វិសាខា ប៉ះ បឹងកេត ស្វាយរៀងជួបភ្នំពេញក្រោន ក្រោយអគ្គិសនីកម្ពុជាទទួលសូលទីឡូអង្គរ

កីឡាជាតិ

ជាតិ

វិសាខា ប៉ះ បឹងកេត ស្វាយរៀងជួបភ្នំពេញក្រោន ក្រោយអគ្គិសនីកម្ពុជាទទួលសូលទីឡូអង្គរ

06, Sep 2020 , 2:03 pm

រូបភាព

កីឡាករ ម៉ាត់ នូរុណ (អាវស)ខ្សែប្រយុទ្ធក្លិបបឹងកេត និងកីឡាករ កែវ សុខផេង ខ្សែប្រយុទ្ធវិសាខា

ដោយ:

ការប្រកួតបាល់ទាត់ក្របខណ្ឌមិត្តហ្វូនខេមបូឌានលីគនៅថ្ងៃអាទិត្យនេះ នឹងក្លាយជាការប្រកួតដ៏ទាក់ទាញនិងមានភាពតានតឹងបំផុត ដ្បិតក្រុមខ្លាំងចំនួន៤ត្រូវប៉ះគ្នា ក្នុងនោះវិសាខាត្រូវតទល់ជាមួយបឹងកេត ខណៈព្រះខ័នរាជស្វាយរៀងប៉ះភ្នំពេញក្រោន។ ក្រៅពីការប្រកួតដ៏ជក់ចិត្តទាំងពីរ ក៏មានការប្រកួត១គូទៀតផងដែរ ដោយអគ្គិសនីកម្ពុជាទទួលស្វាគមន៍សូលទីឡូអង្គរ។

វិសាខាត្រូវការឈ្នះបឹងកេតជាចាំបាច់នៅល្ងាចនេះ ដើម្បីបន្តឱកាសក្នុងការប្រជែងដណ្តើមជើងឯកពានរង្វាន់ក្របខណ្ឌមិត្តហ្វូនខេមបូឌានលីគ។ តែយ៉ាងណា វាមិនងាយស្រួលយកឈ្នះសម្រាប់វិសាខានោះទេ ព្រោះបឹងកេតជាក្រុមសម្បូរដោយធនធានកីឡាករមានសមត្ថភាព ហើយកាលពីពេលថ្មីៗក្រុមនេះ ទើបនាំចូលខ្សែប្រយុទ្ធ Dzarma Bata ក្រោមលក្ខខណ្ឌខ្ចីជើងពីអង្គរថាយហ្គឺរ។

ប្រសិនបើវិសាខាចាញ់ ឬស្មើបឹងកេត នោះពួកគេអាចនឹងអស់ឱកាសប្រជែងដណ្តើមជើងឯកនៅឆ្នាំនេះ។ បច្ចុប្បន្នវិសាខាស្ថិតនៅលេខរៀងទី៣មាន២៣ពិន្ទុ រីឯក្រុមកំពូលតារាងបឹងកេតមាន៣២ពិន្ទុ ខណៈការប្រកួតនៅសល់តែ៤ប្រកួតទៀតប៉ុណ្ណោះ។ ការប្រកួតដែលរៀបចំនៅកីឡដ្ឋានព្រីនស៍ នាវេលាម៉ោង៦ល្ងាចថ្ងៃទី៦ ខែកញ្ញា ឆ្នាំ២០២០ នឹងក្លាយជាការប្រកួតដ៏តានតឹង និងទាក់ទាញបំផុតសម្រាប់ទស្សនិកជន ដ្បិតបឹងកេត ត្រូវការជ័យជម្នះដើម្បីបន្តគ្រងកំពូលតារាង។

