គ្រូបង្វឹកបើគ្រាន់តែបង្ហាត់ ហើយមិនស្វែងរកចំណេះដឹង និងការវិវត្តថ្មីៗមកអនុវត្តបន្ថែម សមត្ថភាពរបស់ពួកគេនឹងមិនអាចរីកចម្រើនឡើយ។ នេះជាការលើកឡើងរបស់លោក ហែម គីរី អគ្គលេខាធិការនៃសហព័ន្ធខ្មែរកីឡាហែលទឹក ក្នុងពិធីបិទវគ្គបណ្តុះបណ្តាលគ្រូបង្វឹកកីឡាហែលទឹកកម្រិតខ្ពស់ កាលពីសប្តាហ៍មុន។
លោក ហែម គីរី អគ្គលេខាធិការនៃសហព័ន្ធខ្មែរកីឡាហែលទឹកយល់ឃើញថា ការអភិវឌ្ឍន៍សមត្ថភាពត្រូវដើរទន្ទឹមគ្នារវាងការសិក្សា និងការអនុវត្តជាក់ស្តែង។ បើខ្វះកត្តាណាមួយក្នុងចំណោមកត្តាទាំងពីរនេះ លោក ជឿជាក់ថា គ្រូបង្វឹកនឹងមិនអាចមានសមត្ថភាពរីកចម្រើន ហើយការបង្វឹករបស់ពួកគេ ក៏ពុំទទួលបានលទ្ធផលល្អផងដែរ។
សម្រាប់លោក គីរី គ្រូបង្វឹកម្នាក់មិនអាចអង្គុយមួយកន្លែង ហើយស្រែកថា ខ្លួនចង់មានការរីកចម្រើនបានទេ ពោលគឺពួកគេត្រូវចេះស្វះស្វែងសិក្សា ស្រាវជ្រាវរកគំនិត និងចំណេះដឹងថ្មីៗ ដើម្បីយកមកអនុវត្ត និងអភិវឌ្ឍន៍សមត្ថភាពបន្ថែមទៀត។ លោកជឿជាក់ថា ការធ្វើបែបនេះជាផ្លូវមួយដ៏ល្អក្នុងអភិវឌ្ឍន៍សមត្ថភាពឲ្យកាន់តែរីកចម្រើន និងប្រកប់ដោយប្រសិទ្ធិភាព។
«យើងអត់អាចនៅមួយកន្លែង ហើយចេះតែចាប់អារម្មណ៍ថា យើងចង់អភិវឌ្ឍន៍ទេ យើងត្រូវធ្វើដំណើរទាំងអស់ ទាំងការបង្ហាត់និងការរៀន។ គ្រូបើគ្រាន់តែបង្ហាត់ ហើយគាត់អត់ស្វែងរកចំណេះដឹងថ្មីៗមកអនុវត្ត ក៏មិនអាចទៅរួចដែរ ព្រោះនៅតាមប្រទេសអភិវឌ្ឍន៍ គេសិក្សាស្រាវជ្រាវ និងធ្វើការតាមអនឡាញ ដូច្នេះយើងត្រូវដើរឲ្យទាន់គេ»។ លោក ហែម គីរី លើកឡើងបែបនេះ ក្រោយបិទវគ្គបណ្តុះបណ្តាលគ្រូបង្វឹកកីឡាហែលទឹកកម្រិតខ្ពស់ ដែលធ្វើឡើងតាមប្រព័ន្ធអនឡាញ កាលពីពេលថ្មីៗ។
ក្រោយឆ្លងកាត់ការបណ្តុះបណ្តាលរយៈពេល៤ថ្ងៃសិក្ខាកាមទាំង១៨រូប ទទួលបានការវាយតម្លៃខ្ពស់ពីថ្នាក់ដឹកនាំសហព័ន្ធ និងគ្រូឧទ្ទេស James Richards ពាក់ព័ន្ធការខិតខំ និងការយល់ដឹងរបស់ពួកគេ។ បើតាមលោក គីរី គ្រូបង្វឹកជនជាតិអង់គ្លេសរូបនេះ បានវាយតម្លៃតាមអនឡាញថា សិក្ខាកាម៩០ភាគរយមានការយកចិត្តទុកដាក់រៀន និងទទួលបានចំណេះដឹងពីលោក។
លោក ហែម គីរី ចាត់ទុកវគ្គបណ្តុះបណ្តាលនេះជាវគ្គបណ្តុះបណ្តាលមួយដ៏សំខាន់ក្នុងការជួយបង្កើនសមត្ថភាពរបស់សិក្ខាកាម ដែលជាគ្រូបង្វឹកមកពីតាមបណ្តាលក្លិប-សមាគមនានានៅរាជធានីភ្នំពេញ និងបណ្តាខេត្ត។ លើសពីនេះ វាជាគន្លឹះជំនួយសា្មរតីក្នុងការរៀបចំ និងស្វែងរកចំណុចអាចទៅរួច និងមិនអាចទៅរួមក្នុងការអភិវឌ្ឍន៍វិស័យកីឡាហែលទឹកនៅកម្ពុជា។
លោកបានបន្ថែមថា៖«ការរៀបចំការផែនការហ្វឹកហាត់ និងការអភិវឌ្ឍន៍កីឡាកររយៈពេលវែង ជាបេះដូង នៃការអភិវឌ្ឍន៍វិស័យកីឡា ក៏ដូចជាកីឡាហែលទឹក។ ការរៀនរយៈពេល៤ថ្ងៃ មានចំណុចពីរនេះ ដែលគួរឲ្យចាប់អារម្មណ៍ខ្ពស់ សិក្ខាកាមមានការសួរ ចោទជាមួយគ្រូបង្វឹក ហើយក៏មានការជជែកវែកញែកគ្នាពីការអភិវឌ្ឍន៍វិស័យកីឡាហែលទឹក ដោយសារការបង្ហាញពីគ្រូឧទ្ទេស គឺគាត់ជាប្រទេសអភិវឌ្ឍន៍»។
វគ្គបណ្តុះបណ្តាលនេះ ធ្វើឡើងតាមប្រព័ន្ធអនឡាញចាប់ពីថ្ងៃទី១-៤ កញ្ញា ឆ្នាំ២០២០ នៅទីស្នាក់ការសហព័ន្ធខ្មែរកីឡាហែលទឹក ដោយមានសិក្ខាកាមចំនួន១៨រូបចូលរួម ហើយពួកគេសុទ្ធសឹងជាគ្រូបង្វឹក ដែលធ្លាប់ឆ្លងកាត់ការបណ្តុះបណ្តាលវគ្គគ្រូបង្វឹកកម្រិតមូលដ្ឋាន និងមធ្យមនាពេលកន្លងទៅ។ ក្នុងចំណោមសិក្ខាកាមទាំងនេះមានសិក្ខាកាមពីររូបមកពីគណៈកម្មាធិការជាតិប៉ារ៉ាឡាំពិកកម្ពុជា៕