COVID-19
អន្តរជាតិ
នូវែលសេឡង់ នឹងលើកចោលបម្រាមរឹតត្បិតនៅថ្ងៃទី២១ ខែកញ្ញា លោកស្រី ចាស៊ីនដា អាឌើន នាយករដ្ឋមន្រ្តីនូវែលសេឡង់។ រូបភាព៖ AFP
× នាយករដ្ឋមន្ត្រី លោកស្រីចាស៊ីនដា អាឌើន (Jacinda Ardern) នៅថ្ងៃទី១៤ ខែកញ្ញា បានលើកឡើងថា នូវែលសេឡង់ នឹងលើកចោលការរឹតត្បិតនៅទូទាំងប្រទេសត្រឹមថ្ងៃទី២១ ខែកញ្ញាខាងមុខ ប៉ុន្តែទីក្រុង Auckland ដែលជាកន្លែងផ្ទុះCOVID-19 ចុងក្រោយ នៅតែបន្តស្ថិតក្រោមការរឹតត្បិតដដែល។
ទីក្រុង Auckland ត្រូវបានរាយការណ៍ថាគឺជាកន្លែងផ្ទុះCOVID-19 ចុងក្រោយរបស់នូវែលសេឡង់។ ករណីផ្ទុះដំបូង នៅក្នុងទីក្រុងមួយនេះ មិនទាន់ត្រូវបានគេរកឃើញប្រភពចម្លងនៅឡើយទេ បើទោះបីជាអាជ្ញាធរសុខាភិបាល បានដាក់ការសង្ស័យលើឃ្លាំងក្លាសេមួយកន្លែងក៏ដោយ។ ជាមួយវិធានការរឹតត្បិត និងទប់ស្កាត់COVID-19 នូវែលសេឡង់ បានទប់ស្កាត់COVID-19 បានល្អប្រសើរនៅក្នុងប្រទេស។
ដោយមានករណីឆ្លងបានធ្លាក់ចុះមកក្នុងចំនួនតិចតួច ដែលមានករណីឆ្លង មួយ ឬពីរករណីក្នុងមួយថ្ងៃ នូវែលសេឡង់ បានសម្រេចលើកចោល ការរឹតត្បិតនៅក្នុងប្រទេស នាថ្ងៃទី២១ ខែកញ្ញាខាងមុខ។ បើតាមការអះអាងរបស់លោកស្រីនាយករដ្ឋមន្ត្រី ចាស៊ីនដា អាឌើន នូវែលសេឡង់សម្រេចលុបចោលការរឹតត្បិត ការរក្សាគម្លាតលើយន្តហោះ និងមធ្យោបាយដឹកជញ្ជូនសាធារណៈទាំងអស់នៅក្នុងប្រទេស។ ចំណែកទីក្រុងAuckland រដ្ឋាភិបាលនឹងពិចារណា នៅសប្តាហ៍ក្រោយ។
នៅថ្ងៃចុងសប្តាហ៍កន្លងទៅ មនុស្សជាច្រើនពាន់នាក់នៅក្នុងទីក្រុងAuckland បានជួបប្រជុំគ្នា ដើម្បីប្រឆាំងនឹងវិធានការរឹតត្បិតរបស់រដ្ឋាភិបាល ដោយក្រុមតវ៉ាមិនបានគោរពវិធានការរក្សាគម្លាត ឬការពាក់ម៉ាស់អ្វីឡើយ។ «យើងនៅកន្លែងនេះ ក្នុងថ្ងៃនេះ ដោយសារយើងជឿថា យើងត្រូវការក្រោកឈរទាមទារ សិទ្ធិរបស់ពួកយើង»។ នេះបើតាមការអះអាងរបស់ Jami-Lee Ross អ្នករៀបចំឲ្យមានការតវ៉ាម្នាក់ និងជាមេដឹកនាំរបស់បក្សនូវែលសេឡង់ចម្រើនទៅមុខ (Advance New Zealand party)។
សូមបញ្ជាក់ថា គិតមកត្រឹមថ្ងៃទី១៤ ខែកញ្ញា នូវែលសេឡង់ មានករណីឆ្លង COVID-19 សរុបចំនួន ១៧៩៨ករណី អ្នកស្លាប់មានចំនួន ២៤នាក់ ខណៈអ្នកជាសះស្បើយមានចំនួន ១៦៧៨នាក់៕
© រក្សាសិទ្ធិដោយ thmeythmey.com