COVID-19
សង្គមអន្តរជាតិ
អន្តរជាតិ
លោក ស៊ូហ្កា និងលោក ត្រាំ ជជែកតាមទូរសព្ទលើកដំបូងពីសន្តិសុខនិង COVID-19
ប្រធានាធិបតីអាមេរិក ដូណាល់ ត្រាំ និងនាយករដ្ឋមន្រ្តីជប៉ុន ស៊ូហ្កា យូស៊ីហ៊ីដេ។ រូបភាព AFP
×![]()
នាយករដ្ឋមន្ត្រីជប៉ុនថ្មី ស៊ូហ្កា យូស៊ីហ៊ីដេ និងប្រធានាធិបតីអាមេរិក ដូណាល់ ត្រាំ បានជជែកពិភាក្សាគ្នាលើកដំបូងតាមរយៈទូរសព្ទ នៅថ្ងៃទី ២០ ខែកញ្ញា ចាប់តាំងពីលោកលោក ស៊ូហ្កា ឡើងកាន់អំណាចមក។ ក្នុងកិច្ចសន្ទនានេះ ប្រមុខដឹកនាំទាំងពីរ បានប្តេជ្ញាពង្រឹងសម្ព័ន្ធភាពសន្តិសុខរវាងប្រទេសទាំងពីរកាន់តែខ្លាំងថែមទៀត ហើយបន្តរួមដៃគ្នាដោះស្រាយវិបត្តិជំងឺរាតត្បាតសកល COVID-19 ដែលកំពុងយាយីពិភពលោកទាំងមូល។ 
លោក ស៊ូហ្កា យូស៊ីហ៊ីដេ ត្រូវបានបោះឆ្នោតដោយសភាជប៉ុនឲ្យឡើងកាន់តំណែងជានាយករដ្ឋមន្ត្រីថ្មីជំនួសលោក ស៊ិនហ្សូ អាបេ កាលពីសប្ដាហ៍មុន។ កាន់តំណែងនេះអស់ជិត ៨ ឆ្នាំ លោក អាបេ បានប្រឹងប្រែងរឹតចំណងមិត្តភាពស្និតស្នាលជាមួយលោក ដូណាល់ ត្រាំ ដោយលេងវាយកូនហ្គោលជាមួយគ្នា និងជជែកពិភាក្សាគ្នាតាមទូរសព្ទញឹកញាប់ជាដើម។
ជាអតីតមនុស្សជំនិតរបស់លោក អាបេ លោក ស៊ូហ្កា នឹងបន្តពង្រឹងទំនាក់ទំនងជប៉ុន-អាមេរិកថែមទៀត។ លោក ស៊ូហ្កា បានប្រាប់ប្រធានាធិបតី ត្រាំ តាមទូរសព្ទថា៖«សម្ព័ន្ធមិត្តជប៉ុន-អាមេរិក គឺជាមូលដ្ឋានគ្រឹះដ៏សំខាន់នៃស្ថិរភាពនិងសន្តិភាពក្នុងតំបន់»។ ប្រាប់អ្នកសារព័ត៌មានក្រោយកិច្ចសន្ទនានេះ លោក ស៊ូហ្កា បញ្ជាក់ទៀតថា ប្រទេសទាំងពីរ ប្តេជ្ញាបន្តពង្រឹងចំណងទាក់ទងនេះឲ្យកាន់តែជិតស្និទ្ធថែមទៀត។
តាមការចុះផ្សាយរបស់ទីភ្នាក់ងារព័ត៌មានជប៉ុន Kyodo នាយករដ្ឋមន្ត្រីជប៉ុនវ័យ៧១ឆ្នាំរូបនេះ អះអាងថា លោក ត្រាំំ ស្វាគមន៍ឲ្យលោកទាក់ទងទៅ២៤ម៉ោង បើមានរឿងអ្វីកើតឡើង។ អំឡុងកិច្ចសន្ទនាតាមទូរសព្ទរយៈពេល២៥នាទីនេះ ប្រមុខដឹកនាំទាំងពីរ ក៏បានពិភាក្សាគ្នាជុំវិញស្ថានការណ៍នៅកូរ៉េខាងជើង ក៏ដូចជា វិធានការឆ្លើយតបនឹងជំងឺរាតត្បាតសកល COVID-19 ហើយថែមទាំងផ្លាស់ប្តូរទស្សនៈគ្នាជុំវិញប្រទេសចិនផងដែរ។
ម្យ៉ាងវិញទៀត យោងតាមសេចក្តីថ្លែងការណ៍ដែលចេញផ្សាយដោយសេតវិមានអាមេរិក លោក ស៊ូហ្កា និងលោក ត្រាំ ក៏បានលើកឡើងពីសារសំខាន់នៃការប្រកាន់ខ្ជាប់នូវទស្សនៈវិស័យរួម «ឥណ្ឌូ-ប៉ាស៊ីហ្វិកសេរីនិងបើកចំហ» ក៏ដូចជាយល់ព្រមសហការគ្នាពង្រឹងសេដ្ឋកិច្ចសកលផងដែរ។
លោក ត្រាំ មិនមែនជាមេដឹកនាំទីមួយទេ ដែលបានជជែកពិភាក្សាជាមួយលោក ស៊ូហ្កា ចាប់តាំងពីឡើងកាន់តំណែងមក។ នៅមុនជំនួបតាមទូរសព្ទជាមួយប្រធានាធិបតីអាមេរិក នាយករដ្ឋមន្ត្រី ស៊ូហ្កា បានជជែកពិភាក្សាតាមទូរសព្ទជាមួយសមភាគីអូស្ត្រាលី ស្កុត ម៉ូរីសុន ។ ក្រោយជំនួបជាមួយមេដឹកនាំទាំងពីរ លោក ស៊ូហ្កា បានអះអាងថា លោកចង់ជជែកគ្នាតាមទូរសព្ទជាមួយបណ្ដាមេដឹកនាំពិភពលោកផ្សេងទៀត ។ យ៉ាងណា លោកពុំបានរៀបរាប់ឈ្មោះពួកគេឡើយ៕
Tag:
ជប៉ុន
សហរដ្ឋអាមេរិក
ជប៉ុន
យូស៊ីហ៊ីដេ ស៊ូហ្កា
ដូណាល់ ត្រាំ
© រក្សាសិទ្ធិដោយ thmeythmey.com
