ច្បាប់ / សិទិ្ធមនុស្ស / តុលាការ
ជាតិ
ពលរដ្ឋខ្មែរមួយចំនួននៅបារាំង មានទាំងលោក សម រង្ស៊ី ផងដែរ ទាមទារឲ្យដោះលែងលោក រ៉ុង ឈុន និងសកម្មជនដទៃទៀត
×![]()
ដោយ: សារព័ត៌មានថ្មីៗ
ប្រជាពលរដ្ឋខ្មែរមួយចំនួន ដោយមានទាំងលោក សម រង្ស៊ី មេដឹកនាំក្រុមប្រឆាំងផងដែរ បានទៅកាន់បិណ្ឌក្នុងវត្តខ្មែរមួយ នៅប្រទេសបារាំង កាលពីថ្ងៃទី១៣ ខែកញ្ញា ឆ្នាំ២០២០។ ក្រៅពីធ្វើបុណ្យរួមគ្នា ពួកគាត់ ប្រមូលផ្តុំគ្នាក្នុងវត្តនោះ ហើយទាមទាររដ្ឋអំណាចកម្ពុជា ឲ្យដោះលែងលោក រ៉ុង ឈុន មេសហជីព និងអ្នកផ្សេងទៀត ដែលពួកគាត់ ចាត់ទុកថា ជាអ្នកទោសមនសិការ។ 
ក្នុងដៃពួកគាត់ គឺមានកាន់រូបថតលោក រ៉ុង ឈុន និងរូបថតមនុស្សផ្សេងទៀត ដូចជា លោក សួង សុភ័ណ្ឌ ប្រធានគណបក្សខ្មែរឈ្នះ យុវជន ហ៊ុន វណ្ណៈ និង យុវតី ឈឿន ដារ៉ាវី ជាដើម ដែលកំពុងជាប់ឃុំនៅកម្ពុជា។ ពួកគាត់ ស្រែកព្រមៗគ្នាថា៖«ដោះលែង រ៉ុង ឈុន! ដោះលែង រ៉ុង ឈុន! ដោះលែងអ្នកទោសមនសិការ! ដោះលែងអ្នកទោសមនសិការ!»។
បុរសម្នាក់ បាននិយាយថា ខ្លួន និងប្រជាពលរដ្ឋខ្មែរនៅក្រៅស្រុក ទាមទារឲ្យមានការគោរពសិទ្ធិប្រជាពលរដ្ឋនិងសន្ធិសញ្ញាសន្តិភាពទីក្រុងប៉ារីស។ បុរសនោះ ថ្លែងថា៖«យើងនៅក្រៅស្រុក យើង គាំទ្រសកម្មភាពទាំងឡាយ ដែលធ្វើនៅក្នុងប្រទេសកម្ពុជា ស្របតាមរដ្ឋធម្មនុញ្ញ និងស្របតាមសន្ធិសញ្ញាសន្តិភាពទីក្រុងប៉ារីស»។
មិនមែនតែនៅបារាំងទេ កន្លងមក ប្រជាពលរដ្ឋខ្មែរនៅប្រទេសកាណាដា ក៏បានប្រមូលផ្តុំគ្នាធ្វើបាតុកម្មដែរ ដើម្បីសុំឲ្យរដ្ឋាភិបាលកាណាដា ជួយធ្វើអន្តរាគមន៍មករដ្ឋាភិបាលកម្ពុជា ឲ្យមានការដោះលែងលោក រ៉ុង ឈុន និងសកម្មជនផ្សេងទៀត។
ចំណែកក្នុងស្រុកវិញ គឺរឹតតែមិនស្ងៀមស្ងាត់ ដោយក្រុមយុវជននិងសកម្មជន ចេញមុខទាមទាមឲ្យដោះលែងអ្នកទាំងនោះ។ លើសពីនេះ ក្រុមយុវន បានដើរដាក់ញត្តិតាមស្ថានទូតបរទេសនានា ក្នុងរាជធានីភ្នំពេញ ដូចជា ស្ថានទូតអាមេរិក ស្ថានទូតបារាំង និង ស្ថានទូតអឺរ៉ុប ជាដើម។ ជាមួយគ្នានេះ មានអង្គការជាតិ-អន្តរជាតិមិនតិចទេ ដែលចេញសេចក្តីថ្លែងការណ៍ រិះគន់រដ្ឋាភិបាលកម្ពុជា ចំពោះការចាប់អ្នកទាំងនោះ និងទាមទារឲ្យដោះលែពួកគេវិញ។
