COVID-19
អន្តរជាតិ
មីយ៉ាន់ម៉ា ឲ្យប្រជាជនទីក្រុងយ៉ាំងហ្គោនស្នាក់នៅផ្ទះ ក្រោយករណីឆ្លង COVID-19 ហក់ឡើង ស្រ្តីមីយ៉ាន់ម៉ាបីកូនរង់ចាំការធ្វើតេស្តរកជំងឺ COVID-19 ក្នុងទីក្រុងយ៉ាំងហ្គោន។ រូបភាព Xinhua
× រដ្ឋាភិបាលមីយ៉ាន់ម៉ា បានចេញបញ្ជាស្នាក់ផ្ទះសម្រាប់ប្រជាជនទីក្រុងយ៉ាំងហ្គោន ក្រោយករណីឆ្លងជំងឺ COVID-19 ក្នុងប្រទេសមួយនេះ ហក់ឡើងខ្លាំង។ មីយ៉ាន់ម៉ាដែលស្ងប់ស្ងាត់ករណីឆ្លងក្នុងស្រុកនៅជាច្រើនខែ កំពុងញាំញីដោយករណីឆ្លងច្រើននៅប៉ុន្មានសប្ដាហ៍ចុងក្រោយនេះ។
នៅថ្ងៃទី២០ ខែកញ្ញា ក្រសួងសុខាភិបាលមីយ៉ាន់ម៉ាបានប្រកាសពីករណីឆ្លងប្រចាំថ្ងៃចំនួន៦៧១នាក់ ដែលជាតួលេខច្រើនបំផុតក្នុងប្រទេសមួយនេះ តែមិនបានបញ្ជាក់កន្លែងមានករណីឆ្លងឡើយ។ ចំនួនអ្នកឆ្លងសរុបមាន៥៥៤១នាក់ និងស្លាប់៩២នាក់។
ទីក្រុងយ៉ាំងហ្គោន ដែលជាបណ្ដុំពាណិជ្ជកម្ម និងហិរញ្ញវត្ថុរបស់មីយ៉ាន់ម៉ា រងការវិធានការរឹតត្បិតកាន់តែខ្លាំង ក្រោយករណីឆ្លងនៅទីក្រុងនេះមានច្រើន។ ចាប់ពីថ្ងៃទី២១ ខែកញ្ញា ប្រជាជនក្នុងទីក្រុងនេះ ត្រូវអនុវត្តបញ្ជាស្នាក់នៅផ្ទះ សំដៅកាត់បន្ថយការឆ្លងថ្មីបន្ថែមទៀត។ ជាមួយបទបញ្ជានេះ បុគ្គលិកក្រុមហ៊ុនទាំងអស់ ត្រូវធ្វើការពីផ្ទះវិញ។ សាលារៀនក្នុងទីក្រុង ត្រូវបានបញ្ជាឲ្យបិទរួចស្រេចទៅហើយក្រោមវិធានការលើកមុន។
ករណីឆ្លងថ្មីនៅមីយ៉ាន់ម៉ា ហក់ឡើងដល់ខ្ទង់រយនាក់ក្នុងមួយថ្ងៃនៅប៉ុន្មានសប្ដាហ៍ចុងក្រោយនេះ បន្ទាប់ពីករណីឆ្លង ងើបឡើងវិញនៅរដ្ឋរ៉ាក់ឃីនភាគខាងលិចប្រទេស។ ករណីឆ្លងក្នុងចំណោមជនភៀសខ្លួន បានក្លាយជារឿងឈឺក្បាលសម្រាប់រដ្ឋាភិបាលមីយ៉ាន់ម៉ា ខណៈការបោះឆ្នោតកាន់តែជិតដល់ហើយនោះ។ ការផ្ទុះករណីឆ្លងថ្មីៗ ក៏បង្ខំឲ្យជើងហោះហើរក្នុងស្រុកផ្អាកដំណើរការបណ្ដោះអាសន្នដែរ។
ជាមួយគ្នានេះ យុទ្ធនាការឃោសនារបស់បក្សនយោបាយនានាដែលធ្លាប់តែគគ្រឹកគគ្រេង អ៊ូអរពេញដងផ្លុវ ក៏ប្រែជាស្ងប់ស្ងាត់ខ្លះវិញ ហើយត្រូវបានរាំងស្ទះ ព្រោះតំបន់ជាច្រើន ត្រូវកំណត់ជាកន្លែងហាមឃាត់។ ការបោះឆ្នោតថ្នាក់ជាតិនៅមីយ៉ានម៉ា នឹងធ្វើនៅខែវិច្ឆិកាខាងមុខ៕
Tag:
មីយ៉ាន់ម៉ា
COVID-19
© រក្សាសិទ្ធិដោយ thmeythmey.com