ជាតិ
សង្គមជាតិ
កូនក្រពើត្រី ចំនួន១៥ក្បាល ត្រូវបានប្រទះនៅក្នុងបឹងធម្មជាតិ ខេត្តកោះកុង រូបភាពពី អង្គការអភិរក្សសត្វព្រៃ WCS
× កូនក្រពើត្រី ចំនួន១៥ក្បាលដែលប្រវែងខ្លួនខ្លួនប្រមាណ៣០សង់ទីម៉ែត្រ ត្រូវបានប្រទះនៅក្នុងបឹងធម្មជាតិនៅតំបន់ដីសើម ក្នុងស្រុកស្រែអំបិល ខេត្តកោះកុង។ សត្វក្រពើត្រី ជាប្រភេទសត្វជិតផុតពូជនៅលើពិភពលោក ដែលបានដាក់បញ្ចូលក្នុងបញ្ជីក្រហមរបស់អង្គការ IUCNខណៈនៅកម្ពុជា ក្រពើត្រីមានប្រមាណ៥ពាន់ក្បាល ដែលជាចំនួនច្រើនជាងគេ ធៀបនឹងបណ្តាប្រទេសនៅអាស៊ីអាគ្នេយ៍។
អំឡុងពេលចុះល្បាត ក្រុមការងារអង្គការអភិរក្សសត្វព្រៃ បានប្រទះឃើញកូនក្រពើត្រី ចំនួន១៥ក្បាល នៅក្នុងបឹងធម្មជាតិ ស្ថិតក្នុងស្រុកស្រែអំបិល ខេត្តកោះកុង កាលពីថ្ងៃទី១០ ខែកញ្ញា ឆ្នាំ២០២០។ នេះបើតាមហ្វេសប៊ុករបស់អង្គការអភិរក្សសត្វព្រៃកម្ពុជា WCS។
បើតាមអង្គការអភិរក្សសត្វព្រៃដដែល កូនក្រពើត្រីទាំងនេះ មានប្រវែងខ្លួនប្រមាណ៣០សង់ទីម៉ែត្រ បណ្ដែតខ្លួនក្នុងបឹងធម្មជាតិនៅតំបន់ដីសើម ជាទីជម្រកសំខាន់មួយរបស់សត្វក្រពើ ពិសេសប្រភេទក្រពើត្រីនេះ។
រយៈពេលចុងក្រោយនេះ បឹងធម្មជាតិនៅតំបន់ដីសើមបានស្រកទឹកចុះ ព្រោះមិនសូវមានភ្លៀងធ្លាក់ ដែលវានឹងធ្វើឲ្យប៉ះពាល់ដល់ជម្រកសត្វប្រភេទនេះ។ សត្វក្រពើត្រី ជាប្រភេទសត្វជិតផុតពូជនៅលើពិភពលោក ដែលបានដាក់បញ្ចូលក្នុងបញ្ជីក្រហមរបស់អង្គការ IUCN។ ទូទាំងប្រទេសក្នុងតំបន់អាស៊ីអាគ្នេយ៍ សត្វប្រភេទនេះ នៅសេសសល់តិចបំផុតក្នុងប្រទេសឡាវ និងឥណ្ឌូណេស៊ី ហើយស្ទើរតែផុតពូជទាំងស្រុងនៅប្រទេសថៃ និងវៀតណាម។
ក្រពើត្រី ជាសត្វកំពុងប្រឈមការគំរាមគំហែងជាសកល នឹងការបាត់បង់ទីជម្រក និងបរបាញ់ខុសច្បាប់ រួមទាំងការប្រមូលពងទៅលក់នៅកសិដ្ឋានចិញ្ចឹមក្រពើនៅបណ្ដាប្រទេសមួយចំនួនដូចជា កម្ពុជា ថៃ និងវៀតណាម។
អង្គការអភិរក្សសត្វព្រៃ បានបញ្ជាក់ថាប្រភេទសត្វក្រពើត្រី មានប្រមាណ៥ពាន់ក្បាល នៅក្នុងប្រទេសកម្ពុជា ដែលនេះអាចចាត់ទុកថាជាចំនួនច្រើនក្នុងចំណោមប្រទេសដទៃផ្សេងទៀត ហើយអង្គការក៏ការពារសត្វប្រភេទនេះពីការផុតពូជផងដែរ៕
Tag:
ជាតិ
ក្រពើត្រី
កោះកុង
© រក្សាសិទ្ធិដោយ thmeythmey.com