ផ្សិតជាប្រភេទរុក្ខជាតិមានអាហារូបត្ថម្ភខ្ពស់ សម្បូរសារធាតុចិញ្ចឹម និងជាប្រភេទដំណាំទទួលបានផល ព្រមទាំងជួយបង្កើនប្រាក់ចំណូលក្នុងគ្រួសារ។ លើសពីនេះវាមានផ្ទុកវីតាមីន B វីតាមីន C នីកូទីណេត និងសារធាតុដែក ម៉ង់កាណែស ស័ង្កសី និងម៉ាញ៉េស្យូម។ ដើម្បីសម្រួលដល់កសិករ មានបច្ចេកទេសដាំដុះផ្សិតបានត្រឹមត្រូវ និងឆាប់ទទួលផល ក្រសួងកសិកម្មបានចងក្រងឯកសារពីបច្ចេកទេសដាំដុះផ្សិតអំបោះ។
ជ្រើសរើសកន្លែងសង់រោង៖ជាទូទៅផ្សិតដុះនៅកន្លែងដែលមានកំទិចឈើដែលពុកផុយ គួបផ្សំលក្ខខណ្ឌអាកាសធាតុ គឺមានសំណើម និងកំដៅ ដែលសមស្របទៅតាមប្រភេទផ្សិតនីមួយៗ។ ទីតាំងសម្រាប់បណ្ដុះផ្សិតអំបោះ និងផ្សិតខ្យង ត្រូវមានលក្ខណៈ ដីទួល មានប្រភពទឹក បរិយាកាសល្អ និងផ្ទៃដីរោងទូលាយ។
ការសាងសង់រោងបណ្ដុះផ្សិត៖ ទំហំរោង ត្រូវប្រែប្រួលទៅតាមតម្រូវការ ចងថង់ដុំល្បាយផ្សិតដែលបានរៀបចំ។ ក្នុងបរិមាណផ្សិតចំនួន ៥ពាន់ថង់ ការសង់រោងផ្សិតត្រូវមានទំហំ ៥ម៉ែត្របួនជ្រុង និងកម្ពស់ជញ្ជាំងប្រវែង ២ម៉ែត្រកន្លះទៅ ៣ម៉ែត្រ។ ដោយឡែកដំបូលរោងគេអាចប្រក់ស្លឹកត្នោត ចំណែកជញ្ជាំងគេអាចបាំងស្លឹកស្បូវ ឬបាំងកំណាត់ក៏បាន។ សម្រាប់វត្ថុធាតុដើមសម្រាប់ដាំផ្សិតអំបោះមាន អាចម៍រណាដើមកៅស៊ូ ឬប្រភេទដើមស្វាយ ដំឡូងឈើ ចំបើង ស្នូលពោត អង្កាម និងគ្រាប់កប្បាសជាដើម។
សម្រាប់សម្ភារប្រើប្រាស់មាន៖ ថង់ប្លាស្ទិក, កដប, ថង់ប្លាស្ទិកគ្របមាត់ដប, ធុងចំហុយ, ខ្សែសម្រាប់ចង,ប៉ោតស្រោចទឹកដែលមានចំពួយផ្កាឈូក,តង់កៅស៊ូ,កញ្ច្រែងជ័រ។
វិធីលាយវត្ថុធាតុ៖ លាយអាចម៍រណារ រោយកំបោរស ៥០០ក្រាម, ជីអ៊ុយរ៉េ ១០០ក្រាម, កន្ទក់ល្អិត ១០គីឡូក្រាម។ បន្ទាប់ពីលាយបញ្ចូលគ្នាហើយ ត្រូវស្រោចទឹកឲ្យសព្វ និងមានសំណើមពី៦០ ទៅ ៧០ភាគរយ។ ជាដំណាក់កាលបន្ទាប់ត្រូវប្រមូលជាគំនរ ទុករយៈពេល៤ថ្ងៃ ប៉ុន្តែក្នុងរយៈពេលទាំង ៤ថ្ងៃត្រូវជ្រោយច្របល់វាឲ្យសព្វ។ បន្ទាប់ពីផ្អាប់ទុក ៤ថ្ងៃហើយ ត្រូវច្រកល្បាយទាំងនោះបញ្ចូលថង់។
បន្ទាប់ពីច្រកល្បាយបញ្ចូលថង់ហើយ មិនត្រូវទុកវាឲ្យលើសពី ៣ថ្ងៃឡើយ ត្រូវយកទៅចំហុយ។ យើងត្រូវតម្រៀបដាក់ចំហុយក្នុងធុងចំហុយ រយៈពេល ៣ ទៅ ៦ម៉ោង។ បន្ទាប់មកត្រូវស្រង់ដុំផ្សិត ទុកឲ្យត្រជាក់មុននឹងយកទៅបញ្ចូលមេផ្សិត។ បន្ទាប់មក ត្រូវយកទៅបន្ទំ រយៈពេលជាមធ្យម ៣០ថ្ងៃ ទើបសរសៃផ្សិតដុះបានពេញថង់។
នៅពេលសរសៃផ្សិតដុះពេញថង់ ត្រូវយកដុំល្បាយទៅដាក់ក្នុងរោងបណ្ដុះផ្សិត។ ត្រូវតម្រៀបថង់ដុំផ្សិតល្បាយទល់គ្នា ហើយត្រូវបើកគម្របមាត់ថង់ចេញ និងត្រូវស្រោចទឹកមួយថ្ងៃ ២ ទៅ ៣ដង។ ជាទូទៅផ្សិតអំបោះមួយថង់អាចទទួលទិន្នផល ០,៣០ គីឡូក្រាម។ ក្រោយពេលប្រមូលទិន្នផលផ្សិត ត្រូវយកស្លាបព្រាខ្លី កោសសម្អាតគាល់ផ្សិតដែលនៅសល់ចេញ។ ជាទូទៅការបណ្ដុះផ្សិតមួយវគ្គមានរយៈពេល ៣ ទៅ ៦ ខែ៕