សេដ្ឋកិច្ច
អន្តរជាតិ
សេដ្ឋកិច្ចជប៉ុនបន្តធ្លាក់ចុះខ្លាំងត្រីមាសទី២ ក្លាយជាវិញ្ញាសាពិបាកសម្រាប់នាយករដ្ឋមន្ត្រីថ្មី
រូបភាព AFP
×![]()
ដោយ៖កង ម៉េងហុង
សេដ្ឋកិច្ចប្រទេសជប៉ុនបានធ្លាក់ចុះយ៉ាងលឿនហួសពីការរំពឹងទុកក្នុងត្រីមាសទី២ ដោយសារការចំណាយមូលធន និងប្រាក់ឈ្នួលពលរដ្ឋរងផលប៉ះពាល់ព្រោះជំងឺរាតត្បាតសកលកូវីដ-១៩។ បញ្ហានេះនឹងក្លាយជាវិញ្ញាសាថ្មីដ៏ពិបាកមួយសម្រាប់មេដឹកនាំជប៉ុនថ្មីដែលនឹងជំនួសតំណែងលោក ស៊ីនហ្សូ អាបេ។ 
ទិន្នន័យផ្លូវការមួយរបស់រដ្ឋាភិបាលជប៉ុនចុះថ្ងៃ ៨ ខែកញ្ញា បានបង្ហាញថា សេដ្ឋកិច្ចរដ្ឋអាស៊ីបូព៌ាមួយនេះ ធ្លាក់ចុះ ២៨,១ ភាគរយ ក្នុងចន្លោះខែមេសាដល់ខែមិថុនា។ តួលេខនេះ គឺច្រើនជាងការប៉ាន់ស្មានបឋម ដែលស្មើនឹង ២៧,៨ ភាគរយប៉ុណ្ណោះ។
បើតាមការចុះផ្សាយរបស់ទីភ្នាក់ងារ AFP បញ្ហាប្រឈមដែលបង្អាក់កំណើនសេដ្ឋកិច្ចជប៉ុន គឺការចំណាយនិងប្រាក់ឈ្នួលគ្រួសារជប៉ុននៅតែបន្តធ្លាក់ចុះក្នុងខែកក្កដាដោយសារមេរោគកូវីដ។ រដ្ឋាភិបាលក្រុងតូក្យូបានអះអាង ការធ្លាក់ចុះនេះនៅតែកើតឡើង ថ្វីបើវិធានការរឹតត្បិតក្នុងប្រទេសត្រូវបានបន្ធូរបន្ថយចាប់តាំងកាលពីខែឧសភាក៏ដោយក្តី។
ការដាំក្បាលចុះនៃសេដ្ឋកិច្ចជប៉ុនក្នុងត្រីមាសទី២នេះ នឹងក្លាយជាសម្ពាធកាន់តែធំសម្រាប់នាយករដ្ឋមន្ត្រីជប៉ុនថ្មីដែលនឹងជ្រើសរើសនៅថ្ងៃទី ១៤ ខែកញ្ញាខាងមុខ។ វាប្រាកដណាស់ថា មេដឹកនាំថ្មីត្រូវស្វះស្វែងរកវិធានការចាំបាច់ និងមានប្រសិទ្ធភាពដើម្បីបញ្ឆេះក្បាលម៉ាស៊ីនសេដ្ឋកិច្ចឡើងវិញ។
ហេតុផលចម្បងមួយទៀតដែលធ្វើឲ្យសេដ្ឋកិច្ចជប៉ុនមានបញ្ហានេះ ក៏ដោយសារការធ្លាក់ចុះយ៉ាងគំហុកនៃការចំណាយមូលធនរបស់ជប៉ុន ដោយវាធ្លាក់ចុះរហូតដល់ ៤,៧ ភាគរយក្នុងត្រីមាសទី២នេះ។
ក្រៅពីនេះ ទិន្នន័យដាច់ដោយឡែកមួយទៀត ក៏បានបង្ហាញថា ការចំណាយក្នុងគ្រួសារជប៉ុន បានធ្លាក់ចុះ ៧,៦ ភាគរយក្នុងខែកក្កដា មកត្រឹមតែ ៣,៧ ភាគរយប៉ុណ្ណោះ។ ឯប្រាក់ឈ្នួលរបស់ប្រជាជនជប៉ុន ក៏បានធ្លាក់ចុះក្នុងរយៈពេល ៥ ខែជាប់ៗគ្នាក្នុងខែកក្កដា ដែលនេះជាសូចនាករមួយង្ហាញពីបញ្ហាប្រឈមជាពិសេសការចំណាយត្បិតត្បៀតរបស់ប្រជាជនជប៉ុននោះ។
ដូច្នេះហើយ គេរំពឹងថា អ្នកនឹងបន្តតំណែងជានាយករដ្ឋមន្ត្រីជប៉ុនថ្មីជំនួសលោក អាបេ នឹងត្រូវដោះស្រាយវិញ្ញាសាសេដ្ឋកិច្ចថ្មី និងដ៏លំបាកនេះនៅពេលខាងមុខ។
ក្នុងនាមជាបេក្ខជននាំមុខក្នុងគណបក្សប្រជាធិបតេយ្យសេរី (LDP) លោក យូស៊ីហ៊ីដេ ស៊ូហ្កា (Yoshihide Suga) ដែលបច្ចុប្បន្នមានតំណែងជាប្រធានលេខាធិការគណៈរដ្ឋមន្ត្រីជប៉ុន បានលើក ឡើងពីវិធានការសេដ្ឋកិច្ចដើម្បីជំរុញការចំណាយក្នុងស្រុក និងផ្ដល់សន្ទុះដល់សេដ្ឋកិច្ចប្រទេសដែរ។
អ្នកនយោបាយរូបនេះក៏បានប្តេជ្ញាជំរុញឲ្យមានការផ្លាស់ប្តូររចនាសម្ព័ន្ធដឹកនាំរដ្ឋាភិបាលជប៉ុន ដែលជាឧបសគ្គក្នុងការធានាប្រសិទ្ធភាពការងារថែមទៀតផង។
សូមបញ្ជាក់ថា ការបោះឆ្នោតក្នុងគណបក្សប្រជាធិតេយ្យដែលជាបក្សកាន់អំណាចដើម្បីជ្រើសរើសមេដឹកនាំថ្មី នឹងត្រូវរៀបចំឡើងនៅថ្ងៃទី ១៤ ខែកញ្ញា ហើយសភាជប៉ុនក៏នឹងបោះឆ្នោតជ្រើសរើសនាយករដ្ឋមន្ត្រីថ្មីនៅថ្ងៃទី១៦ ខែកញ្ញា៕
Tag:
ជប៉ុន
សេដ្ឋកិច្ច
© រក្សាសិទ្ធិដោយ thmeythmey.com
