អន្តរជាតិ
លោក រូហានី អន់ចិត្ត ព្រោះគ្មានប្រទេសណាហ៊ានទម្លុះរនាំងទណ្ឌកម្មអាមេរិកដើម្បីរកស៊ីជាមួយអ៊ីរ៉ង់ ប្រធានាធិបតីអ៊ីរ៉ង់ ហាសាន់ រូហានី ។ រូបភាព AFP
× ប្រធានាធិបតីអ៊ីរ៉ង់ ហាសាន់ រូហានី នៅថ្ងៃទី៥ ខែកញ្ញា បានបង្ហាញការអន់ចិត្តនឹងប្រទេសជាមិត្តរបស់អ៊ីរ៉ង់ដែលមិនព្រមងើបឡើងប្រឆាំងអាមេរិក និងបន្តការរកស៊ីជាមួយអ៊ីរ៉ង់អំឡុងពេលវិបត្តិ COVID-19 ។ មេដឹកនាំអ៊ីរ៉ង់ ថែមទាំងនិយាយវាយប្រហារអាមេរិកដោយប្រើពាក្យសម្ដីខ្លាំងៗ ព្រោះមិនព្រមដកទណ្ឌកម្មលើអ៊ីរ៉ង់សិនក្នុងពេលមានវិបត្តិសុខាភិបាលធ្ងន់ធ្ងរបែបនេះ។
អ៊ីរ៉ង់ ជាប្រទេសរងគ្រោះខ្លាំងជាងគេ និងមុនគេដោយសារជំងឺ COVID-19 នៅមជ្ឈិមបូព៌ា។ តួលេខអ្នកឆ្លងសរុបនៅប្រទេសមានច្រើនជាង៣៨ម៉ឺននាក់ ហើយច្រើនជាន់២២ពាន់នាក់ទៀត បានបាត់បង់ជីវិត។ ខណៈពេលជួបបញ្ហាវិបត្តិធ្ងន់ធ្ងរបែបនេះ អ៊ីរ៉ង់ ពិតជាពិបាកដកដង្ហើម ព្រោះត្រូវអាមេរិកដាក់ទណ្ឌកម្ម។
ក្នុងសុន្ទរកថាតាមកញ្ចក់ទូរទស្សន៍រដ្ឋនៅថ្ងៃទី៥ ខែកញ្ញា ប្រធានាធិបតីអ៊ីរ៉ង់ ហាសាន់ រូហានី បានបញ្ចេញអារម្មណ៍ខកចិត្តនឹងអាមេរិក និងប្រទេសជាមិត្តរបស់អ៊ីរ៉ង់ផង។ បើតាមទីភ្នាក់ងារព័ត៌មាន Reuters លោក រូហានី និយាយថា ប៉ុន្មានខែក្រោយ COVID-19 ទៅដល់អ៊ីរ៉ង់ គ្មាននរណាជួយប្រទេលោកឡើយ ចំណែកអាមេរិកវិញ ក៏គ្មានបេះដូង ខួរក្បាល ឬមនុស្សធម៌អ្វីទៅទៀត ព្រោះបើមាន អាមេរិកដកទណ្ឌកម្មមួយឆ្នាំសិនបាត់ទៅហើយ។
បើតាមលោក រូហានី អាមេរិកបែរជាដាក់ទណ្ឌកម្ម និងសម្ពាធថ្មីៗលើអ៊ីរ៉ង់ក្នុងពេល៧ខែមកនេះ។ នៅពេលអាមេរិកធ្វើសកម្មភាពបែបនេះ ប្រធានាធិបតីអ៊ីរ៉ង់រូបនេះ ក៏និយាយដល់ប្រទេសជាមិត្តរបស់អ៊ីរ៉ង់ ដែលមិនតតាំងនឹងអាមេរិក។
«មិនមានប្រទេសមិត្តភក្តិណាប្រាប់យើងថា នៅពេលលំបាកបែបនេះ និងដើម្បីមនុស្សធម៌ផង យើងនឹងងើបឡើងប្រឆាំងអាមេរិក ហើយធ្វើពាណិជ្ជកម្មជាមួយអ៊ីរ៉ង់ ទោះអាមេរិកដាក់ទណ្ឌកម្មក្ដី។» នេះជាការលើកឡើងរបស់លោក រូហានី ។
តាមពិតទៅ ប្រទេសជាច្រើន ក៏មិនអាចរកស៊ីជាមួយអ៊ីរ៉ង់ទៅទៀត ព្រោះអាមេរិក មិនត្រឹមដាក់ទណ្ឌកម្មលើប្រទេសមជ្ឈិមបូព៌ានេះឡើយ ហើយថែមបានគំរាមដាក់ទណ្ឌកម្មលើប្រទេសណាដែលមានទំនាក់ទំនងពាណិជ្ជកម្មជាមួយប្រទេសនេះទៀតផង។ ខ្លាចរអានឹងការគំរាមរបស់អាមេរិកដែលជាមហាអំណាច ប្រទេសជាច្រើននាំគ្នាផ្អាករកស៊ីជាមួយអ៊ីរ៉ង់ ដោយនៅសល់តែប្រទេសខ្លះដូចជារុស្ស៊ីប៉ុណ្ណោះ៕
Tag:
អាមេរិក
អ៊ីរ៉ង់
ហាសាន់ រូហានី
© រក្សាសិទ្ធិដោយ thmeythmey.com