ជាតិ
ដាក់រូបអង្គរសម្គាល់វៀតណាម! ទីភ្នាក់ងារទេសចរណ៍អូស្ត្រាលីថាជាកំហុសបច្ចេកទេស ហើយបានសុំទោស និងកែសម្រួល
× ទីភ្នាក់ងារទេសចរណ៍អូស្ត្រាលី «Wendy Wu Tours» ដ៏ល្បីរបស់អូស្ត្រាលី បានបង្កកំហុសមួយដ៏ធំ ដោយបានផ្សព្វផ្សាយពីប្រទេសវៀតណាម (Vietnam) ប៉ុន្តែបែរជាដាក់រូបប្រាសាទអង្គរវត្ត និមិត្តរូបរបស់កម្ពុជាទៅវិញ។ ពាក់ព័ន្ធករណីនេះ មន្ត្រីជំនាញក្រសួងទេសចរណ៍ បានសម្តែងប្រតិកម្ម កាលពីថ្ងៃទី២១ ខែកញ្ញា ហើយក្រុមហ៊ុនអាកាសចរណ៍បានសូមអភ័យទោស និងយល់ព្រមកែសម្រួលឡើងវិញ។ នេះបើតាមការបញ្ជាក់របស់ក្រសួងទេសចរណ៍។
លោក ប្រាក់ វុទ្ធី ប្រធាននាយកដ្ឋានសិក្សាទីផ្សារ និងផ្សព្វផ្សាយទេសចរណ៍ក្រៅប្រទេស ក្រសួងទេសចរណ៍ បានអះអាងកាលពីព្រឹកថ្ងៃទី២២ ខែកញ្ញានេះថា ក្រសួងបានទាក់ទងទៅកាន់ទីភ្នាក់ងារ Wendy Wu Tours ដើម្បីកែសម្រួលចំពោះការយករូបប្រាសាទអង្គរវត្តរបស់កម្ពុជា ទៅភ្ជាប់ជាមួយពាក្យសម្គាល់ប្រទេសវៀតណាម។ ក្រុមហ៊ុនបានរក្សាទុករូបអង្គរដដែល ប៉ុន្តែបានប្តូរពាក្យពី VIETNAM ទៅជា SOUTHEAST ASIA ។ ខ្លឹមសារនៃការផ្សព្វផ្សាយនោះ គឺក្រុមហ៊ុនចង់ទាក់ទាញទេសចរណ៍មកកាន់តំបន់អាស៊ីអាគ្នេយ៍សម្រាប់គោលដៅទេសចរណ៍ ២០២១-២០២២ ដែលមាន ដូចជា កោះ Borneo, កម្ពុជា, ឥណ្ឌូណេស៊ី, ឡាវ, មីយ៉ាន់ម៉ា, ហ្វីលីពីន, ថៃ និងវៀតណាម។
បើតាម លោក តុប សុភ័ក្ត្រ អ្នកនាំពាក្យក្រសួងទេសចរណ៍ ក្រុមហ៊ុន Wendy Wu Tours បានទទួលស្គាល់ថា វាជាកំហុសបច្ចេកទេសក្នុងការរចនា (Design) ប៉ុន្តែទោះបីជាយ៉ាងណា ក្រសួងចង់ឲ្យមានការសុំទោសជាសាធារណៈ ខណៈក្រុមហ៊ុនបរទេសមួយនេះ មិនស្ថិតនៅក្រោមការគ្រប់គ្រងរបស់ស្ថាប័នកម្ពុជានោះឡើយ។
ទោះបីជាយ៉ាងណាក៏ដោយ ក្រសួងទេសចរណ៍កត់សម្គាល់ថា ភ្នាក់ងារ «Wendy Wu Tours» បានរួមចំណែកផ្សព្វផ្សាយពីកន្លងមក មុននឹងមានកំហុសឆ្គងអចេតនាមួយនេះ។ ក្រសួងបានបញ្ជាក់ថា មូលហេតុដែលទីភ្នាក់ងារ Wendy Wu Tours មិនប្ដូរមកជា CAMBODIA វិញនោះ ក៏ដោយសារក្រុមហ៊ុនចង់បង្ហាញថា «ប្រាសាទអង្គរវត្តរបស់កម្ពុជា» ជានិម្មិតរូបតំណាងឱ្យតំបន់អាស៉ីអាគ្នេយ៍លើនៅគេហទំព័ររបស់ខ្លួន ពីព្រោះប្រាសាទអង្គរវត្តជាសម្បត្តិបេតិភណ្ឌដែលពិភពលោកស្គាល់ច្រើនជាងគេ។
ទោះបីជាទីភ្នាក់ងារ Wendy Wu Tours បានកែសម្រួលនៅលើទំព័រមុខនៃគេហទំព័ររបស់ខ្លួនរួចហើយក្ដី ប៉ុន្តែនៅមានមួយកន្លែងទៀតដែលក្រុមហ៊ុនមិនទាន់បានកែសម្រួលអស់ គឺនៅពេលចូលទៅក្នុងផ្ទាំង Brochures គេនៅឃើញមានរូបប្រាសាទអង្គរវត្តដែលដាក់ពាក្យ VIETNAM នៅពីលើនៅឡើយ។ ត្រង់ចំណុចនេះ ក្រសួងទេសចរណ៍ បន្តទាក់ទងទៅកាន់ក្រុមហ៊ុនដើម្បីសម្រួលឱ្យបានគ្រប់ជ្រុងជ្រោយ៕
© រក្សាសិទ្ធិដោយ thmeythmey.com