ជាតិ
គម្រោង «ស្រែសង្គម» លើផ្ទៃដី៤០ហិកតានៅឃុំព្រះដាក់ អាចផ្ដល់ផលស្រូវជាង ១០០តោន
× រដ្ឋបាលស្រុកបន្ទាយស្រី បានចាប់ផ្ដើមប្រមូលផលស្រូវរបស់គម្រោង «ស្រែសង្គម» ក្នុងឃុំព្រះដាក់ហើយ ក្រោយដាំដុះអស់រយៈពេល៤ខែកន្លងមក។ លោក ឃឹម ហ្វីណង់ បញ្ជាក់ថា តាមការប៉ាន់ស្មាន គម្រោងលើកទីមួយ ដែលបានអនុវត្តនៅលើផ្ទៃដី៤០ហិកតានេះ អាចផ្ដល់ផលស្រូវជាង ១០០តោន។
អភិបាលស្រុកបន្ទាយស្រី លោក ឃឹម ហ្វីណង់ បានប្រាប់ឱ្យដឹងថា ការបង្កើតគម្រោង«ស្រែសង្គម»នេះឡើង គឺដើម្បីយកផលស្រូវដែលផលិតបាន ទៅឧបត្ថម្ភដល់ប្រជាពលរដ្ឋទីទ័លក្រនៅក្នុងស្រុកបន្ទាយស្រី ជាពិសេសអ្នកដែលទទួលរងផលប៉ះពាល់ខាងផ្នែកសេដ្ឋកិច្ចនិងជីវភាពពីជំងឺកូវីដ-១៩។
លោក ហ្វីណង់ បញ្ជាក់ទៀតថា គម្រោងនេះទទួលបានការគាំទ្រពីសប្បុរសជនទូទៅ ដោយពួកគាត់បានជួយជាពូជស្រូវ ម៉ាស៊ីនគ្រឿងចក្រសម្រាប់បម្រើឱ្យការភ្ជួររាស់និងដឹកជញ្ជូន ព្រមទាំងការគាំទ្រផ្នែកបច្ចេកទេស ជាពិសេសជួយរ៉ាប់រយរាល់ការចំណាយទាំងអស់នៅក្នុងគម្រោងជុំទីមួយនេះ។ លោកអភិបាលស្រុករូបនេះ បន្តថា ក្រុមការងារនឹងរៀបចំប្រមូលផលជាដំណាក់កាលៗ ដោយហេតុតែការចាប់ផ្តើមគម្រោងមិនបានដំណាលគ្នាកាលពីដំបូង តែនឹងបញ្ចប់ការប្រមូលផលទាំងស្រុងយ៉ាងយូរត្រឹមពីរសប្តាហ៍ទៀតប៉ុណ្ណោះ។
បើតាមលោក ឃឹម ហ្វីណង់ ក្នុងផ្ទៃដីមួយហិកតា អាចនឹងផ្ដល់ផលបានចន្លោះពី ៣ទៅ៣,៥តោន។ រដ្ឋបាលស្រុកបន្ទាយស្រី នៅតែបន្តអនុវត្តគម្រោងនេះជាបន្តទៀត ប្រសិនបើនៅតែមានការគាំទ្រពីសំណាក់ប្រជាពលរដ្ឋ។
តាមផែនការដែលបានរៀបចំទុក ដំណាក់កាលទី២នេះ នៅតែបន្តធ្វើលើទំហំផ្ទៃដីដដែល ព្រោះថា កាលពីជុំទីមួយកន្លងទៅ គម្រោងបានជួបប្រទះបញ្ហាមួយចំនួន ក្នុងនោះបញ្ហាហិរញ្ញវត្ថុគឺជារឿងប្រឈមមួយ។ នេះបើតាមលោក ឃឹម ហ្វីណង់ អភិបាលស្រុកបន្ទាយស្រី៕
រូបភាពពីហ្វេសប៊ុកលោក ឃឹម ហ្វីណង់
លោក ឃឹម ហ្វីណង់ អភិបាលស្រុកបន្ទាយស្រី
Tag:
បន្ទាយស្រី
ព្រះដាក់
© រក្សាសិទ្ធិដោយ thmeythmey.com