ជាតិ
បុណ្យភ្ជុំបិណ្ឌ
សង្គមជាតិ
វត្តមណីរតនារាម មិនធ្វើពិធីបោះបាយបិណ្ឌ ជិត២០ឆ្នាំហើយ វត្តមណីរតនារាម នៅខេត្តពោធិ៍សាត់ (រូបពីទំព័រហ្វេសប៊ុករបស់វត្តមណីរតនារាម)
× ភ្នំពេញ៖ ជិត២០ឆ្នាំហើយ ដែលវត្តមណីរតនារាម នៅភូមិថ្នល់បំបែក សង្កាត់រលាប ក្រុងពោធិ៍សាត់ ខេត្តពោធិ៍សាត់ មិនប្រារព្ធពិធីបោះបាយបិណ្ឌឡើយ ។ នោះក៏ព្រោះតែ អ្នកចែកឋានទៅ និងពពួកប្រេត មិនអាស្រ័យលើការទទួលបានអាហារបុណ្យ តាមការបោះបាយបិណ្ឌនោះទេ។ អ្វីសំខាន់នោះ គឺការធ្វើបុណ្យដោយសទ្ធាជ្រះថ្លាបំផុត។ នេះបើតាមថេរដីការបស់ព្រះអង្គ ជា គីមសាន ព្រះគ្រូសូត្រឆ្វេងនៃវត្តមណីរតនារាម។
ព្រះអង្គ ជា គីមសាន មានសង្ឃដីកាថា ការសិក្សាពីព្រះពុទ្ធសាសនាបានបញ្ជាក់ពីផលបុណ្យដែលពពួក ញាតិចែកឋានទៅ ឬពពួកប្រេតអាចទទួលបានទាន គឺមិនអាស្រ័យលើការបោះបាយបិណ្ឌឡើយ គឺអាស្រ័យលើផលបុណ្យដែលបុគ្គលម្នាក់ៗធ្វើ ហើយឧទ្ទិសកុសលដល់ពពួកញាតិសន្តានឬប្រេតទាំងនោះ។ ព្រះអង្គបញ្ជាក់ថា ការឧទ្ទិសកុសលផលបុណ្យដល់មនុស្សសត្វដែលចែកឋានទៅ គឺមិនមែនពួកគេទទួលបានគ្រប់គ្នាឡើយ គឺទាល់តែពពួកទាំងនោះអនុមោទនាទទួលយកទើបទទួលបាន។
«ដើម្បីឲ្យពពួកញាតិឬប្រេតទទួលបានផលបុណ្យគឺត្រូវធ្វើបុណ្យ មានន័យថាធ្វើអំពើល្អឲ្យសេចក្ដីជ្រះថ្លាឬសាងកុសល ហើយឧទ្ទិសកុសលដល់ពពួកទាំងនោះ ហើយពពួកទាំងនោះត្រូវអនុមោទនាយកដោយសេចក្ដីរីករាយទើបទទួលផលបុណ្យ។ ហើយការមិនបោះបាយបិណ្ឌនៅវត្តនេះ គឺដើម្បីអនាម័យ ហើយសំខាន់បំផុតចង់ឲ្យពុទ្ធបរិស័ទដែលធ្វើបុណ្យកុសល ប្រកបដោយការត្រិរិះពិចារណារកហេតុផល»។ នេះបើតាមសង្ឃដីការរបស់ព្រះអង្គ ជា គីមសាន។
គ្រប់ពុទ្ធបរិស័ទដែលទៅដល់វត្តមណីរតនារាម ប្រសិនបើមានចម្ងល់ពាក់ព័ន្ធនឹងការមិនប្រារព្ធពិធីបោះបាយបិណ្ឌ គឺតែងតែទទួលបានការពន្យល់ ប្រកបដោយការពិចារណាពីគ្រប់ព្រះអង្គដែលគង់នៅក្នុងវត្តនេះ។ នេះបើតាមការបញ្ជាក់របស់ព្រះអង្គ គីមសាន ដោយមានសង្ឃដីកាបន្ថែមថា ទោះបីគ្មានការបោះបាយបិណ្ឌក្នុងវត្តមណីរតនារាមពិតមែន តែពុទ្ធបរិស័ទនៅតែចូលរួមស្ដាប់បរាភវសូត្ររៀងរាល់ព្រឹកនៅអំឡុងថ្ងៃកាន់បិណ្ឌនេះ។
ដ្បិតវត្តមណីរតនារាម មិនបោះបាយបិណ្ឌពិតមែន តែនៅតាមទីអារាមដទៃនៅតែបន្តធ្វើពិធីបែបនេះ។ ទំនៀមទម្លាប់នៃការបោះបិណ្ឌ គឺជាជំនឿរបស់ពុទ្ធបរិស័ទ។ ព្រះអង្គ គីមសាន ក៏មានថេរដិការថា បើសិនជាតាមវត្ត មានការរៀបចំបោះបិណ្ឌ គួរតែបោះលក្ខណៈតិចតួច ដោយសេចក្តីជ្រះថ្លាក្នុងការសាងកុសលផលបុណ្យ គឺជារឿងល្អ ព្រោះវាមិនចាំបាច់ទាល់តែរៀបចំពិធីបោះបាយបិណ្ឌធំដុំច្រើនលើសលប់ទេ។
ពុទ្ធបរិស័ទដែលទៅបោះបាយបិណ្ឌខ្លះយល់ថា ជាការបញ្ចូនអាហារឬផលបុណ្យដល់ពពួកសាច់ញាតិដែលបាត់បង់ជីវិតទៅ ពិសេសបារម្ភខ្លាចសាច់ញាតិរបស់ខ្លួនកើតទៅជាប្រេតស្រេកឃ្លានជាដើម។ ប៉ុន្តែសេចក្ដីពិត នៃការបង្កើតពិធីបោះបាយបិណ្ឌរបស់បុព្វបុរស គឺមានគំនិតអប់រំដ៏ជ្រាលជ្រៅ សម្រាប់សេចក្តីសុខចម្រើនដល់ជីវិតរស់នៅនាពេលបច្ចុប្បន្ន ។ មានន័យថា មនុស្សត្រូវចេះសាមគ្គីគ្នា សន្សំកុសល ចិត្តជ្រះថ្លា និងស្ដាប់ឱវាទរបស់ព្រះសម្មាសម្ពុទ្ធជាដើម។ នេះបើតាមការលើកឡើងរបស់ព្រះអង្គ គីមសាន៕
© រក្សាសិទ្ធិដោយ thmeythmey.com