លោក ត្រាំ ថា អាមេរិកមិនទាន់ឃើញព័ស្តុតាងករណីបំពុលមេដឹកនាំប្រឆាំងនៅរុស្ស៊ីទេ

អន្តរជាតិ

លោក ត្រាំ ថា អាមេរិកមិនទាន់ឃើញព័ស្តុតាងករណីបំពុលមេដឹកនាំប្រឆាំងនៅរុស្ស៊ីទេ

05, Sep 2020 , 2:59 pm

រូបភាព

អ្នកនយោបាយប្រឆាំងរបស់រុស្ស៊ី Alexei Navalny ដែលត្រូវបានបំពុល។ រូបភាព AFP

ដោយ: តន ចាន់រិទ្ធារ៉ា

ប្រធានាធិបតីអាមេរិក ដូណាល់ ត្រាំ នៅថ្ងៃទី៤ ខែកញ្ញានិយាយថា អាមេរិកមិនឃើញព័ស្តុតាងទាក់ទងការបំពុលលោក Alexei Navalny អ្នកនយោបាយប្រឆាំងរបស់រុស្ស៊ីឡើយ ខណៈអាល្លឺម៉ង់ទីដែលលោក Navalny កំពុងសម្រាកព្យាបាល បានប្រកាសពីការរកឃើញព័ស្តុតាងហើយនោះ។ ករណីបំពុលនេះ ធ្វើឲ្យទំនាក់ទំនងអឺរ៉ុប និងរុស្ស៊ីកាន់តែយ៉ាប់យ៉ឺន រហូតមានការគំរាមដាក់ទណ្ឌកម្មផង។ ទីក្រុងមូស្គូនៅតែអះអាងពីភាពត្រឹមត្រូវរបស់ខ្លួន។

«ខ្ញុំមិនដឹងថាមិនអ្វីកើតឡើងឲ្យប្រាកដឡើយ។ ខ្ញុំគិតថាវាជាសោកនាដកម្ម ជារឿងអាក្រក់មិនគួរកើតឡើងឡើយ។» ប្រធានាធិបតីអាមេរិក ដូណាល់ ត្រាំ និយាយបែបនេះទៅកាន់អ្នកសារព័ត៌មាននៅសេតវិមាននៅថ្ងៃទី៤ ខែកញ្ញា ដោយសំដៅករណីបំពុលអ្នកនយោបាយប្រឆាំងរុស្ស៊ី Alexei Navalny ។ សព្វថ្ងៃ លោក Navalny កំពុងសម្រាកក្នុងមន្ទីរពេទ្យអាល្លឺម៉ង់ដោយត្រូវបានដឹកតាមយន្តហោះពីតំបន់ស៊ីបេរីទីដែលលោកត្រូវបានជឿថា ត្រូវគេបំពុល។

រដ្ឋាភិបាលបែរឡាំងប្រកាសថា លោក Navalny ត្រូវបានបំពុលដោយថ្នាំ Novichok ដែលជាថ្នាំពុលកម្រិតខ្ពស់របស់យោធារុស្ស៊ី។ ប៉ុន្តែលោក ត្រាំ លើកឡើងថា អាមេរិកមិនទាន់បានឃើញព័ស្តុតាងផ្ទាល់ភ្នែកនៅឡើយទេទាក់ទងការបំពុលនេះ ហើយដឹងតាមការប្រកាសរបស់អាល្លឺម៉ង់ប៉ុណ្ណោះ។ ទីក្រុងបែរឡាំង បានរាយការណ៍ពីការរកឃើញរបស់ខ្លួនឲ្យសមាជិកណាតូ ហើយអគ្គលេខាធិការណាតូ លោក Jen Stoltenburg ក៏ជឿថា លោក Navalny ត្រូវបានបំពុលដោយ Novichok ដែរ។

«យើងមិនទាន់ឃើញវានៅឡើយទេ តែខ្ញុំនឹងមើលវា (ព័ស្តុតាង) ។» លោក ត្រាំ បន្ថែមបែបនេះជាមួយនឹងលើកឡើងបែបព្រមានថា អ្វីដែលអាល្លឺម៉ង់បង្ហាញដូចជាពិតទៅហើយ ហើយបើពិតជាដូច្នោះមែន លោកនឹងខឹងរុស្ស៊ីមែនទែន។

ក្រោយការប្រកាសរបស់អាល្លឺម៉ង់ សហភាពអឺរ៉ុបក៏គំរាមដាក់ទណ្ឌកម្មលើរុស្ស៊ី បើករណីនេះជាការពិត។ ណាតូវិញ ក៏ស្នើឲ្យមានការស៊ើបអង្កេតមួយលើករណីបំពុលនេះដែរ។ ប៉ុន្តែវិមានក្រេមឡាំងរបស់រុស្ស៊ី បន្តបដិសេធការចោទប្រកាន់នេះ។ អ្នកនាំពាក្យវិមានក្រេមឡាំង លោក Dmitry Peskov និយាយថា លទ្ធភាពនៃការបំពុលត្រូវបានពិចារណាតាំងពីដើមទីមក ខណៈដែលពេទ្យរុស្ស៊ីបង្ហាញថា វាមិនមែនជាការពិតក្ដី។

ចំណែករដ្ឋមន្ត្រីការបរទេស Sergei Lavrov វិញ លើកឡើងថា អាល្លឺម៉ង់មិនបានចែកព័ត៌មានអ្វីជាមួយរុស្ស៊ីឡើយ។ លោកបន្តថា រុស្ស៊ីគ្មានអ្វីត្រូវលាក់បាំងឡើយ៕