សែ​ល​កាត ចាប់​ដៃគូ​សហការ​ជាមួយ​សហព័ន្ធ​កីឡាបាល់ទាត់​កម្ពុជា នៅក្នុង​ការប្រកួត​បាល់​ទាត់​ពានរង្វាន់​ជម្រើស​ជើងឯក​យុវជន ប្រចាំឆ្នាំ​២០២០
អត្ថបទពាណិជ្ជកម្ម
សែ​ល​កាត ចាប់​ដៃគូ​សហការ​ជាមួយ​សហព័ន្ធ​កីឡាបាល់ទាត់​កម្ពុជា នៅក្នុង​ការប្រកួត​បាល់​ទាត់​ពានរង្វាន់​ជម្រើស​ជើងឯក​យុវជន ប្រចាំឆ្នាំ​២០២០
11, Sep 2020 , 10:37 am        
រូបភាព
ដោយ: ថ្មីៗ
​ការប្រកួត​បាល់ទាត់​ពា​ន​រង្វាន់​ជម្រើស​ជើងឯក​យុវជន​អាយុ​ក្រោម ១៦​ឆ្នាំ និង​១៨​ឆ្នាំ វគ្គ​ផ្តាច់ព្រ័ត្រ របស់​សហព័ន្ធ​កីឡាបាល់ទាត់​កម្ពុជា បាន​ប្រព្រឹត្តទៅ នា​ថ្ងៃ​ចុង​សប្តាហ៍​កន្លងទៅនេះ ក្នុង​ខេត្តកំពង់ឆ្នាំង ក្រោម​កិច្ចសហការ​ជា​ដៃគូ​ជាមួយ ក្រុមហ៊ុន​សែ​ល​កាត​។

​កម្មវិធី​នេះ គឺជា​ផ្នែក​មួយ​នៃ​ការប្តេជ្ញាចិត្ត​របស់​ក្រុមហ៊ុន​សែ​ល​កាត ក្នុង​ការជួយ​អភិវឌ្ឍ ក៏ដូចជា​ស្វែងរក នូវ​កីឡាករ​ដែលមាន​ទេពកោសល្យ​នៅក្នុង​ស្រុក ដើម្បី​ត្រៀមខ្លួន​សម្រាប់​ចូលរួម​ប្រកួត នៅក្នុង​ព្រឹត្តិការណ៍​ស៊ី​ហ្គេម​ឆ្នាំ​២០២៣ ដែល​ប្រទេស​កម្ពុជា ធ្វើជា​ម្ចាស់ផ្ទះ​ជា​លើកដំបូង​។ លោក សៅ សុខា ប្រធាន​សហព័ន្ធ​កីឡាបាល់ទាត់​កម្ពុជា ក៏បាន​អញ្ជើញ​ចូលរួម​ជា​អធិបតីភាព នៅក្នុង​ការប្រកួត​វគ្គ​ផ្តាច់ព្រ័ត្រ​នេះ​ផងដែរ​។ 
 
​លោក អៀន វ៉ាត​សុន (Ian Watson) នាយក​ប្រតិបត្តិ​ក្រុមហ៊ុន​សែ​ល​កាត បាន​មានប្រសាសន៍ថា សែ​ល​កាត តែង​ចូលរួម​ជួយ​គាំទ្រ​ដល់​សហព័ន្ធ​កីឡាបាល់ទាត់​កម្ពុជា តាំងតែ​ពី​ដើម​មក ដោយ​ក្នុងនោះ ក្រុមហ៊ុន​បាន​ចូលរួម​សហការ ដើម្បី​ស្វែងរក​កីឡាករ​ដែលមាន​ទេពកោសល្យ​ល្អៗ ក៏ដូចជា​ចូលរួម​លើកទឹកចិត្ត​ដល់​យុវជន​នៅ​ទូទាំងប្រទេស ឱ្យ​ប្រកាន់ខ្ជាប់​នូវ​ទម្លាប់​រស់នៅ​ដែល​សកម្ម ដើម្បី​ជា​ប្រយោជន៍​ដល់​ផ្នែក​សុខភាព​របស់​ពួកគេ​ផងដែរ​។ 


 
​លោក អៀន វ៉ាត​សុន បន្តទៀតថា​៖«​គំនិត​ផ្តួចផ្តើម ដែល​រៀបចំឡើង​នៅ​ទូទាំងប្រទេស​នេះ បាន​ដំណើរការ​រយៈពេល​៣​ឆ្នាំ​មកហើយ ហើយ​យើង​នៅតែ​បន្ត ជួយ​លើកកម្ពស់​មោទកភាព​ជាតិ និង​ផ្តល់នូវ​អត្ថប្រយោជន៍​ជាច្រើន​ទៀត ដល់​យុវជន​ខ្មែរ និង​សហគមន៍​មូលដ្ឋាន​។ យើង​សង្ឃឹមថា នឹង​បានឃើញ​ប្រទេស​កម្ពុជា ទទួលបាន​ជោគជ័យ​នៅក្នុង​ព្រឹត្តិការណ៍​ស៊ី​ហ្គេម ហើយ​ទន្ទឹមនឹងនោះ យើង​ក៏​នៅតែ​ប្តេជ្ញាចិត្ត​ចូលរួម​គាំទ្រ​ដល់​បុព្វ​ហេតុនេះ ដោយ​ឥត​រាថយ​នោះឡើយ​» ។ 
 
