COVID-19
កីឡាអន្តរជាតិ
អន្តរជាតិ
ប្រធានសហព័ន្ធក្លិបអឺរ៉ុប ព្យាករថា ក្លិបនឹងធ្លាក់ចំណូលជាង៤ពាន់លានដុល្លារនៅ២ឆ្នាំខាងមុខ ដោយសារវិបត្តិកូវីដ-១៩ រូបពីTwitter UEFA
× វិស័យបាល់ទាត់នៅអឺរ៉ុប នឹងបន្តស្ថិតនៅក្រោមវិបត្តិគ្រប់គ្រងសេដ្ឋកិច្ច ដោយសារការធ្លាក់ចុះចំណូល ព្រោះតែការរីករាលដាលនៃជំងឺកូវីដ-១៩ នៅក្នុងរយៈពេល២ទៅ៣ ឆ្នាំទៀត។ នេះជាការលើកឡើងរបស់លោក Andrea Agnelli ប្រធានសហព័ន្ធក្លិបបាល់ទាត់អឺរ៉ុប ដែលព្រមានពីហានិភ័យធ្លាក់ចុះចំណូលធ្ងន់ធ្ងរដោយសារវិបត្តិកូវីដ-១៩។
មូលហេតុដែលលោក Andrea Agnelli លើកឡើងបែបនេះ ដោយសារមើលឃើញពីប្រាក់ចំណូលធ្លាក់ចុះនៅក្នុងអំឡុងពេលការប្រកួតបិទបញ្ចប់រដូវកាល នៃការរីករាលដាលជំងឺកូវីដ-១៩។ ត្រង់ចំណុចនេះលោក Agnelli បានសង្កត់ធ្ងន់ថា ការបាត់បង់អ្នកគាំទ្រទស្សនាបាល់ទាត់ ដែលជាប្រភពចំណូលយ៉ាងសំខាន់ ,ការធ្លាក់ចុះចំណូលពីការឧបត្ថម្ភ (Sponsorship) និងការធ្លាក់ចុះតម្លៃទីផ្សារទិញដូរកីឡាករ ពី២០ទៅ៣០ភាគរយ សុទ្ធសឹងតែជាមូលហេតុដែលធ្វើឱ្យក្លិបនីមួយៗជួបប្រទះវិបត្តិ។ លោក Agnelli ក៏បានវាតម្លៃថា ចំណូលរបស់ក្លិបនៅលីគធំៗទាំងអស់ នឹងធ្លាក់ចុះក្នុងរង្វង់៤ពាន់លានអឺរ៉ូ (៤៧០៧លានដុល្លារ) ក្នុងរយៈពេលជាង២ឆ្នាំខាងមុខទៀត។
ប្រធានសហព័ន្ធក្លិបបាល់ទាត់អឺរ៉ុប និងជាប្រធានក្លិបសេះបង្កង Juventus រូបនេះ ត្រូវបានសារព័ត៌មាន Channel News Asia ស្រង់សម្តីដូច្នេះថា៖«យើង(ក្លឹបអឺរ៉ុប) កំពុងសម្លឹងមើលការធ្លាក់ចុះប្រាក់ចំណូលប្រហែល ៤ ពាន់លានអឺរ៉ូ ក្នុងរយៈពេល ២ ឆ្នាំខាងមុខ» ។
ខណៈកំពុងជួបបញ្ហាវិបត្តិចំណូល ដោយសារការរាតត្បាតនៃជំងឺកូវីដ-១៩នេះ សហព័ន្ធ ក៏ត្រៀមប្រាក់បង្វិលសងទៅប្រព័ន្ធផ្សព្វផ្សាយ សម្រាប់ការប្រកួត Champions League និង Europa League ដែលមានទឹកប្រាក់៥៧៥លានអឺរ៉ុប ( ស្មើ៦៧៨លានដុល្លារអាមេរិក) ដែរ។ នេះបើតាមលោក Andrea Agnelli។
លោក Andrea Agnelli បានបន្ថែមថា៖«យើងបានឃើញហើយ ពីចំណុចសំខាន់នៃការបង្វិលប្រាក់សងចាងហ្វាងផ្សព្វផ្សាយទាំងក្នុងស្រុក និងក្រៅស្រុក។ យើងក៏បានឃើញដែរ ពីការបង្វិលប្រាក់ទៅក្របខណ្ឌ Premier League ចំនួន៣៣០លានផោន(៤៣០លានដុល្លារអាមេរិក) និងការធ្លាក់ចុះចំណូលនៃការផ្សព្វផ្សាយ នៅក្របខណ្ឌ Bundesliga របស់អាល្លឺម៉ង ដែលមានទឹកប្រាក់២០០លានអឺរ៉ូ (២៣៥លានដុល្លារអាមេរិក) ។ហើយយើងក៏កំពុងបិទបញ្ជីគណនី UEFA ជាមួយការចំណាយប្រហែល៥៧៥លានអឺរ៉ូ (ស្មើ៦៧៨លានដុល្លារអាមេរិក) សម្រាប់ការប្រកួតក្លិបអន្តរជាតិផ្សេងៗ ។នេះជាទំហំទឹកប្រាក់ដុល»។
ចំពោះការពិភាក្សាជុំវិញការផ្លាស់ប្តូរទ្រង់ទ្រាយនៃការប្រកួតក្លឹបនៅអឺរ៉ុប ជាមួយភាគីមេដឹកនាំនៅក្នុងលីគតំបន់អឺរ៉ុបផ្សេងទៀត ត្រូវបានជាប់គាំង នៅក្នុងបរិបទ«គ្រប់គ្រងវិបត្តិសេដ្ឋកិច្ច»នេះ ។នេះបើតាមលោក Andrea Agnelli ដែលអំពាវនាវឱ្យមានភាគីពាក់ព័ន្ធ រួមគ្នាកែប្រែការប្រកួតអន្តរជាតិ និងរបៀបធ្វើឱ្យក្លិបនីមួយៗមានភាពប្រសើរឡើង ចាប់ពីឆ្នាំ២០២៤ទៅ ដើម្បីអាចទទួលបានចំណូលដ៏ល្អបំផុតមួយ ក្រោយពីវិបត្តិកូវីដ-១៩។
«យើងនឹងត្រូវការស្ដារឡើងវិញ មុននឹងយើងអាចទទួលបានដំណោះស្រាយសមរម្យនូវអ្វីដែលយើងចង់បាននៅក្នុងអនាគត។ យើងចាំបាច់ត្រូវការយោគយល់គ្នាដោយការផ្លាស់ប្តូរដោយស្មើភាពគ្នា នូវអ្វីដែលជាផលប្រយោជន៍នៃផ្នែកសេដ្ឋកិច្ចសម្រាប់ក្លិប ក្រោយវិបត្តិកូវីដ-១៩»។ នេះជាការបញ្ជាក់របស់ប្រធានសហព័ន្ធក្លិបបាល់ទាត់អឺរ៉ុប៕
© រក្សាសិទ្ធិដោយ thmeythmey.com