ជាតិ
កម្ពុជា គ្រោងស្នើដាក់តំបន់៤ ជាជម្រកសត្វកម្រលើពិភពលោក ចូលក្នុងបញ្ជីបេតិកភណ្ឌពិភពលោក
លោក នេត្រ ភក្ត្រា រដ្ឋលេខាធិការក្រសួងបរិស្ថាន កំពុងធ្វើបទបង្ហាញពីតំបន់ទេសចរណ៍ធម្មជាតិរបស់កម្ពុជា ត្រៀមដាក់ចូលបញ្ជីបេតិកភណ្ឌធម្មជាតិពិភពលោករបស់អង្គការយូណេស្កូ (UNESCO) កាលពីថ្ងៃទី៣កញ្ញា ឆ្នាំ២០២០។ រូបថត៖ ក្រសួងបរិស្ថាន
×![]()
ក្រចេះ៖ តំបន់ទេសចរណ៍ធម្មជាតិចំនួន៤ភូមិសាស្ត្រ ដែលមានប្រភេទសត្វកម្រ និងជិតផុតពូជលើពិភពលោកដូចជា សត្វត្រយងយក្ស សត្វត្មាត សត្វក្ដាន់ និង សត្វផ្សោតទឹកសាប ជាដើម ត្រូវបានរដ្ឋាភិបាលកម្ពុជា តាមរយៈក្រសួងបរិស្ថាន គ្រោងស្នើទៅអង្គការយូណេស្កូ (UNESCO) ដើម្បីបញ្ជូលក្នុងបញ្ជីបេតិកភណ្ឌធម្មជាតិពិភពលោក។ ក្រៅពីសត្វកម្រ តំបន់ទេសចរណ៍ធម្មជាតិទាំង៤ភូមិសាស្ត្រនេះ មានទេសភាពយ៉ាងស្រស់ត្រកាល។ បើតាមលោក នេត្រ ភក្ត្រា រដ្ឋលេខាធិការក្រសួងបរិស្ថាន កិច្ចការនេះកំពុងដំណើរការសិក្សាស្រាវជ្រាវលម្អិត និងចងក្រងឯកសារពាក់ព័ន្ធនានា បានមួយចំនួនហើយ។
តំបន់ទេសចរណ៍ធម្មជាតិចំនួន៤ភូមិសាស្ត្រ ដែលកម្ពុជាត្រៀមដាក់ចូលជាតំបន់បេតិកភណ្ឌធម្មជាតិពិភពលោកនោះ មាន ព្រែកកាំពី, ដែនជម្រកសត្វព្រៃព្រែកប្រសព្វ ក្នុងខេត្តក្រចេះ, តំបន់បេតិកភណ្ឌធម្មជាតិភ្នំត្បែង និង តំបន់សហគមន៍ការពារធម្មជាតិត្មាតប៉ើយ នៅខេត្តព្រះវិហារ។ នេះបើតាមការបញ្ជាក់របស់លោក នេត្រ ភក្ត្រា ក្នុងដំណើរដឹកនាំក្រុមអ្នកសារព័ត៌មានទៅកាន់រមណីយដ្ឋានព្រែកកាំពី ស្ថិតនៅឃុំសំបុក ស្រុកចិត្របុរី ខេត្តក្រចេះ កាលពីថ្ងៃទី៣កញ្ញា ឆ្នាំ២០២០។
សម្រាប់រមណីយដ្ឋានព្រែកកាំពី លោក នេត្រ ភក្ត្រា បាននិយាយដូច្នេះថា៖«រហូតមកដល់ពេលនេះក្រុមការងារដែលដឹកនាំដោយក្រសួងបរិស្ថាន គឺបានចងក្រងនូវឯកសារបានមួយចំនួន និងកំពុងតែបន្តធ្វើបន្ថែមទៀត ដើម្បីសិក្សានៅក្នុងតំបន់ព្រែកកាំនេះ ដើម្បីរៀបចំនូវឯកសារទាំងឡាយឱ្យបានគ្រប់ជ្រុងជ្រោយ។ ជាពិសេសនៅតាមតំបន់ជាប់ទន្លេមេគង្គ ដែលជាជម្រករបស់សត្វផ្សោត»។
ព្រែកកាំពី គឺជារមណីយដ្ឋានទេសចរធម្មជាតិមួយដែលមានសម្រស់ទេសភាពទឹកទន្លេ ដ៏ស្រស់បំព្រង ហើយក៏ជាទីកន្លែងជម្រកដ៏សុខសាន្តសម្រាប់សត្វផ្សោតទន្លេមេគង្គ។ សព្វថ្ងៃ ព្រែកកាំពី កំពុងក្លាយទៅជាតំបន់លម្អែកាយមួយដ៏ពេញនិយម និងល្បីឈ្មោះសម្រាប់ខេត្តក្រចេះ និងមានប្រជាប្រិយភាពទាក់ទាញភ្ញៀវទេសចរជាតិ និងអន្តរជាតិ។ បើតាមលោកនេត្រ ភក្ត្រា បច្ចុប្បន្នព្រែកាំពី មានសត្វផ្សោតចំនួន៩២ក្បាល ហើយភ្ញៀវទេសចរដែលមកទស្សនាសត្វផ្សោតនៅតំបន់ច្រើនបំផុត គឺនៅក្នុងរដូវប្រាំង។
