ជាតិ
សង្គមជាតិ
អាជ្ញាធរខណ្ឌ៧មករា អះអាងថា លោកស្រី សេង ចាន់ថន រងរបួសដោយសារប្រជាការពារជ្រុលដៃរុញ
អ្នកស្រី សេង ចាន់ថន ដួលពេលត្រូវប្រជាការពារច្រាន (រូបពីទំព័រហ្វេសប៊ុក មូលនិធិវីរភាពខ្មែរ Courage Fund Cambodia)
×![]()
លោកស្រី សេង ចាន់ថន ដែលចូលរួមទាមទារឲ្យដោះលែងស្វាមីជាមន្ត្រីអតីតគណបក្សសង្គ្រោះជាតិ ត្រូវបានប្រជាការពារម្នាក់ គឺលោក ចោម ប្រសិដ្ឋ ធ្វើឲ្យរងរបួស ក្នុងហេតុការណ៍ប្រទូសរ៉ាយគ្នារវាងក្រុមប្រជាការពារខណ្ឌ៧មករា ជាមួយក្រុមស្ត្រីអ្នកតវ៉ាទាំងនោះ។ ការបង្ករបួសនេះធ្វើឲ្យមានការរិះគន់ខ្លាំងពីមហាជន ទៅលើចំណាត់ការរបស់អាជ្ញាធរ។
កាលពីថ្ងៃសុក្រ ទី៤ ខែកញ្ញា ឆ្នាំ២០២០ មានស្ត្រីមួយក្រុម មានគ្នាប្រមាណ១៥នាក់ បាននាំគ្នាដើរតវ៉ានៅលើផ្លូវមុនរ៉េត ដើម្បីទាមទារឲ្យតុលាការដោះលែងស្វាមីរបស់ពួកគេ ជាមន្ត្រីអតីតគណៈបក្សសង្គ្រោះជាតិ ដែលត្រូវបានអាជ្ញាធរចាប់ខ្លួននិងកំពុងជាប់ឃុំ។ ការតវ៉ានោះ បង្កឲ្យមានការរុញច្រានគ្នារវាងក្រុមអ្នកតវ៉ាជាមួយក្រុមប្រជាការពារខណ្ឌ៧មករា រហូតបណ្តាលឲ្យលោកស្រី សេង ចាន់ថន រងរបួស ហើយត្រូវបានយកទៅសង្គ្រោះនៅមន្ទីរពេទ្យ។
ការបង្ករបួសស្នាមពីសំណាក់ប្រជាការពារឈ្មោះ ឆោម ពិសិដ្ឋ ក្នុងអំឡុងប្រតិបត្តិការទប់ស្កាត់ការតវ៉ានេះ បានរងការរិះគន់ខ្លាំងពីសំណាក់សាធារណជន ដែលបានឃើញសកម្មភាពតាមរយៈវីដេអូ លើបណ្តាញសង្គម។ មួយថ្ងៃក្រោយកើតហេតុ ពោលគឺនៅថ្ងៃទី៥ កញ្ញានេះ រដ្ឋបាលខណ្ឌ៧មករា បានសេចក្តីប្រកាសព័ត៌មាន ដើម្បីបកស្រាយពាក់ព័ន្ធបញ្ហានេះ។
រដ្ឋបាលខណ្ឌ៧មករាបានរៀបរាប់ដូច្នេះថា៖«នៅក្នុងការរុញច្រានប្រជាការពារខណ្ឌ ឈ្មោះ ឆោម ប្រសិដ្ឋ ខំប្រឹងទប់មិនឲ្យអ្នកតវ៉ាទៅមុខ ហើយក៏បានជ្រុលដៃរុញទៅលើស្ត្រីម្នាក់ឈ្មោះ សេង ចាន់ថន បង្កឲ្យដួលលើថ្នល់ ហើយគាត់បានទៅមន្ទីរពេទ្យ ក្រោយពិនិត្យរួចឃើញថា មានអាការៈធូរស្រាល គ្រូពេទ្យបានឲ្យត្រឡប់ទៅផ្ទះវិញ»។
រដ្ឋបាលខណ្ឌ៧មករាបានបន្ថែមថា មូលហេតុដែលនាំឲ្យមានការរុញច្រានគ្នានេះក្រោយក្រុមប្រជាការពារខណ្ឌ៧មករាចុះហាមឃាត់ក្រុមអ្នកតវ៉ា ដែលធ្វើដំណើរចេញពីរង្វង់មូលនាងគង្ហីងលើផ្លូវមុនីរ៉េតក្នុងគោលដៅឆ្ពោះទៅមុខសាលាដំបូងរាជធានីភ្នំពេញ ដើម្បីតវ៉ាទាមទារឲ្យដោះលែងស្វាមីរបស់ពួកគេ។
អាជ្ញាធរខណ្ឌ៧មករា ដែលហៅក្រុមស្ត្រីអ្នកតវ៉ាជាអ្នកតវ៉ាខុសច្បាប់បានអះអាងថា ការចុះហាមឃាត់របស់ប្រជាការពារខណ្ឌ គឺដើម្បីរក្សាសណ្តាប់ធ្នាប់សាធារណៈ ជៀសវាងការកកស្ទះចរាចរណ៍និងបង្កសម្លេងរំខានដល់អ្នកដំណើរ និងប្រជាពលរដ្ឋរស់នៅតំបន់នោះ។ ព្រោះនៅក្នុងការតវ៉ាក្រុមស្ត្រីទាំងនោះបាននាំគ្នាគោះឆ្នាំងបង្កជាសំឡេងរំខាន។ នេះតាមការបញ្ជាក់របស់រដ្ឋបាលខណ្ឌ៧មករា។
មិនមែនជាលើកទី១ទេ ដែលក្រុមស្ត្រីទាំងនោះ នាំគ្នាតវ៉ា ឲ្យតុលាការដោះលែងស្វាមីរបស់ពួកគេ ដោយកន្លងមក ពួកគេ ក៏បានចេញតវ៉ាប៉ុន្មានដងរួចមកហើយ តែមិនទទួលបានលទ្ធផលអ្វីឡើយ។ មន្ត្រីអតីតគណបក្សប្រឆាំង ជាស្វាមីរបស់ស្ត្រីទាំងនោះ មានជិត២០នាក់ ដែលកំពុងជាប់ឃុំ ក្រោមបទចោទផ្សេងៗ ទាក់ទងនឹងធ្វើសកម្មភាពនយោបាយរបស់ពួកគេ ខណៈគណបក្សរបស់ពួកគេ ត្រូវបានរំលាយទៅហើយ៕
Tag:
សេង ចាន់ថន
ឆោម ប្រសិដ្ឋ
© រក្សាសិទ្ធិដោយ thmeythmey.com
