រហូតដល់ពេលបច្ចុប្បន្ន នាវាដឹកយន្តហោះចម្បាំង ត្រូវបានគេសាងសង់ជាបន្តបន្ទាប់។ ប្រទេសដែលមាននាវាដឹកយន្តហោះចម្បាំងកំពុងដាក់ឲ្យប្រើប្រាស់ច្រើនជាងគេ គឺអាមេរិក មានជាង១០គ្រឿង ខណៈប្រទេសផ្សេងទៀត មានត្រឹមតែមួយ ឬពីរគ្រឿងប៉ុណ្ណោះ។ ខាងក្រោមនេះ គឺជាប្រទេសដែលមាននាវាដឹកយន្តហោះចម្បាំង។ 
 

ចាប់តាំងពីសង្រ្គាមលោកលើកទី២មក អាមេរិកសាងសង់នាវាដឹកយន្តហោះជាបន្តបន្ទាប់។ តាមការចុះផ្សាយរបស់សារព័ត៌មាន CNN (https://edition.cnn.com/2013/08/09/us/u-s-aircraft-carriers-fast-facts/index.html) រហូតមកដល់ឆ្នាំ២០២០ អាមេរិកមាននាវាដឹកយន្តហោះចម្បាំងកំពុងដាក់ឲ្យប្រតិបត្តិមានចំនួន ១១គ្រឿង។ នាវាដែលត្រូវបានឃើញឈ្មោះលើសារព័ត៌មានញឹកញាប់មាន USS Ronald Reagan និង USS Nimitz។ 
 

បន្ទាប់ពីអាមេរិក អង់គ្លេស មានចំនួននាវាដឹកយន្តហោះចម្បាំង ២គ្រឿងប៉ុណ្ណោះកំពុងដាក់ឲ្យប្រើប្រាស់មានដូចជា HMS Queen Elizabeth និង HMS Prince of Wales។ 
 

ដោយឡែកចិនវិញ ក៏មាននាវាដឹកយន្តហោះពីរគ្រឿងដែរ ក្នុងនោះមានដូចជា Liaoning និងShandong។ ក្នុងសមយុទ្ធយោធាចុងក្រោយនៅសមុទ្រBohai និងតំបន់សមុទ្រផ្សេងទៀត ចិនក៏បានប្រើប្រាស់ នាវាដឹកយន្តហោះទាំងពីរនេះដែរ ដើម្បីពង្រឹងសមត្ថភាពរបស់ខ្លួន ស្របពេលមានមានតានតឹងជាមួយអាមេរិក។ 
 

សម្រាប់អ៊ីតាលី គឺមាននាវាដឹកយន្តហោះចម្បាំងពីរគ្រឿង ដែលមានដូចជា Cavour និង Giuseppe Garibaldi។ 
 

ចំណែកបារាំង ឥណ្ឌា រុស្ស៊ី អេស្ប៉ាញសុទ្ធតែមាននាវាចម្បាំង ១គ្រឿងដូចគ្នា។ ជាការពិត ប្រទេសទាំង៤នេះ ក៏មាននាវាដឹកយន្តហោះចម្បាំងផ្សេងទៀតដែរ គ្រាន់តែមិនដាក់ឲ្យប្រើប្រាស់ ហើយនាវាដឹកយន្តហោះចម្បាំងខ្លះគឺចាស់ប្រើលែងកើត។ 
 

ក្នុងចំណោមប្រទេសបណ្តាប្រទេសអាស៊ីអាគ្នេយ៍ទាំងអស់ ថៃគឺជាប្រទេសតែមួយគត់ ដែលមាននាវាដឹកយន្តហោះ។ នាវាដឹកយន្តហោះ HTMS Chakri Naruebet ដែលផលិតនៅអេស្ប៉ាញ ហើយដាក់ឲ្យដំណើរការនៅឆ្នាំ១៩៩៧ នេះ អាចដឹកយន្តហោះធុន Sea Harrier AV-8S និងឧទ្ធម្ភាគចក្រ SH-70Bបាន។ 

សូមបញ្ជាក់ថា ក្រៅពីប្រទេសខាងលើ ប្រទេសមួយចំនួនទៀត ដូចជាអូស្រ្តាលី កាណាដា ប្រេស៊ីល ជប៉ុន ហូឡង់ជាដើម ក៏មាននាវាដឹកយន្តហោះចម្បាំងផងដែរ ប៉ុន្តែគ្រាន់តែនាវាទាំងនោះ អាចទទួលបានត្រឹមឧទ្ធម្ភាគចក្រ ខណៈការកែច្នៃនាវាទាំងនេះដើម្បីទទួលយន្តហោះចម្បាំង ចំណាយថវិកាច្រើនក្រាស់ក្រែល៕