សង្គមអន្តរជាតិ
អន្តរជាតិ
ក្រសួងការពារជាតិតៃវ៉ាន់៖ តៃវ៉ាន់ ត្រូវតែត្រៀមខ្លួនឲ្យរួចរាល់ក្នុងការធ្វើសង្គ្រាមជាមួយចិន លោក Yeh Kuo-hui អនុប្រធាននាយកដ្ឋានគម្រោង និងប្រតិបត្តិការ របស់ក្រសួងការពារជាតិតៃវ៉ាន់។ រូបភាព៖ Reuters
× តៃវ៉ាន់ ត្រូវតែត្រៀមខ្លួនឲ្យបានរួចរាល់ ក្នុងការធ្វើសង្គ្រាមជាមួយចិន។ លោក Yeh Kuo-hui អនុប្រធាននាយកដ្ឋានគម្រោង និងប្រតិបត្តិការនៃក្រសួងការពារជាតិតៃវ៉ាន់ បានលើកឡើងបែបនេះ នៅថ្ងៃទី១០ ខែកញ្ញា។ លោក Yeh និយាយបែបនេះ បន្ទាប់ពីចិនបានធ្វើសមយុទ្ធកងទ័ពជើងទឹកនៅក្បែរឆ្នេរភាគនិរតី និងបញ្ជូនយន្តហោះចម្បាំងហោះចូលដែនអាកាសរបស់តៃវ៉ាន់ពេលពីរថ្ងៃជាប់គ្នា។
តៃវ៉ាន់ បានរាយការណ៍ថា ចិនបានធ្វើសមយុទ្ធកងទ័ពជើងទឹក និងអាកាស នៅក្បែរឆ្នេរភាគនិរតីរបស់ខ្លួន ដែលសកម្មភាពនេះ ទីក្រុងតៃប៉ិបានចាត់ទុកថា គឺជាសកម្មភាពគំរាមរបស់ចិន ដើម្បីឲ្យតៃវ៉ាន់ទទួលយកច្បាប់ ឬតាមសំណើរបស់ចិន ក្នុងការបង្រួបបង្រួមប្រទេស។ សមយុទ្ធយោធានេះ បានធ្វើឡើងនៅចន្លោះកោះតៃវ៉ាន់ និងប្រជុំកោះ Pratas ដែលស្ថិតក្រោមការគ្រប់គ្រង់របស់តៃវ៉ាន់ផងដែរ។
នៅក្នុងសន្និសីទសារព័ត៌មានបន្ទាន់មួយនៅថ្ងៃទី១០ ខែកញ្ញា លោកYeh Kuo-hui អនុប្រធាននាយកដ្ឋានគម្រោង និងប្រតិបត្តិការនៃក្រសួងការពារជាតិតៃវ៉ាន់ បានលើកឡើងយ៉ាងដូច្នេះថា៖«យើងត្រូវតែរៀបចំឲ្យបានគ្រប់គ្រាន់ទាំងអស់ ដើម្បីរួចរាល់ក្នុងការធ្វើសង្គ្រាម»។ ការលើកឡើងរបស់លោកYeh បែបនេះ ធ្វើឡើងបន្ទាប់ពីយន្តហោះចម្បាំងចិនប្រភេទ Su-30 និងJ-10 ជាច្រើនគ្រឿង បានហោះចូលក្នុងដែនអាកាសរបស់តៃវ៉ាន់២ថ្ងៃជាប់គ្នា។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ក្នុងសន្និសីទសារព័ត៌មានដដែលនេះ អនុប្រធាននាយកដ្ឋានគម្រោង និងប្រតិបត្តិការ ក៏បានទទូចឲ្យចិនគ្រប់គ្រងកងទ័ពរបស់ខ្លួនឲ្យបានត្រឹមត្រូវផងដែរ ដើម្បីបញ្ចៀសការប៉ះទង្គិចណាមួយ ជាពិសេសគឺយន្តហោះចម្បាំងរបស់ចិន ដែលហោះចូលតំបន់ឆ្លើយតបរបស់តៃវ៉ាន់។
សមយុទ្ធយោធារបស់ចិន កំពុងគំរាមកំហែងស្ថិរភាពក្នុងតំបន់ និងបង្កគ្រោះថ្នាក់ដល់ការហោះហើរអន្តរជាតិ។ លោក Yeh បានយល់ឃើញបែបនេះ និងប្រាប់ទៅចិនថា៖ «យើងសូមនិយាយម្តងទៀត កុំមើលស្រាលការប្តេជ្ញារបស់យោធាតៃវ៉ាន់ក្នុងការការពារទឹកដី។ យើងជឿជាក់ និងអាចការពារប្រទេសរបស់យើង»។
តៃវ៉ាន់ ក៏បានចែករំលែកព័ត៌មាននេះជាមួយសម្ព័ន្ធមិត្តរបស់ខ្លួនផងដែរ។ អាមេរិក ទំនងជាប្រទេសដែលតៃវ៉ាន់ផ្ដល់ព័ត៌មានលើសកម្មភាពយោធារបស់ចិន។ ពាក់ព័ន្ធរឿងនេះ មន្ទីរបញ្ចកោណអាមេរិក បានអះអាងថា ខ្លួនបានតាមដានសមយុទ្ធយោធានេះយ៉ាងម៉ត់ចត់។
មួយរយៈចុងក្រោយនេះ ចិនបានបង្កើនការធ្វើសមយុទ្ធយោធាលើទឹកយ៉ាងខ្លាំងបំផុត។ បន្ទាប់ពីធ្វើសមយុទ្ធយោធានៅក្នុងសមុទ្រចិនខាងត្បូងនៅក្នុងខែសីហាកន្លងទៅ ចិនបានធ្វើសមយុទ្ធនៅក្នុងសមុទ្រ Bohai នៅថ្ងៃទី៧ ខែកញ្ញា និងនៅភាគខាងត្បូងនៃសមុទ្រលឿង នៅថ្ងៃទី៨ និង៩ ខែកញ្ញា។ សមយុទ្ធយោធាចុងក្រោយ គឺនៅក្បែរឆ្នេរភាគនិរតីរបស់តៃវ៉ាន់នេះ៕
© រក្សាសិទ្ធិដោយ thmeythmey.com