សង្គមអន្តរជាតិ
អន្តរជាតិ
លោក ប៉ុមប៉េអូ ប្រាប់អាស៊ានឲ្យឈប់រកស៊ីជាមួយក្រុមហ៊ុនចិនដែលរងទណ្ឌកម្មអាមេរិក
កិច្ចប្រជុំថ្នាក់រដ្ឋមន្រ្តីការបរទេសអាស៊ាន-អាមេរិក នៅថ្ងៃទី១០ ខែកញ្ញា ឆ្នាំ២០២០។ រូបភាព៖ ក្រសួងការបរទេសកម្ពុជា
×![]()
ដោយ: ធៀន ភារិន្ទ
ប្រមុខការទូតអាមេរិក លោក ម៉ៃ ប៉ុមប៉េអូ នៅថ្ងៃទី១០ ខែកញ្ញា បានជំរុញបណ្តាប្រទេសអាស៊ានបញ្ឈប់ការរកស៊ីជាមួយក្រុមហ៊ុនចិន ដែលបានចូលរួមជួយចិនធ្វើយោធូបនីយកម្ម និងការកសាងកោះសិប្បនិម្មិតនៅក្នុងសមុទ្រចិនខាងត្បូង។ ក្រុមហ៊ុនទាំងនេះ ត្រូវបានអាមេរិកដាក់ទណ្ឌកម្មផងដែរ។
ថ្មីៗនេះ អាមេរិក បានដាក់ទណ្ឌកម្មលើក្រុមហ៊ុនចិនចំនួន២៤ ក្រោមហេតុផលថា ក្រុមហ៊ុនចិនទាំងនោះ គឺបានជួយសម្រួលដល់យោធាចិន ធ្វើយោធូបនីយកម្ម និងសាងសង់កោះសិប្បនិម្មិតនៅក្នុងសមុទ្រចិនខាងត្បូង។ អាមេរិក ក៏បានលើកឡើងពីបញ្ហាក្រុមហ៊ុនចិនដែរនៅក្នុងកិច្ចប្រជុំរដ្ឋមន្ត្រីការបរទេសអាស៊ាន ដែលសមុទ្រចិនខាងត្បូងជារបៀបសំខាន់មួយ។
ថ្លែងនៅក្នុងកិច្ចប្រជុំរដ្ឋមន្ត្រីការបរទេសអាស៊ាន-អាមេរិកនៅថ្ងៃទី១០ ខែកញ្ញា លោក ម៉ៃ ប៉ុមប៉េអូ រដ្ឋមន្ត្រីការបរទេសអាមេរិក បានទទូចឲ្យរដ្ឋាភិបាលនៃបណ្តាប្រទេសអាស៊ានគិតគូរពីបញ្ហារកស៊ីជាមួយក្រុមហ៊ុនចិន ដែលមានជាប់ពាក់ព័ន្ធជាមួយសមុទ្រចិនខាងត្បូង។
«ពិចារណាឡើងវិញលើការធ្វើជំនួញជាមួយក្រុមហ៊ុនរដ្ឋចិន ដែលគំរាមបណ្តាប្រទេសអាស៊ានមួយចំនួន ក្នុងសមុទ្រចិនខាងត្បូង»។ ប្រមុខការទូតអាមេរិក បានលើកឡើងបែបនេះ ដោយបន្ថែមយ៉ាងដូច្នេះថា៖ «កុំអនុញ្ញាតឲ្យបក្សកុម្មុយនិស្តចិនដើរពីលើយើង និងប្រជាជនយើង»។
ការលើកឡើងរបស់លោក ប៉ុមប៉េអូ ធ្វើឡើងបន្ទាប់ពីរដ្ឋមន្ត្រីការបរទេសចិន បានប្រាប់អាស៊ានថា អាមេរិកគឺជាអ្នកធ្វើយោធូបនីយកម្មដ៏ធំជាងគេបង្អស់នៅក្នុងសមុទ្រចិនខាងត្បូង។ ក្នុងកិច្ចប្រជុំខាងលើ រដ្ឋមន្ត្រីការបរទេសអាមេរិក ក៏បាន ទទូចឲ្យប្រទេសអាស៊ានបញ្ចេញសកម្មភាពរបស់ខ្លួនប្រឆាំងនឹងចិនខ្លះផង និងកុំសូវនិយាយច្រើនពេក។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
សូមបញ្ជាក់ថា អាមេរិក និងចិន បានយកវេទិការដ្ឋមន្ត្រីការបរទេសអាស៊ានលើកនេះ ដើម្បីចោទគ្នាទៅវិញទៅមកជុំវិញបញ្ហាសមុទ្រចិនខាងត្បូង ការប្រជែងឥទ្ធិពលគ្នា និងបានរិះគន់គ្នាទៅវិញទៅមក៕
Tag:
អាមេរិក
អាស៊ាន
ចិន
© រក្សាសិទ្ធិដោយ thmeythmey.com
