោងនេះ។ នេះបើយោងតាមទីភ្នាក់ងារព័ត៌មាន Reuters ។
ក្នុងសេចក្ដីថ្លែងការណ៍របស់ខ្លួន អង្គការនេះបាននិយាយថា ក្រុមហ៊ុនផលិតវ៉ាក់សាំងទាំង២៨នោះ បានចែករំលែកកាលវិភាគផែនការផលិតកម្មវ៉ាក់សាំង COVID-19 ប្រចាំឆ្នាំរហូតដល់ឆ្នាំ២០២៣។ ការវាយតម្លៃផ្នែកទីផ្សារបស់ UNICEF បានបង្ហាញថា អ្នកផលិតវ៉ាក់សាំងទាំងឡាយ មានបំណងផលិតវ៉ាក់សាំងរួមគ្នាក្នុងចំនួនដ៏ច្រើនមិនធ្លាប់មានក្នុងចន្លោះពេល១ឆ្នាំ ទៅ២ឆ្នាំ។
ទោះជាយ៉ាងណាក្តី អ្នកផលិតវ៉ាក់សាំងបានបញ្ជាក់ថា គម្រោងនេះអាចធ្វើទៅបានអាស្រ័យនឹងកត្តាជាច្រើនដូចជាភាពជោគជ័យនៃការធ្វើតេស្ត ការព្រមព្រៀងទិញទុកជាមុន ការផ្តល់មូលនិធិ ការកាត់បន្ថយនីតិវិធី ការបើកផ្លូវលើបញ្ញត្តិច្បាប់ និងការចុះឈ្មោះវ៉ាក់សាំងជាដើម។
មកទល់ពេល វ៉ាក់សាំងជាច្រើនប្រភេទ កំពុងត្រូវបានអភិវឌ្ឍ ប៉ុន្តែមានវ៉ាក់សាំងមិនច្រើនឡើយដែលអាចឈានដល់ដំណាក់កាលទីបីដែលជាការធ្វើតេស្តទ្រង់ទ្រាយធំ។ វ៉ាក់សាំងដែលមានសុវត្ថិភាព និងប្រសិទ្ធភាព ដើរតួសំខាន់ក្នុងការរាំងខ្ទប់ជំងឺ COVID-19 ដែលមកដល់ពេលនេះបានឆក់យកជីវិតមនុស្សជាង៨សែននាក់នៅជុំវិញពិភពលោក។
ប៉ុន្តែការទទួលបានវ៉ាក់សាំងសម្រាប់ប្រទេសក្រីក្រ បានក្លាយជាបញ្ហាប្រឈម និងការបារម្ភរបស់អង្គការអន្តរជាតិ ដោយសារតែប្រទេសអ្នកមានដូចជាអាមេរិក អង់គ្លេស កាណាដា ជប៉ុន និងសហភាពអឺរ៉ុបបានបញ្ជាទិញវ៉ាក់សាំងCOVID-19 ចំនួន៣,១ពាន់លានសម្រាប់ទុកជាមុនរួចទៅហើយ។ ដូច្នេះហើយទើបគម្រោង COVAX ដែលដឹកនាំរួមគ្នាដោយ WHO និង UNICEF មានសារសំខាន់សម្រាប់ប្រទេសក្រីក្រ។ WHO បានបន្ថែមផងដែរថា គោលបំណងរបស់ខ្លួន គឺចង់ឲ្យប្រទេសនីមួយៗទទួលបានវ៉ាក់សាំង២០ភាគរយនៃចំនួនប្រជាជនរបស់ខ្លួនដោយចាប់ផ្តើមពីក្រុមដែលងាយរងគ្រោះ។
UNICEF ដែលជាភ្នាក់ងាររបស់អង្គការសហប្រជាជាតិ ទទួលបន្ទុកកុមារ មានតួនាទីក្នុងការចូលរួមចែកចាយ និងទិញវ៉ាក់សាំង ដោយសារតែ UNICEF ជាអ្នកទិញវ៉ាក់សាំងច្រើនបំផុតក្នុងពិភពលោក គឺជាង២ពាន់លានសម្រាប់ រៀងរាល់ឆ្នាំ សម្រាប់កម្មវិធីវ៉ាក់សាំងក្នុងប្រទេសក្រីក្រចំនួន១០០ នៅទូទាំងពិភពលោក៕
© រក្សាសិទ្ធិដោយ thmeythmey.com
