ដូចតាមការសន្យាកាលពី៧ខែមុន លោកប្រធានាធិបតី ស៊ី ជិនភីង នៅថ្ងៃទី ៨ ខែកញ្ញានេះ បានប្រកាសថា ចិនទទួលជោគជ័យក្នុងសង្គ្រាមប្រជាជនប្រឆាំងជំងឺរាតត្បាតសកល COVID-19 ។ ក្នុងពិធីប្រគល់មេដាយជូនដល់បុគ្គល៤នាក់មកពីវិស័យវេជ្ជសាស្ត្រ មេដឹកនាំចិនរូបនេះក៏អះអាងថា រដ្ឋាភិបាលក្រុងប៉េកាំង បានចាត់វិធានការឆ្លើយតប COVID-19 ប្រកបដោយតម្លាភាព និងបើកចំហ។
ពិធីប្រគល់មេដាយនៅវិមានប្រជាជនចិន បានចាប់ផ្ដើមជាមួយភាពស្ងប់ស្ងាត់រយៈពេលមួយនាទីពេញ ដើម្បីបង្ហាញក្តីគោរពដល់អ្នកដែលបាត់បង់ជីវិតអំឡុងការផ្ទុះរាលដាលជំងឺ COVID-19។ យោងតាមទិន្នន័យផ្លូវការរបស់រដ្ឋាភិបាលចិន មនុស្ស៤៦៣៦នាក់បានស្លាប់ដោយសារជំងឺនេះក្នុងប្រទេសចិន។
នៅចំពោះមុខអ្នកចូលរួមរាប់រយនាក់ លោកប្រធានាធិបតី ស៊ី ជិនភីង បានប្រកាសថា៖«យើងបានឆ្លងផុតការធ្វើតេស្តជាប្រវត្តិសាស្ត្រនិងមហាអស្ចារ្យ»។ លោកបន្តលើកសរសើរប្រទេសចិនសម្រាប់ការតស៊ូដ៏ក្លាហានប្រឆាំង COVID-19 ។
តាមការចុះផ្សាយរបស់ទីភ្នាក់ងារព័ត៌មាន Reuters លោក ស៊ី សង្កត់ធ្ងន់ក្នុងសុន្ទរកថាដូច្នេះថា៖«យើងបានសម្រេចជោគជ័យយ៉ាងលឿនក្នុងសង្គ្រាមរបស់ប្រជាជនប្រឆាំងជំងឺ COVID-19។ យើងកំពុងដឹកនាំពិភពលោកក្នុងការស្តារសេដ្ឋកិច្ចឡើងវិញ និងក្នុងការប្រយុទ្ធប្រឆាំង COVID-19»។
កាលពីដើមខែកុម្ភៈ អំឡុងពេលចុះត្រួតពិនិត្យដោយកិច្ចការទប់ស្កាត់ និងគ្រប់គ្រងកូរ៉ូណាវីរុសនៅរដ្ឋធានីប៉េកាំង លោក ស៊ី ជិនភីង ធ្លាប់បានអះអាងថា ចិននឹងទទួលជោគជ័យក្នុងសង្គ្រាមរបស់ប្រជាជនប្រឆាំងជំងឺ COVID-19 នៅទីបំផុត។
មែនទែនទៅ ចិនបានទទួលសម្ពាធខ្លាំងពីអន្តរជាតិពាក់ព័ន្ធនឹងការឆ្លើយតបរបស់ខ្លួនប្រឆាំង COVID-19 ដោយទាំងសហរដ្ឋអាមេរិក និងអូស្ត្រាលីបានចោទប្រកាន់រដ្ឋាភិបាលប៉េកាំងថាបានព្យាយាមបិទបាំងប្រភពដើម និងភាពធ្ងន់ធ្ងរនៃជំងឺ COVID-19 ។
ពាក់ព័ន្ធបញ្ហានេះ ក្នុងសុន្ទរកថាដដែល លោកប្រធានាធិបតី ស៊ី ជិនភីង បានអះអាងថា ប្រទេស ចិន បានធ្វើសកម្មភាពក្នុងឥរិយាបថប្រកបដោយតម្លាភាព និងបើកចំហ តាំងពីដើមមក ហើយក៏បានចាត់វិធានការដែលមិនរួញរាដើម្បីជួយជីវិតមនុស្សផងដែរ។ ត្រង់ចំណុចនេះ លោកនិយាយដូច្នេះថា៖«ចិនបានជួយជីវិតមនុស្សរាប់លាននាក់នៅជុំវិញពិភពលោក ហើយនេះបង្ហាញឲ្យឃើញពីភាពចង់បានដោយស្មោះត្រង់របស់ចិនក្នុងការកសាងអនាគតរួមគ្នា និងសហគមន៍សម្រាប់មនុស្សជាតិ»។
បន្ទាប់ពីថ្លែងសុន្ទរកថាចប់ លោក ស៊ី ជិនភីង បានប្រគល់មេដាយមាសទៅឲ្យបុគ្គល៤នាក់មកពីវិស័យវេជ្ជសាស្ត្រ ដែលលោកចាត់ទុកជា «វីរជន» ។ ក្នុងចំណោមអ្នកទាំង៤ គឺមានលោកវេជ្ជបណ្ឌិត Zhong Nanshan ដែលជាអ្នកជំនាញវេជ្ជសាស្ត្រដ៏ល្បីល្បាញបំផុតរបស់ប្រទេសចិន។ គ្រូពេទ្យវ័យ៨៣ឆ្នាំរូបនេះ បានលេចមុខជាប្រមុខដឹកនាំសមរភូមិរបស់ចិនប្រឆាំង COVID-19។
លោក Zhong ត្រូវបានប្រគល់ពានរង្វាន់ថ្នាក់ជាតិកំពូលរបស់ចិន ចំណែកបុគ្គល៣នាក់ទៀតត្រូវបានប្រគល់គោរមងារជា «វីរជនរបស់ប្រជាជន»។ អ្នកទាំងបីគឺមាន អ្នកជំនាញផ្នែកជីវគីមី លោកវេជ្ជបណ្ឌិត Chen Wei ប្រធានមន្ទីរពេទ្យមួយក្នុងទីក្រុងវូហាន និងអ្នកជំនាញឱសថបុរាណចិនវ័យ៧២ឆ្នាំម្នាក់។
យ៉ាងណាមិញ ក្នុងពិធីនេះ ពុំបាននឹកដល់ឈ្មោះរបស់វេជ្ជបណ្ឌិត Li Wenliang នោះឡើយ ។ លោក គ្រូពេទ្យ Li ជាមនុស្សទីមួយដែលបានប្រកាសអាសន្នអំពីការផ្ទុះរាលដាល COVID-19 ហើយក្រោយមកទទួលមរណភាពដោយសារជំងឺនេះ៕