ឥទ្ធិពលព្យុះនូល ដែលធ្វើឲ្យធ្លាក់ភ្លៀងនៅតាមបណ្តាខេត្ត នៃកម្ពុជា ចាប់ពីថ្ងៃទី១៨ ដល់ថ្ងៃទី២០ ខែកញ្ញា បានបណ្ដាលឲ្យមនុស្សស្លាប់មនុស្សចំនួន១១នាក់ បាត់ខ្លួនម្នាក់ និងលិចផ្ទះសម្បែងជាង១៨០០ខ្នង។ នេះបើតាមរបាយការណ៍ដែលលោក ឃុន សុខា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានផ្តល់ឲ្យអ្នកសារព័ត៌មាន ThmeyThmey តាមតេឡេក្រាម។
ក្នុងរបាយការណ៍ បានបង្ហាញថា ខេត្តចំនួន៨ បានរងគ្រោះទឹកជំនន់ ដោយសារឥទ្ធិពលព្យុះនូល។ ក្នុងនោះរួមមាន ខេត្តព្រះសីហនុ កោះកុង បាត់ដំបង ឧត្តរមានជ័យ ប៉ៃលិន កំពត កែប និងពោធិ៍សាត់ ។ របាយការណ៍បញ្ជាក់ថា ខេត្តព្រះសីហនុ គឺរងប៉ះពាល់ខ្លាំងជាងគេ។
របាយការណ៍ដដែល បានបញ្ជាក់ថា ផ្ទះសម្បែងនៅក្នុងស្រុកព្រៃនប់ និងក្រុងព្រះសីហនុ ខេត្តព្រះសីហនុ លិចជន់អស់ចំនួន១,៧០១ខ្នង, លិចផ្លូវ៣កន្លែង ស្មើនឹង៤០០ម៉ែត្រ, ផ្លូវលំ៩កន្លែង ស្មើនឹង៣,៤៧០ម៉ែត្រ។ ករណីគ្រោះធម្មជាតិក្នុងខេត្តនេះ ក៏បានបណ្តាលឲ្យមនុស្ស២នាក់ស្លាប់ផងដែរ។
ដោយឡែកផ្លូវ៣ភូមិក្នុងស្រុកស្រែអំបិល ស្រុកថ្មបាំង និងស្រុកមណ្ឌលសីមា ខេត្តកោះកុង បានជន់លិច និងប៉ះពាល់ដល់គ្រួសារចំនួន១៨ ។ រីឯបុរសម្នាក់ដែលជាអ្នកនេសាទ បានលិចទូកនៅភូមិចំការលើ ឃុំថ្មស ស្រុកបទុមសាគរ ខេត្តកោះកុង ត្រូវបានស្លាប់ហើយ។ នេះបើតាមរបាយការណ៍គណៈកម្មាធិការជាតិគ្រប់គ្រងគ្រោះមហន្តរាយ។
ទិដ្ឋភាពលិចផ្លូវជាតិលេខ៥៥ ចំណុចស្ពាន់ស្ពង់ ឃុំសំរោង ស្រុកក្រវ៉ាញ រូបភាពពីលោក ឃុន សុខា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ
របាយការណ៍ បានបន្ថែមថា ខេត្តបាត់ដំបង មានមនុស្សស្លាប់៨នាក់ ដោយសាររន្ទះបាញ់ និងរងរបួសចំនួន៣នាក់ ប៉ុន្តែមិនទាន់មានតួលេខផ្ទះ ដែលប៉ះពាល់ដោយសារគ្រោះទឹកជំនន់នៅឡើយទេ។
ចំពោះផ្ទះសម្បែងចំនួន៩៣ខ្នង និងផ្លូវប្រវែង៦,៨៣៩ម៉ែត្រ នៅក្នុងខេត្តឧត្តរមានជ័យត្រូវបានជន់លិច។ រីឯស្រែចម្ការចំនួន២១០ហិចតា និងដំឡូងមី៥៩ហិចតារងផលប៉ះពាល់។ ចំណែកផ្ទះសម្បែងនៅខេត្តប៉ៃលិន ប៉ះពាល់ពលរដ្ឋ ៣១គ្រួសារ លិចផ្លូវ១៨៥ម៉ែត្រ ដំណាំរួមផ្សំ៤៤ហិចតា ខណៈមនុស្សម្នាក់ត្រូវបានបាត់ខ្លួន។
ផ្ទះសម្បែងចំនួន២២ខ្នងដែលស្ថិតនៅក្នុងឃុំចំនួន៤ នៃស្រុកកំពង់ត្រាច និងស្រុកទឹកឈូរ ក្នុងខេត្តកំពត ក៏ត្រូវបានខូចខាតទាំងស្រង់ផងដែរ។ រីឯផ្ទះសម្បែងនៅក្នុងស្រុកដំណាក់ចង្អើរ ខេត្តកែបក៏ត្រូវខូចខាតចំនួន១៦ខ្នងដែរ។ ចំណែកនៅក្នុងខេត្តពោធិ៍សាត់ ក៏បានប៉ះពាល់ដល់ស្រុកវាលវែងចំនួន៤ឃុំ ទឹកហូរដាច់ផ្លូវចំនួន៦កន្លែង លិចផ្លូវចំនួន៦០ម៉ែត្រ និងផ្លូវលំចំនួន២០០ម៉ែត្រ។ នេះបើតាមរបាយការណ៍ដដែល។
របាយការណ៍សរុបនៃតួលេខប៉ះពាល់ និងខូចខាតនោះ បានបង្ហាញថា ឥទ្ធិពលព្យុះនូល បានបណ្តាលឲ្យជន់លិចផ្ទះសម្បែងសរុប១៨២៥ខ្នង ក្នុងនោះខូចខាតផ្ទះចំនួន៥៦ខ្នង ស្រូវចំនួន២១០ហិចតា ដំឡូងមីចំនួន៥៨ហិចតា ដំណាំគួបផ្សំចំនួន៤៤ហិចតា ស្លាប់មនុស្សចំនួន១១នាក់ និងបាត់ខ្លួនម្នាក់៕