កាលជួបគ្នាជើងទី១នៅកីឡដ្ឋានខេមបូឌាអ៊ែរវ៉េបឹងកេតបានយកឈ្នះវិសាខាក្នុងលទ្ធផល ១-០។ បឹងកេតពុំទាន់ស្គាល់បរាជ័យនោះទេសម្រាប់១២ប្រកួតកន្លងនេះ ហើយក្រោមការដឹកនាំរបស់លោក គឺម ភក្តី ក្រុមមានមូលដ្ឋាននៅរាជធានីភ្នំពេញមួយនេះ ទទួលបានជ័យជម្នះ៨លើកជាប់គ្នា។ លទ្ធផលនេះជួយឲ្យលោក គឺម ភក្តី ដែលចូលដឹកនាំជំនួសលោក Apisit Im Amphai ទទួលពានគ្រូបង្វឹកល្អជាងគេប្រចាំខែកក្កដា។

នៅថ្ងៃអាទិត្យម៉ោង៦ល្ងាចនេះដែរ ក្រុមព្រះខ័នរាជស្វាយរៀងត្រូវបើកទ្វារកីឡដ្ឋានខេត្តស្វាយរៀតទទួលស្វាគមន៍ភ្នំពេញក្រោន។ នេះ ក៏ជាការប្រកួតដ៏តានតាង និងជក់ចិត្តផងដែរ ព្រោះក្រុមទាំងពីរសុទ្ធសឹងមានសមត្ថភាពខ្លាំង និងសម្បូរដោយកីឡាករមានទេពកោសល្យដូចគ្នា។ កាលជំនួបជើងទី១ នៅកីឡដ្ឋានស្មាត អ អេស អិន ក្រុមទាំងពីរបានបញ្ចប់ដោយលទ្ធផលគ្មានការស៊ុតបញ្ចូលទីគ្នា។

កីឡាករ ប្រាក់ មុន្នីឧត្តម ខ្សែបម្រើរបស់ព្រះខ័នរាជស្វាយរៀង

ទាំងព្រះខ័នរាជស្វាយរៀង និងភ្នំពេញក្រោនសុទ្ធតែត្រូវការជ័យជម្នះជាចាំបាច់ដូចគ្នា។ ក្នុងនោះ ស្វាយរៀង ត្រូវការឈ្នះដើម្បីរក្សាគម្លាតក្នុងការប្រជែងដណ្តើមជើងឯក ខណៈភ្នំពេញក្រោន ដើម្បីបន្តឱកាសក្នុងការប្រកួតដណ្តើមជើងឯក។ ប្រសិនបើការប្រកួតបញ្ចប់ក្នុងលទ្ធផលស្មើ ឬចាញ់ នោះភ្នំពេញក្រោននឹងអស់ឱកាសក្នុងការប្រជែងដណ្តើមជើងឯក ក្នុងករណីបឹងកេតយកឈ្នះវិសាខា។

បច្ចុប្បន្នក្រុមការពារតំណែងជើងឯកព្រះខ័នរាជស្វាយរៀងស្ថិតនៅលេខរៀងទី២មាន៣១ពិន្ទុ រីឯភ្នំពេញក្រោនឈរលេខរៀងទី៥មាន២២ពិន្ទុ។

ក្រៅពីជំនួបដ៏ជក់ចិត្តទាំងពីរនេះ ក៏មានការប្រកួត១គូទៀតផងដែរ រវាងក្រុមអគ្គិសនីកម្ពុជាជាមួយសូលទីឡូអង្គរ ដែលធ្វើឡើងនៅកីឡដ្ឋានអគ្គិសនីកម្ពុជាវេលាម៉ោង៣:៣០នាទីរសៀល។ កាលជើងទី១ ក្រុមឈរលេខទី១០មាន៩ពិន្ទុអគ្គិសនីកម្ពុជា បានយកឈ្នះក្រុមឈរលេខរៀងទី១២មាន៧ពិន្ទុសូលទីឡូអង្គរ ក្នុងលទ្ធផល ៣-២។

សម្រាប់ការប្រកួតកាលពីថ្ងៃសៅរ៍ ទី៥ ខែកញ្ញា ឆ្នាំ២០២០ ក្រុមណាហ្គាវើលបានបញ្ចប់ដោយលទ្ធផលស្មើ ១-១ ជាមួយកងយោធពលខេមរភូមិន្ទ រីឯអង្គរថាយហ្គឺរយកឈ្នះនគរបាលជាតិ ១-០ ខណៈគីរីវង់សុខសែនជ័យស៊ីយុវជនបាទី ២-១៕