ជាតិ
ស្រូវ និងដំឡូងមី ប្រមាណ ៣០០ហិកតា រងប៉ះពាល់ដោយសារឥទ្ធិពលព្យុះ«នូល» (រូបភាពពីក្រសួងធនធានទឹក និងពី ThmeyThmey)
× ឥទ្ធិពលព្យុះទី១១ «នូល» បានធ្វើឲ្យកម្ពុជាទទួលរងនូវវិសម្ពាធទាប និងបានធ្វើឲ្យតំបន់មួយចំនួនប្រឈមខ្ពស់នឹងជំនន់ទឹកភ្លៀង ប៉ះពាល់ដល់ទ្រព្យសម្បត្តិ ផ្ទះសម្បែង ប្រជាពលរដ្ឋ និងផលដំណាំផ្សេងៗ ប្រមាណ ៣១២ហិកតា បានរងផលប៉ះពាល់ផងដែរ បើគិតត្រឹមថ្ងៃទី ២០ ខែកញ្ញា ឆ្នាំ២០២០។ នេះបើតាមលោក ឃុន សុខា អ្នកនាំពាក្យអ្នកគណៈកម្មាធិការជាតិគ្រប់គ្រងគ្រោះមហន្តរាយ ប្រាប់សារព័ត៌មានThmeyThmey25 តាមទូរសព្ទ នៅថ្ងៃទី ២១ ខែកញ្ញា ឆ្នាំ២០២០។
បើតាមអ្នកនាំពាក្យរូបនេះ៖« ខេត្តចំនួន៨ ដែលបានរងគ្រោះដោយសារឥទ្ធិពលព្យុះ «នូល» មានខេត្តឧត្តមានជ័យ កោះកុង បាត់ដំបង ប៉ៃលិន ព្រះសីហនុ កំពត កែប ពោធិ៍សាត់។ ហើយខេត្តដែលរងគ្រោះខ្លាំងជាងគេគឺខេត្តព្រះសីហនុ»។ ដោយឡែកសម្រាប់ខេត្តព្រះសីហនុបានធ្វើឲ្យផ្ទះប្រជាពលរដ្ឋ ១ ៧០១ខ្នងរងប៉ះពាល់ ធ្វើឲ្យមនុស្ស ២នាក់បានស្លាប់ និងពលរដ្ឋ ៤៧៥នាក់ត្រូវបានជម្លៀស។
បើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ គិតត្រឹមយប់ថ្ងៃទី២០ កញ្ញា ដំណាំស្រូវ ២១០ហិកតា ដំណាំដំឡូងមី ៥៨ហិកតា និងដំណាំផ្សេងៗ ៤៤ហិកតា នៅក្នុងខេត្តទាំង ៨ ខាងលើ បានរងផលប៉ះពាល់។ គណៈកម្មាធិការជាតិគ្រប់គ្រងគ្រោះមហន្តរាយ ក៏មិនទាន់បញ្ជាក់ពីវិធានការទប់ស្កាត់ការខូចខាតនៅឡើយទេ។
សូមជម្រាបថា កម្ពុជាទទួលរងឥទ្ធិពលព្យុះទី១១ ឈ្មោះ នូល »NOUL» ចាប់ពីថ្ងៃទី១៨-២០ ខែកញ្ញា។ ព្យុះនេះ បានបង្កឲ្យតំបន់ទំនាបកណ្ដាល និងតំបន់ជួរភ្នំដងរែក រួមទាំងតំបន់មាត់សមុទ្រ មានភ្លៀងធ្លាក់ច្រើន ប្រឈមខ្ពស់នឹងជំនន់ទឹកភ្លៀង ខ្យល់បក់ខ្លាំង និងរលកសមុទ្រខ្ពស់៕
Tag:
កសិកម្ម
ព្យុះនូល
© រក្សាសិទ្ធិដោយ thmeythmey.com