កីឡាអន្តរជាតិ
អន្តរជាតិ
Alvaro ថា មិនបានរើសអើងពូជសាសន៍អ្វីទេ និងផ្តាំ Neymar ឲ្យរៀនពីបរាជ័យផង
×![]()
ដោយ: ទេព ពិទូរ្យ
Alvaro Gonzalez ខ្សែការពារក្រុម Marseille បានឆ្លើយតបភ្លាមៗទៅកាន់ Neymar ថា ខ្លួនមិនបានរើសអើងពូជសាសន៍ដូចការចោទរបស់ខ្សែបម្រើក្រុម Paris Saint-Germain រូបនេះឡើយ។ Gonzalez ថែមទាំងប្រាប់ Neymar ឲ្យរៀនស្គាល់ពីបរាជ័យទៀតផង។
ខ្សែការពារសញ្ជាតិអេស្ប៉ាញ Alvaro Gonzalez តាមរយៈបណ្តាញសង្គម Twitter ផ្ទាល់របស់ខ្លួនបានសរសេរបដិសេធការចោទប្រកាន់របស់ Neymar ជុំវិញការរើសអើងជាតិសាសន៍ ដោយចាត់ទុកជារឿងមិនពិត។ Gonzalez បន្ថែមថា ខ្លួនគ្មានកន្លែងណាសម្រាប់ដាក់ការរើសអើងនោះទេ។
No existe lugar para el racismo. Carrera limpia y con muchos compañeros y amigos en el día a día. A veces hay que aprender a perder y asumirlo en el campo. Increibles 3 puntos hoy. Allez l’OM Gracias familia pic.twitter.com/4DuUT1PT0x
— Álvaro González (@AlvaroGonzalez_) September 13, 2020
តារាឆ្នើម Neymar ស្ថិតក្នុងចំណោមកីឡាករ៣នាក់របស់ PSG ដែលទទួលបានកាតក្រហមក្នុងជំនួប Le Classique ដែលបញ្ចប់ទៅយ៉ាងច្របូកច្របល់ក្នុងកីឡដ្ឋាន Parc des Princes នៅយប់ថ្ងៃទី១៣ ខែកញ្ញា។ Marseille ដែលទទួលបានជ័យជម្នះ ១-០ ក៏មានកីឡាករ២នាក់ ត្រូវបណ្តេញចេញ នៅចុងម៉ោងផងដែរ។ អតីតសមាជិក Barcelona ត្រូវបណ្តេញចេញ ក្រោយអាជ្ញាកណ្តាលពិនិត្យមើល VAR ឃើញថា រូបគេបានយកដៃវាយក្បាល Gonzalez ពីក្រោយអំឡុងមានជម្លោះរវាងក្រុមទាំងពីរ។
ក្រោយមកតារាឆ្នើមសញ្ជាតិប្រេស៊ីលរូបនេះបានចោទ Gonzalez ថាបានបង្ហាញការរើសអើងជាតិសាសន៍លើខ្លួន និងថែមទាំងសរសេរសារលើ Twitter ថារូបគេស្តាយណាស់ដែលមិនបានដាល់មុខ Gonzalez ទៀតផង។
យ៉ាងណាក៏ដោយ ខ្សែការពារក្រុម Marseille វ័យ៣០ឆ្នាំរូបនេះ បានច្រានចោលការចោទប្រកាន់នេះ។ កីឡាករសញ្ជាតិអេស្ប៉ាញរូបនេះថែមទាំងបង្ហាញពីភាពស្អាតស្អំរបស់ខ្លួន ដោយរៀបរាប់ពីការប្រព្រឹត្តិល្អជាមួយក្រុមការងារ និងកីឡាករក្នុងក្រុមរបស់ខ្លួន។
មិនត្រឹមតែបដិសេធប៉ុណ្ណោះទេ Gonzalez ឆ្លៀតបញ្ចើចបញ្ចើរទៅ Neymar ឲ្យចេះទទួលស្គាល់បរាជ័យទៀតផង។ «ពេលខ្លះអ្នកត្រូវរៀនពីការចាញ់ និងទទួលយកវានៅលើទីលាន»។ នេះជាការបន្ថែមរបស់ Alvaro Gonzalez។
នេះជាបរាជ័យលើកទីពីររបស់ក្រុមម្ចាស់ការពារជើងឯក Ligue 1 សម្រាប់រដូវកាលថ្មី ២០២០-២១ នេះ ខណៈ Marseille រកបាន៦ពិន្ទុពេញពីការប្រកួត២លើកដូចគ្នា៕
Tag:
Alvaro Gonzalez
Neymar
© រក្សាសិទ្ធិដោយ thmeythmey.com
