អន្តរជាតិ
តៃវ៉ាន់ ថា យន្តចម្បាំងចិនហោះចូលដែនអាកាសរបស់ខ្លួន យន្តហោះចម្បាំង J-10 របស់ចិន។ រូបភាព៖ military-today
× យន្តហោះចិនជាច្រើនគ្រឿង បានហោះចូលដែនអាកាសនៅភាគខាងត្បូងរបស់តៃវ៉ាន់ នៅថ្ងៃទី៩ ខែកញ្ញា។ ក្រសួងការពារជាតិតៃវ៉ាន់បានបញ្ជាក់បែបនេះ ដោយបន្ថែមថា ខ្លួនក៏បានបញ្ជាឲ្យយន្តហោះទាំងនោះចេញពីដែនអាកាសខ្លួនដែរ បើមិនចង់មានបញ្ហា។
ចិន តែងតែបញ្ជូនយន្តហោះចម្បាំងរបស់ខ្លួនមកក្នុងដែនអាកាសតៃវ៉ាន់។ រដ្ឋាភិបាលក្រុងតៃប៉ិ តែងតែតវ៉ាពីបញ្ហានេះរាល់លើកដែរ។ បើទោះបីជាមានការតវ៉ាច្រើនលើកពីសំណាក់តៃវ៉ាន់មែន ប៉ុន្តែចិននៅតែផ្គើនដាក់តៃវ៉ាន់ដដែល តាមរយៈសកម្មភាពដដែលៗរបស់ខ្លួន។
នៅពេលព្រឹកថ្ងៃទី៩ ខែកញ្ញា យន្តហោះចម្បាំងរបស់ចិនជាច្រើនគ្រឿង បានហោះចូល «តំបន់ដែលអាចឆ្លើយតបបាន» នាភាគខាងត្បូងតៃវ៉ាន់ជាថ្មី ។ ក្រសួងការពារជាតិតៃវ៉ាន់ បានបញ្ជាក់ថា យន្តហោះចម្បាំងទាំងនោះមានប្រភេទ Su-30 និង J-10 តែមិនបញ្ជាក់ចំនួនឡើយ។ ជាមួយនឹងការថ្កោលទោសតៃវ៉ាន់ ចាត់ទុកសកម្មភាពបែបនេះ ជាការចង់បំផ្លាញស្ថិរភាព និងសន្តិភាពក្នុងតំបន់ តាមរយៈសកម្មភាពឯកតោភាគី។
តាមការចុះផ្សាយរបស់សារព័ត៌មាន Liberty Times តៃវ៉ាន់ក៏បានព្រមានឲ្យយន្តហោះចម្បាំងទាំងនោះចាកចេញពីដែនអាកាសរបស់ខ្លួនដែរ។ ក្នុងការហោះហើរចូលដែនអាកាសដែលអាចតបតបានបែបនេះ តៃវ៉ាន់អាចចាត់វិធានការភ្លាមៗ និងសមស្របបំផុត។ ដោយឡែក តៃវ៉ាន់ ក៏បានអំពាវនាវឲ្យប្រជាជនខ្លួន កុំភ្ញាក់ផ្អើលអ្វីឡើយ។
មិនទាន់ដឹងពីមូលហេតុជាក់លាក់ពាក់ព័ន្ធវត្តមានយន្តហោះចម្បាំងហោះចិនចូលដែនអាកាសរបស់តៃវ៉ាន់នៅឡើយទេ ប៉ុន្តែយន្តហោះចម្បាំងចិនទាំងនោះ ទំនងជាផ្នែកមួយនៃសមយុទ្ធយោធារបស់ចិន ដែលកំពុងធ្វើនៅភាគខាងត្បូងនៃសមុទ្រលឿងនៅថ្ងៃទី៩ ខែកញ្ញា។
ថ្មីៗនេះ តៃវ៉ាន់ ក៏បានធ្វើសមយុទ្ធយោធានៅឆ្នេរភាគខាងត្បូង និងខាងកើតរបស់ខ្លួន ដើម្បីការពារការវាយប្រហារមកពីខាងក្រៅ។ ចំណែកចិនវិញ ក៏បានធ្វើសមយុទ្ធយោធានៅច្រកសមុទ្រតៃវ៉ាន់ផងដែរ ដើម្បីបញ្ចេញសាច់ដុំរបស់ខ្លួន នៅខែសីហាកន្លងទៅដែរ។
សូមបញ្ជាក់ថា នៅថ្ងៃទី៨ ខែកញ្ញា លោកស្រីប្រធានាធិបតី Tsai Ing-wen បានអំពាវនាវឲ្យប្រទេសសម្ព័ន្ធមិត្តកាន់របបប្រជាធិបតេយ្យ ប្រឆាំងសកម្មភាពអុងអាត់របស់ប្រទេសមួយចំនួន និងការពារសេរីភាពនៅក្នុងតំបន់។ ការលើកឡើងរបស់មេដឹកនាំតៃវ៉ាន់បែបនេះ ទំនងជាសំដៅដល់ទីក្រុងប៉េកាំង ដែលបានបង្កើនសកម្មភាពយោធារបស់ខ្លួនយ៉ាងខ្លាំងនៅក្នុងតំបន់សមុទ្រចិនខាងត្បូង សមុទ្រចិនខាងកើត និងច្រកសមុទ្រតៃវ៉ាន់៕
© រក្សាសិទ្ធិដោយ thmeythmey.com