រដ្ឋលេខាធិការនិងជាអ្នកនាំពាក្យក្រសួងបរិស្ថានរូបនេះ បានអះអាងថា កម្ពុជាជាប្រទេសមួយក្នុងចំណោមប្រទេសចំនួន៣នៅលើពិភពលោកដែលមានវត្តមានសត្វផ្សោតទឹកសាបរស់នៅ ហើយកម្ពុជា ជាប្រទេសមានសត្វផ្សោតច្រើនជាងគេ។ ដោយឡែក ប្រទេស២ទៀត ដែលមានវត្តមានសត្វផ្សោតទឹកសាបនេះ គឺប្រទេសឥណ្ឌូនេស៊ី និងភូមា។
លោកនេត្រ ភក្ត្រា បានបន្តថា សម្រាប់ដែនជម្រកសត្វព្រៃព្រែកប្រសព្វ មានផ្ទៃដីជាង១២ម៉ឺនហិកតា ស្ថិតក្នុងភូមិសាស្ត្រស្រុកព្រែកប្រសព្វ និងស្រុកសំបូរ ខេត្តក្រចេះ។ ដែនជម្រកសត្វព្រៃព្រែកប្រសព្វ គឺជាតំបន់ធម្មជាតិមួយរបស់កម្ពុជា មានវត្តមានសត្វក្តាន់រស់នៅ ដែលជាប្រភេទសត្វជិតផុតពូជនៅលើពិភពលោក។ ជាពិសេសតំបន់នេះមានវត្តមានប្រភេទសត្វកម្រផ្សេងៗទៀត ជាច្រើន។
រីឯតំបន់បេតិកភណ្ឌធម្មជាតិភ្នំត្បែងដែលមានផ្ទៃដី២,៥ម៉ឺនហិកតា ត្រូវបានបង្កើតឡើងកាលឆ្នាំ២០១៦ ដោយមានភូមិសាស្ត្រជាប់ស្រុកចំនួនបួន គឺស្រុកសង្គមថ្មី, ស្រុកគូលែន, ស្រុករវៀង និងក្រុងព្រះវិហារ។ តំបន់បេតិកភណ្ឌមួយនេះ មានភាពល្អឯកលើសម្រស់ធម្មជាតិដ៏ស្រស់ត្រកាល ទឹកជ្រោះចំនួន៣ដំណាក់តាំង ពីកំពូលរហូតជើងភ្នំ និងមានទេសភាពចំការចេករបស់ប្រជាពលរដ្ឋតាមដងផ្លូវទៅកាន់ភ្នំត្បែង ដែលមានកម្ពស់ប្រមាណ៤០០ម៉ែត្រ ដែលអ្នកធ្វើដំណើរត្រូវឆ្លងកាត់កាំជណ្តើររហូត១៣៨០កាំ។
លើសពីនេះទៅទៀត ភ្នំត្បែងគឺជាទីតាំងប្រវត្តិសាស្ត្រដែលពលរដ្ឋកម្ពុជាគោរពបូជា ហើយទីសក្ការៈទាំងនោះរួមមាន ថ្មបីដុំជាដើម។ បច្ចុប្បន្នតំបន់បេតិកភណ្ឌភ្នំត្បែង បានក្លាយជាទីចាប់អារម្មណ៍របស់ភ្ញៀវទេសចរ ពិសេសយុវជន ក្នុងការកម្សាន្តចុងសប្តាហ៍ ដោយការបោះតង់ជាក្រុម និងជាលក្ខណៈគ្រួសារជាដើម។
អត្ថបទទាក់ទង
សម្រាប់សហគមន៍ទេសចរណ៍ធម្មជាតិត្មាតប៉ើយ មានផ្ទៃដីជាង១,៧ពាន់ហិកតា ស្ថិតនៅភូមិត្មាតប៉ើយ ឃុំព្រីងធំ ស្រុកជាំក្សាន្ត ខេត្តព្រះវិហារ។ បច្ចុប្បន្ន សត្វព្រៃសំខាន់ៗនៅក្នុងសហគមន៍ត្មាតប៉ើយនេះ មានជាង១០ប្រភេទ ដោយក្នុងនោះមានសត្វត្រយងយក្សដែលតំណាងឱ្យជាតិ ដែលមានចំនួនជាង៥០០ក្បាល កំពុងរស់នៅក្នុងសហគមន៍ទេសចរណ៍ធម្មជាតិនេះ។ ក្រៅពីមានសត្វត្រយងយក្សហើយនោះ សហគមន៍ទេសចរណ៍ធម្មជាតិនេះ ក៏មាននូវសត្វក្រៀល, សត្វត្រយងចង្កំកស, សត្វត្មាត ព្រមទាំងប្រភេទសត្វកម្រផ្សេងៗទៀត៕
Tag:
តំបន់ធម្មជាតិ
តំបន់ធម្មជាតិ
លោក នេត្រ ភក្ត្រា
ក្រចេះ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
