អន្តរជាតិ
លោក ចនសុន ទុកពេលត្រឹមថ្ងៃទី១៥ ខែតុលាសម្រាប់ការចរចាកិច្ចព្រមព្រៀងពាណិជ្ជកម្មអង់គ្លេស-អឺរ៉ុប នាយករដ្ឋមន្រ្តីអង់គ្លេស បូរីស ចនសុន ។ រូបភាព AFP
× នាយករដ្ឋមន្ត្រីអង់គ្លេស បូរីស ចនសុន ប្រកាសទុកពេលត្រឹមពាក់កណ្ដាលខែតុលាសម្រាប់ការចរចាកិច្ចព្រមព្រៀងពាណិជ្ជកម្មរវាងអង់គ្លេស និងអឺរ៉ុប។ ការចរចាលើកិច្ចព្រមព្រៀងដែលកំណត់របៀបរបបរកស៊ីរវាងអង់គ្លេសដែលចាកចេញពីអឺរ៉ុបកាលពីឆ្នាំ២០១៩ និងអឺរ៉ុប ជាបញ្ហាប្រឈមដ៏លំបាកតាំងពីការចាប់ផ្ដើមកម្ល៉េះ ខណៈការចរចាជាច្រើនជុំ ក៏មិនទន់មានលទ្ធផលសមប្រកបដែរ។ ទីក្រុងឡុងដ៍ ហាក់ប្រកាន់ជំហរម៉ឺងម៉ាត់ខ្លាំង ហើយជារឿយៗព្រមានថា មិនបាច់មានកិច្ចព្រមព្រៀងក៏បាន។
ចក្រភពអង់គ្លេស និងសហភាពអឺរ៉ុប នឹងបើកការចរចាជុំវិញទី៨ លើកិច្ចព្រមព្រៀងពាណិជ្ជកម្មក្រោយការចាកចេញអង់គ្លេសកាលពីឆ្នាំ២០១៩ ។ ទោះបានចំណាយពេលច្រើនក្ដី ភាគីទាំងពីរនៅតែខ្វែងគំនិតគ្នាលើបញ្ហាជាច្រើន ហើយភាគីម្ខាងៗបានចោទគ្នាទៅវិញទៅមកថា មិនចេះថយក្រោយមួយជំហាន ហើយប្រើប្រាស់គោលនយោបាយគ្រោះថ្នាក់ក្នុងការចរចាទៀតផង។
មុនជំនួបជាមួយសមភាគីអឺរ៉ុប Michel Barnier ប្រធានក្រុមចរចាអង់គ្លេស លោក David Frost បានផ្ញើសារនៅថ្ងៃទី៦ ខែកញ្ញា ថា អង់គ្លេស នឹងមិនសម្របសម្រួលជំហររបស់ខ្លួនឡើយ។ ចំណែកលោក Barnier វិញ ក៏ធ្លាប់ព្រមានថារួចហើយថា ការចរចាអាចទៅមុខ ឬបរាជ័យអាស្រ័យត្រង់ការសម្រេចបានឬអត់ការឯកភាពគ្នាលើការអនុញ្ញាតឲ្យអឺរ៉ុបចូលដែននេសាទអង់គ្លេស និងបញ្ញត្តិទាក់ទងការផ្ដល់ជំនួយរបស់រដ្ឋ។
ខណៈការចរចាជួបបញ្ហារាំងស្ទះច្រើន នាយករដ្ឋមន្ត្រីអង់គ្លេស បូរីស ចនសុន បានទុកឱសានវាទត្រឹមថ្ងៃទី១៥ ខែតុលា ឲ្យការចរចារសម្រេចចិត្តឲ្យកិច្ចព្រមព្រៀងពាណិជ្ជកម្មមួយ។ ជំហរនេះ ក៏មិនខុសគ្នាប៉ុន្មានពីការចង់បានរបស់អឺរ៉ុបដែរ ព្រោះអឺរ៉ុបត្រូវការពេលដើម្បីអនុវត្តនីតិវិធីផ្សេងទៀតដូចជាការបកប្រែ និងការផ្ដល់សច្ចាប័នរបស់សភាអឺរ៉ុបជាដើម។
«មានការចាំបាច់ដែលត្រូវមានកិច្ចព្រមព្រៀងជាមួយមិត្តភក្តិអឺរ៉ុបរបស់យើង នៅត្រឹមកិច្ចប្រជុំក្រុមប្រឹក្សានៅថ្ងៃទី១៥ ខែតុលា ប្រសិនចង់ឲ្យកិច្ចព្រមព្រៀងចូលធរមានៅចុងឆ្នាំនេះ។» លោក ចនសុន បញ្ជាក់បែបនេះក្នុងសេចក្ដីថ្លែងការណ៍ចេញដោយការិយាល័យនាយករដ្ឋមន្ត្រី។ លោកព្រមានថា វាជារឿងគ្មានប្រយោជន៍ដែលចង់គិតហួសពីរយៈពេលខាងលើ ហើយបើចរចាមិនបានសម្រេច វាក៏គ្មានការចាំបាច់ត្រូវមានកិច្ចព្រមព្រៀងពាណិជ្ជកម្មសេរីដែរ។
ក្នុងករណីគ្មានកិច្ចព្រមព្រៀងមែននោះ លោក ចនសុន លើកឡើងថា ប្រទេសរបស់លោក នឹងយកលំនាំតាមអូស្ត្រាលីក្នុងការរកស៊ីជាមួយអឺរ៉ុប ឬលំនាំតាមកិច្ចព្រមព្រៀងរវាងកាណាដា និងប្រទេសផ្សេង។ សម្រាប់អូស្ត្រាលី ការធ្វើពាណិជ្ជកម្មជាមួយអឺរ៉ុប ធ្វើឡើងតាមបញ្ញតិ្ត និងក្បួនយកពន្ធដែលកំណត់ដោយអង្គការពាណិជ្ជកម្មពិភពលោក៕
Tag:
អង់គ្លេស
អឺរ៉ុប
បូរីស ចនសុន
© រក្សាសិទ្ធិដោយ thmeythmey.com