ជាតិ
សង្គមជាតិ
ស្ត្រីវៀតណាមម្នាក់ ជាប់ទោសមួយជីវិត ដោយសារនាំចូលគ្រឿងញៀន៤គីឡូក្រាមពីកម្ពុជា រូបពី Zing News
× តុលាការខេត្ត An Giang ប្រទេសវៀតណាម បានប្រកាសសាលក្រម កាលពីថ្ងៃទី១៧ ខែកញ្ញា ឆ្នាំ២០២០ ដាក់ទោសពលរដ្ឋខ្លួនម្នាក់ឈ្មោះ Do Nhu Y ភេទស្រី អាយុ២៨ឆ្នាំ ឲ្យជាប់ពន្ធនាគារអស់មួយជីវិត ក្រោយរកឃើញថា នាង បាននាំគ្រឿង៤គីឡូក្រាមពីកម្ពុជា ចូលទៅវៀតណាម។ នេះបើតាមការចុះផ្សាយរបស់សារព័ត៌មាន Zing News របស់វៀតណាម។
បើតាម Zing News ស្ត្រីឈ្មោះ Do Nhu Y សារភាពថា នាងពិតជាបាននាំគ្រឿងញៀត៤គីឡូក្រាមពីកម្ពុជា ចូលទៅវៀតណាមមែន ប៉ុន្តែ នាង អះអាងថា នាង មិនមែនជាអ្នកជួញដូរខ្លួនឯងទេ គឺនាង ត្រូវបានគេជួលក្នុងតម្លៃ៥០០ដុល្លារ ឲ្យនាំគ្រឿងញៀន៤គីឡូក្រាមនោះ ពីកម្ពុជា ចូលទៅវៀតណាម។ រូបភាព ដែលថតក្នុងបន្ទប់សវនាការ បង្ហាញថា នាង បានយំ ពេលចៅក្រម ប្រកាសសាលក្រមដាក់ទោសមួយជីវិត។
ប៉ូលិស បានចាប់នាង នៅច្រកព្រំដែន ក្នុងឃុំ Khanh An ស្រុក An Phu ខេត្ត An Giang កាលពីដើមខែមិថុនា ឆ្នាំ២០២០។ ពេលនោះ នាងនិងបុរសពីរនាក់ទៀត កំពុងធ្វើដំណើរតាមព្រំដែន ចូលទៅវៀតណាម។ ប៉ូលិស ចាប់បានតែនាងប៉ុណ្ណោះ ឯបុរសពីរនាក់ទៀត ដែលសង្ស័យថាពាក់ព័ន្ធនឹងគ្រឿងញៀនដែរនោះ បានរត់គេចខ្លួន។
វៀតណាម ត្រូវបានចាត់ទុកជាប្រទេសមួយ ដែលដាក់ទោសធ្ងន់ធ្ងរលើជនល្មើសគ្រឿងញៀន។ មិនត្រឹមតែដាក់ទោសឲ្យជាប់ពន្ធនាគារមួយជីវិតទេ វៀតណាម មានទាំងទោសប្រហារជីវិតថែមទៀត ចំពោះជនល្មើសគ្រឿងញៀន៕
Tag:
វៀតណាម
គ្រឿងញៀន
ទោសមួយជីវិត
© រក្សាសិទ្ធិដោយ thmeythmey.com