អន្តរជាតិ
រូបភាព៖ Reuters
×![]()
ដោយ: ធៀន ភារិន្ទ
យោធាតៃវ៉ាន់ មានសិទ្ធិការពារខ្លួន និងវាយបកត្រលប់វិញ ក្នុងអំឡុងពេលសត្រូវបំពាន ឬគំរាមតៃវ៉ាន់។ នេះបើតាមការលើកឡើងរបស់ក្រសួងការពារជាតិតៃវ៉ាន់ នៅថ្ងៃទី២១ ខែកញ្ញា។ ការព្រមានរបស់តៃវ៉ាន់ ចង់សំដៅទៅចិន ដែលកន្លងមក បានបញ្ជាយន្តហោះចម្បាំងជាច្រើនគ្រឿង ឲ្យហោះចូលដែនអាកាសរបស់កោះមួយនេះ។ 
មួយរយៈចុងក្រោយនេះ ចិន បានធ្វើសមយុទ្ធយោធាជាច្រើនលើកនៅក្បែរច្រកសមុទ្រតៃវ៉ាន់ និងនៅភាគខាងត្បូងតៃវ៉ាន់ ដើម្បីពង្រឹងសមត្ថភាពរបស់ខ្លួន។ តាមរយៈសមយុទ្ធយោធា យន្តហោះចម្បាំងចិន ជាច្រើនគ្រឿង បានហោះចូលដែនអាកាសតៃវ៉ាន់ គោលបំណងព្រមានទីក្រុងតៃប៉ិ និងថ្នាក់ដឹកនាំអាមេរិក ដែលមកធ្វើទស្សនកិច្ចនៅដែនកោះមួយនេះ។ ជាការឆ្លើយតប តៃវ៉ាន់ បានប្រាប់ចិនថា អាចនឹងមានការប៉ះទង្គិចជាមួយគ្នាណាមួយកើតឡើង។
ក្រសួងការពារជាតិតៃវ៉ាន់ នៅថ្ងៃទី២១ ខែកញ្ញា បានចេញសេចក្តីថ្លែងការណ៍ជាថ្មីទៀត ដោយព្រមានទីក្រុងប៉េកាំងពីសកម្មភាពបំពានម្ដងហើយម្ដងទៀតនេះ។ តាមការចុះផ្សាយរបស់ទីភ្នាក់ងារព័ត៌មាន Reuters ក្រសួងការពារជាតិ បានលើកឡើងថា តៃវ៉ាន់ បានកំណត់នីតិវិធីឆ្លើយតបយ៉ាងច្បាស់លាស់មួយចំនួន ស្របពេលមានការបំពាន និងការគំរាមកំហែងយ៉ាងខ្លាំងពីសំណាក់នាវាចម្បាំង និងយន្តហោះចម្បាំងរបស់សត្រូវនៅក្នុងឆ្នាំ២០២០។
បើតាមសេចក្តីថ្លែងការណ៍ដដែល តៃវ៉ាន់ បានបញ្ជាក់ជំហរយ៉ាងច្បាស់ៗថា ខ្លួនមានសិទ្ធិក្នុងការពារខ្លួន និងវាយបកត្រលប់វិញ ដើម្បីការពារសកម្មភាពបំពានមួយចំនួន។ តៃវ៉ាន់ចាត់ទុកការតបតណាមួយរបស់ខ្លួន ជាការគោរពតាមវិធានការ «មិនរីកសាយនៃជម្លោះ និងមិនបង្កឧប្បទ្ទវហេតុ»។ ទន្ទឹមនេះ តៃវ៉ាន់ បានអះអាងថា ខ្លួននឹងមិនបង្កជម្លោះណាមួយឡើយ ហើយខ្លួនក៏មិនខ្លាចសត្រូវដែរ។
សូមបញ្ជាក់ថា នាថ្ងៃទី១៨ ខែកញ្ញាកន្លងទៅ ចិនបានបញ្ជូនយន្តហោះចម្បាំងចំនួន ១៨គ្រឿង បូករួមទាំងយន្តហោះទម្លាក់គ្រាប់បែកផ្សេងទៀតចូលមកក្នុងច្រកសមុទ្រតៃវ៉ាន់ ដើម្បីព្រមានអាមេរិក និងតៃវ៉ាន់ ស្របពេលមន្ត្រីជាន់ខ្ពស់ក្រសួងការពារជាតិអាមេរិកធ្វើទស្សនកិច្ចនៅតៃប៉ិ។
រឿងតៃវ៉ាន់នេះ ចិនបានប្រកាសប្រាប់ប្រទេសទាំងអស់ថា តៃវ៉ាន់ គឺជាខេត្តមួយរបស់ខ្លួន តាមរយៈគោលនយោបាយ «ចិនតែមួយ»។ ផ្ទុយទៅវិញ តៃវ៉ាន់ មិនបានទទួលស្គាល់ចិនឡើយ និងចាត់ទុកខ្លួនឯងថា គឺជារដ្ឋដាច់ដោយឡែកមួយពីចិន ហើយជំហរផ្ដាច់ខ្លួននេះ បានកើនឡើងយ៉ាងរហ័សក្រោមអាណត្តិលោកស្រី Tsai Ing-wen ខណៈចិនក៏ព្រមានហើយថា ខ្លួនមិនរអានឹងកម្លាំងបាយដើម្បីគ្រប់គ្រងតៃវ៉ាន់ឡើយ៕
Tag:
តៃវ៉ាន់
ចិន
© រក្សាសិទ្ធិដោយ thmeythmey.com
