COVID-19
អន្តរជាតិ
ចិន រកឃើញកូរ៉ូណាវីរុសនៅលើកញ្ចប់មឹកនាំចូលពីរុស្ស៊ី អ្នកលក់គ្រឿងសមុទ្រនៅចិន។ រូបភាព៖ Reuters
× អាជ្ញាធរចិនក្នុងខេត្តជីលីន នៅថ្ងៃទី២០ ខែកញ្ញា បានរកឃើញកូរ៉ូណាវីរុសនៅលើកញ្ចប់មឹកក្លាសេ ដែលនាំចូលពីបរទេស។ អាជ្ញាធរសុខាភិបាលតំបន់ បានស្នើប្រជាជន ដែលបានទិញមឹក និងបរិភោគមឹកទាំងនោះ ឲ្យទៅតេស្តរកកូរ៉ូណាវីរុស។
កន្លងមក ចិន បានរាយការណ៍ថា អាជ្ញាធររបស់ខ្លួន បានរកឃើញកូរ៉ូណាវីរុសមានជាប់នៅលើកញ្ចប់គ្រឿងសមុទ្រក្លាសេ ដែលបាននាំចូលពីបរទេស នៅក្នុងទីក្រុងចំនួនពីរ។ ក្រោយមក ការរកឃើញកញ្ចប់ក្លាសេ ដែលមានជាប់កូរ៉ូណាវីរុស បានស្ងៀមស្ងាត់មួយរយៈ។
រហូតដល់ថ្ងៃទី២០ ខែកញ្ញា អាជ្ញាធរសុខាភិបាលក្រុង ហ្វូយូ ខេត្តជីលីន បានប្រកាសថា ខ្លួនបានរកឃើញកូរ៉ូណាវីរុសនៅលើកញ្ចប់មឹកក្លាសេនាំចូលពីបរទេសជាថ្មីម្តងទៀត។ កញ្ចប់មឹកនោះ ត្រូវបាននាំមកពីទីក្រុងឆាងឈុន ដែលជាទីក្រុងធំរបស់ខេត្ត។ អាជ្ញាធរសុខាភិបាលក្រុងហ្វូយូ ប្រាប់ទីភ្នាក់ងារព័ត៌មាន Reuters បែបនេះតាមបណ្តាញសង្គម WeChat។
បើតាមការអះអាងរបស់អាជ្ញាធរចិន កញ្ចប់មឹកនោះ នាំចូលមកពីរុស្ស៊ី ដោយក្រុមហ៊ុនមួយ នៅក្នុងក្រុងហ៊ុនឈុន និងត្រូវបានដឹកជញ្ជូនទៅក្រុងឆាងឈុន។ ពាក់ព័ន្ធនឹងការរកឃើញនេះ ចិន បានស្នើឲ្យប្រជាជនរបស់ខ្លួន ដែលបានទិញ និងបរិភោគមឹកចាប់ពីថ្ងៃទី២៤ ដល់ថ្ងៃទី៣១ ខែសីហា ពីហាងលក់គ្រឿងសមុទ្រ Sanjia Deda នៅក្នុងក្រុងហ្វូយូ ត្រូវរាយការណ៍ទៅអាជ្ញាធរ ដើម្បីតាមដាន និងធ្វើតេស្តរកជំងឺ COVID-19 ។
សម្រាប់ចិន ប្រសិនបើរកឃើញកូរ៉ូណាវីរុស នៅលើកញ្ចប់ផលិតផលនាំចូលពីបរទេស ខ្លួននឹងផ្អាកការនាំចូលចំនួន ១សប្តាហ៍ ហើយប្រសិនបើរកឃើញថាអ្នកផ្គត់ផ្គង់ផលិតផលទាំងនោះមានផ្ទុកCOVID-19 ចិន នឹងផ្អាកការនាំចូលផលិតផលទាំងនោះ ចំនួន១ខែ។ នេះបើតាមការបញ្ជាក់របស់មន្ត្រីពន្ធគយចិន នៅថ្ងៃទី១៨ ខែកញ្ញាកន្លងទៅ។
កាលពីសប្ដាហ៍មុន រដ្ឋបាលពន្ធគយចិន បានប្រកាសផ្អាកនាំចូលគ្រឿងសមុទ្រពីក្រុមហ៊ុន PT Putri Indahដែលជាក្រុមហ៊ុននាំចេញគ្រឿងសមុទ្រមួយរបស់ឥណ្ឌូណេស៊ី រយៈពេល ១សប្តាហ៍ បន្ទាប់ពីរកឃើញថា កញ្ចប់ដាក់ត្រីសមុទ្រមួយប្រភេទ មានកូរ៉ូណាវីរុស។ ជាការទទួលខុសត្រូវ ក្រសួងនេសាទឥណ្ឌូណេស៊ី ក៏បានប្រកាសផ្អាកការនាំចេញផលិតផលគ្រឿងសមុទ្ររបស់ក្រុមហ៊ុននេះ ទៅចិនផងដែរ ដើម្បីស៊ើបអង្កេតលើករណីមានកូរ៉ូណាវីរុសនេះ។
គិតមកត្រឹមថ្ងៃទី២១ ខែកញ្ញា ចិនមានករណីឆ្លងCOVID-19 សរុបចំនួន ៨៥២៩១ករណី អ្នកស្លាប់មានចំនួន ៤៦៣៤នាក់ និងអ្នកជាសះស្បើយមានចំនួន ៨០៤៨៤នាក់៕
© រក្សាសិទ្ធិដោយ thmeythmey.com