សង្គមអន្តរជាតិ
អន្តរជាតិ
ជប៉ុន នឹងផ្ដល់លុយឲ្យគូស្វាមីភរិយាថ្មីថ្មោង ដើម្បីជំរុញកំណើនអត្រាកំណើតទារក
×![]()
គូស្វាមីភរិយាជប៉ុនដែលរៀបការចាប់ពីខែមេសា ឆ្នាំ២០២១តទៅ នឹងមានលទ្ធភាពទទួលបានប្រាក់ឧបត្ថម្ភរហូតដល់ ៦០ម៉ឺនយេន (ជាង៥៧៥៣ដុល្លារ) ដើម្បីចែតចាត់ការចំណាយផ្សេងៗ ខណៈពួកគេត្រៀមចាប់ផ្ដើមជីវិតគ្រួសារ។ លុយឧបត្ថម្ភនេះ ស្ថិតក្នុងផ្នែកមួយនៃកម្មវិធីគាំទ្រអ្នករៀបការថ្មីរបស់រដ្ឋាភិបាលជប៉ុនក្នុងគោលដៅដោះស្រាយបញ្ហាអត្រាកំណើតទាបរបស់ប្រជាជាតិអាស៊ីមួយនេះ។ 
ជប៉ុន កំពុងជួបប្រទះបញ្ហាអត្រាកំណើតទាប ដែលបង្កឡើងមួយផ្នែកធំដោយនិន្នាការប្រជាជនជប៉ុន ដែលរៀបការយឺត ឬសម្រេចមិនរៀបការតែម្ដង។ ដោយមើលឃើញពីបញ្ហាចាក់ឫសជ្រៅក្នុងសង្គមជប៉ុនបែបនេះ រដ្ឋាភិបាលជប៉ុន នឹងព្យាយាមលើកទឹកចិត្តឲ្យពលរដ្ឋខ្លួនរៀបការ ដោយការដាក់ចេញកម្មវិធីឧបត្ថម្ភគាំទ្រដល់អនាគតគូស្វាមីភរិយាជប៉ុន ។ នេះបើតាមយោងតាមប្រភពរដ្ឋាភិបាលជប៉ុន ដោយដកស្រង់ចុះផ្សាយដោយទីភ្នាក់ងារព័ត៌មាន Kyodo នៅថ្ងៃទី២០ ខែកញ្ញា ។
តាមប្រភពព័ត៌មានដដែល ដើម្បីមានសិទ្ធិចូលរួមក្នុងកម្មវិធីនេះ ទាំងប្ដី និងប្រពន្ធជនជាតិជប៉ុន ត្រូវតែមានអាយុតិចជាង ៤០ឆ្នាំ គិតត្រឹមថ្ងៃចុះឈ្មោះរៀបការ។ លក្ខខណ្ឌមួយទៀត គឺ អ្នកទាំងពីរ ត្រូវមានប្រាក់ចំណូលប្រចាំឆ្នាំសរុបចូលគ្នាទាបជាង ៥,៤លានយេន ឬជាង៥ម៉ឺនដុល្លារ។
យ៉ាងណាមិញ គិតត្រឹមខែកក្កដា ឆ្នាំ២០២០ ការអនុវត្តកម្មវិធីគាំទ្រហិរញ្ញវត្ថុនេះ ពុំទាន់ត្រូវបានធ្វើឡើងទូទាំងប្រទេសនៅឡើយទេ ពោលគឺមានតែ១៥ភាគរយប៉ុណ្ណោះក្នុងចំណោមទីក្រុងសរុបរបស់ប្រទេសជប៉ុន។ ហេតុផលនោះគឺ ទីក្រុងទាំងនេះ ត្រូវបង់ពាក់កណ្ដាលនៃការចំណាយក្នុងកម្មវិធីនេះ។
ក៏ប៉ុន្តែ រដ្ឋាភិបាលកណ្ដាលជប៉ុន នឹងចេញថ្លៃចំណាយរហូតដល់២ភាគ៣នៃការចំណាយសរុបក្នុងកម្មវិធីនេះវិញ ដែលនឹងយកចេញពីកញ្ចប់ថវិកាជាតិ ឆ្នាំ២០២១ ខាងមុខ។ នេះគឺដើម្បីលើកទឹកចិត្តឲ្យទីក្រុងជប៉ុនច្រើនថែមទៀតអនុវត្តកម្មវិធីគាំទ្រគូស្វាមីភរិយាថ្មីថ្មោងនេះ។
សូមបញ្ជាក់ថា កម្មវិធីនេះ គឺជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលជប៉ុនក្នុងគោលដៅដោះស្រាយបញ្ហាអត្រាកំណើតទាបក្នុងប្រទេស ខណៈមានទារកទត្រឹម ៨៦៥ ០០០នាក់ ប៉ុណ្ណោះ ចាប់កំណើតក្នុងឆ្នាំ២០១៩ ដែលជាតួលេខទាបបំផុត។
ការផ្ដល់លុយឧបត្ថម្ភបែបនេះ គឺជាវិធីសាស្ត្រមានប្រសិទ្ធភាពក្នុងការលើកទឹកចិត្តឲ្យប្រជាជនរៀបការ ព្រោះថា បុរសជប៉ុននៅលីវអាយុចន្លោះ២៥-៣៤ឆ្នាំ ប្រមាណ២៩ភាគរយ និងស្ត្រីជប៉ុននៅលីវប្រមាណ១៧,៨ភាគរយ បានលើកឡើងពីបញ្ហាខ្វះខាតលុយកាក់ជាមូលហេតុដែលពួកគេសម្រេចមិនរៀបការ។ នេះបើតាមការស្ទង់មតិក្នុងឆ្នាំ២០១៥ ដោយវិទ្យាស្ថានជាតិសន្តិសុខសង្គមនិងប្រជាជនជប៉ុន៕
Tag:
ជប៉ុន
អាពាហ៍ពិពាហ៍
អត្រាកំណើតទាប
© រក្សាសិទ្ធិដោយ thmeythmey.com