យ៉ាងណាក៏ដោយ ការទាមទារទាំងអស់នោះ មិនទាន់ទទួលបានលទ្ធផលអ្វីឡើយ។ មន្ត្រីរដ្ឋាភិបាល ឆ្លើយតបថា ការទាមទាររបស់ប្រជាពលរដ្ឋខ្មែរនៅក្រៅស្រុកក្តី និងការសេចក្តីសេចក្តីការណ៍របស់អង្គការជាតិ-អន្តរជាតិក្តី គឺគ្រាន់តែជាសិទ្ធិរបស់ពួកគេប៉ុណ្ណោះ តែមិនមានឥទ្ធិពលមកលើតុលាការកម្ពុជាឡើយ។
អង្គការជាតិ-អន្តរជាតិ រិះគន់រដ្ឋាភិបាល ថាបានរំលោភសិទ្ធិមនុស្សនិងបិទសិទ្ធិសេរីភាព។ តែមន្ត្រីរដ្ឋាភិបាល បកស្រាយថា ការចាប់អ្នកទាំងនោះ គឺជាវិធានការផ្លូវច្បាប់។
មកដល់ពេលនេះ មានយុវជនយុវតីមិនតិចជាង១០នាក់នោះទេ ដែលត្រូវចាប់ខ្លួនជាបន្តបន្ទាប់ រួមមាន អតីតព្រះសង្ឃ កើត សារាយ យុវជន មាន ព្រហ្មមុនី យុវជន ហ៊ុន វណ្ណៈ យុវជន ថា ឡាវី យុវជន ថុន រដ្ឋា យុវជន មួង សុភ័ក្ត្រ យុវតី ឈឿ ដារាវី យុវតី សូ មេត្តា យុវតី ស កន្និកា យុវតី ឡុង គន្ធា និង យុវតី ភួន កែវរស្មី និង ជាដើម។ អតីតព្រះសង្ឃ និងយុវជនយុវតីទាំងនោះ ភាគច្រើនជាសមាជិកនៃក្រុមយុវជនខ្មែរថាវរៈនិងក្រុមយុវជនចលនាមាតាធម្មជាតិ។
លោក រ៉ុង ឈុន មេសហជីព និង លោក សួង សុភ័ណ្ឌ ប្រធានគណបក្សខ្មែរឈ្នះ ត្រូវចាប់ខ្លួនមុនយុវជនយុវតីខាងលើ។ អ្នកទាំង២ ត្រូវចាប់ខ្លួនពាក់ព័ន្ធនឹងរឿងព្រំដែន។ ឯយុវជយុវតី ត្រូវចាប់ខ្លួន ពាក់ព័ន្ធនឹងការចេញទាមទារឲ្យដោះលែងអ្នកទាំង២ និងទាមទារឲ្យមានយុត្តិធម៌សង្គម។ នៅមានមនុស្សមួយទៀត ដែលត្រូវចាប់ខ្លួន ដូចជា យុវជនជាអ្នកចម្រៀងរ៉េប ជា គន្ធា រួមទាំងមន្ត្រីអតីតគណបក្សប្រឆាំង២រូប គឺ លោក ជុំ វុទ្ធី និង លោក ឈួ ផេង។
អ្នកដែលត្រូវចាប់ខ្លួនខាងលើ ស្ទើរតែទាំងអស់ រងពីបទញុះញង់បង្កឲ្យមានភាពវឹកវរដល់សន្តិសុខសង្គម៕
Tag:
រ៉ុង ឈុន
© រក្សាសិទ្ធិដោយ thmeythmey.com