​ក្រុមបាល់ទាត់​យុវជន ដែល​បាន​ចូលរួម​នៅក្នុង​ការប្រកួត កាលពី​ចុង​សប្តាហ៍​កន្លងទៅនេះ គឺមាន​ក្រុម U16 របស់​ខេត្តបន្ទាយមានជ័យ ដែល​ក្រុម​នេះ​បានទទួល​ជ័យជម្នះ​លើ​ក្រុម U16 របស់​ខេត្ត​ឧ​ត្ត​រ​មានជ័យ ពោលគឺ​ដណ្តើមបាន​នូវ​តំណែង​ចំណាត់ថ្នាក់​លេខ ៣ ។ សម្រាប់​ជ័យជម្នះ នៅក្នុង​វគ្គ​ផ្តាច់ព្រ័ត្រ​នៃ​ការប្រកួត​បាល់ទាត់​ពាន​រង្វាន់​ជម្រើស​ជើងឯក​យុវជន​អាយុ​ក្រោម ១៦​ឆ្នាំ គឺ​បាន​ទៅលើ​ក្រុម វិសាខា អេ​ហ្វ​ស៊ី បន្ទាប់ពី​ពួកគេ​បាន​ផ្តួល​ក្រុម នគររាជ អេ​ហ្វេ​ស៊ី Norkor Reach FC ដើម្បី​ក្លាយជា​ជើងឯក​ប្រចាំឆ្នាំ ២០២០​។​

 
​រីឯ​ការប្រកួត​ផ្តាច់ព្រ័ត្រ យុវជន​អាយុ​ក្រោម ១៨​ឆ្នាំ​វិញ ក្រុម​ខេត្តស្ទឹងត្រែង បានទទួល​ចំណាត់ថ្នាក់​លេខ​៣  បន្ទាប់ពី​បាន​យកឈ្នះ​លើ​ក្រុម​ខេត្តក្រចេះ​។ សម្រាប់​ព្រឹត្តិការណ៍​សំខាន់ ក្លិប​ភ្នំពេញ​ក្រោ​ន ត្រូវ​ជួប​ជាមួយនឹង​ក្រុម វិសាខា នៅក្នុង​វគ្គ​ផ្តាច់ព្រ័ត្រ ដោយ​លទ្ធផល​ចុងក្រោយ ក្រុមបាល់ទាត់​ភ្នំពេញ​ក្រោ​ន បានទទួល​ជ័យជម្នះ និង​ក្លាយជា​ម្ចាស់​ជើងឯក ការប្រកួត​បាល់ទាត់​ពា​ន​រង្វាន់​ជម្រើស​ជើងឯក​យុវជន​អាយុ​ក្រោម ១៨​ឆ្នាំ​។​
 
​បន្ទាប់ពី​ការប្រកួត​ផ្តាច់ព្រ័ត្រ​ត្រូវបាន​បញ្ចប់ទៅ ពិធី​បិទ​ការប្រកួត ក៏ត្រូវ​បានរៀបចំ​ឡើង​ក្រោម​អធិបតីភាព​របស់​ភ្ញៀវកិត្តិយស ដើម្បី​ថ្លែងអំណរគុណ ក៏ដូចជា​សម្តែង​នូវ​ការអបអរសាទរ​ចំពោះ​កិច្ចខិតខំ​ប្រឹងប្រែង​រប​ស់​កីឡាករ​ទាំងអស់ ដែល​បាន​ចូលរួម​នៅក្នុង​កម្មវិធី​។ 
 
​ការប្រកួត​ផ្តាច់ព្រ័ត្រ​ទាំងអស់ ត្រូវបាន​ផ្សាយ​ផ្ទាល់ ទាំង​នៅលើ​ទំព័រ​ហ្វេ​ស​ប៊ុ​ក​របស់​ក្រុមហ៊ុន​សែ​ល​កាត និង​សហព័ន្ធ​កីឡាបាល់ទាត់​កម្ពុជា​។ ទន្ទឹមនឹងនោះ អ្នកគាំទ្រ ក៏​អាច​ទស្សនា​ការប្រកួត​វគ្គ​ផ្តាច់ព្រ័ត្រ យុវជន​អាយុ​ក្រោម ១៨​ឆ្នាំ នៅលើ​កញ្ចក់​ទូរទស្សន៍ប៉ុស្តិ៍​បាយ័ន​ផងដែរ​៕
 




(​អត្ថបទ​ពាណិជ្ជកម្ម​)
 

© រក្សាសិទ្ធិដោយ thmeythmey.com