សង្គមអន្តរជាតិ
អន្តរជាតិ
ប៉ូលិសក្រុងញូវយ៉កម្នាក់ ត្រូវចាប់ខ្លួននិងចោទប្រកាន់ពីបទធ្វើចារកិច្ចឲ្យចិន រថយន្តប៉ូលិសទីក្រុងញូវយ៉ក។ រូបភាព AFP
× អាជ្ញាធរអាមេរិក បានចោទ ជនជាតិទីបេម្នាក់ដែលជាមន្ត្រីប៉ូលិសនៅក្នុងទីក្រុងញូវយ៉ក ពីបទធ្វើចារកិច្ចឲ្យទីក្រុងប៉េកាំង។ ក្នុងដីកាចេញផ្សាយថ្ងៃទី២១ ខែកញ្ញា រូបគេធ្វើសកម្មភាពចាប់ពីឆ្នាំ ២០១៨ ដល់២០២០។
ជនជាតិទីបេម្នាក់ ដែលមានអាយុ ៣៣ឆ្នាំ និងជាមន្ត្រីប៉ូលិសនៅក្នុងសង្កាត់ Queens នៃទីក្រុងញូវយ៉ក ត្រូវបានអាជ្ញាធរអាមេរិក ចាប់ខ្លួនពីបទប្រមូលព័ត៌មាននៅក្នុងសហគមន៍ទីបេ និងប្រភពព័ត៌មានសំខាន់ៗមួយចំនួនឲ្យបក្សកុម្មុយនិស្តចិន។ បើតាមដីការចោទប្រកាន់របស់អាជ្ញាធរអាមេរិក បុរសរូបនេះ គឺធ្វើតាមបញ្ជារបស់សមាជិកម្នាក់នៃកុងស៊ុលចិន ប្រចាំទីក្រុងញូវយ៉ក។
ជាមួយគ្នានេះ ដីកាចោទដដែល បានបញ្ជាក់ថា ជនជាតិទីបេរូបនេះ បានអនុញ្ញាតឲ្យមន្ត្រីកុងស៊ុលចិន ចូលរួមក្នុងកម្មវិធីមួយចំនួន ដែលរៀបចំដោយនាយកដ្ឋានប៉ូលិសក្រុងញូវយ៉កផងដែរ។ តាមរយៈកិច្ចការចារកិច្ច ប៉ូលិសក្រុងញូវយ៉ករូបនេះ ត្រូវបានចិនផ្តល់ប្រាក់ចំនួន ១ម៉ឺនដុល្លារ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ក្រៅពីបទចារកិច្ច បុរសរូបនេះ រងបទចោទប្រកាន់ផ្សេងទៀតដូចជា ការបម្រើបរទេសនៅលើទឹកដីអាមេរិក ការរារាំងប្រតិបត្តិការសេវាសាធារណៈ និងការបោកប្រាស់ជាដើម។
តាមការបញ្ជាក់របស់អ្នកនាំពាក្យរដ្ឋអាជ្ញាក្នុងទីក្រុងញូវយ៉ក ជនជាតិទីបេរូបនេះ ត្រូវបានគេបញ្ជូនទៅតុលាការហើយ និងកំពុងស្ថិតក្នុងបន្ទាប់ឃុំខ្លួនបណ្តោះអាសន្ន។ ចំណែកនាយកដ្ឋានប៉ូលិសក្រុងញូវយ៉កវិញ បានអះអាងថា ប៉ូលិសដែលចោទពីបទចារកិច្ចនេះ ត្រូវបានព្យួរការងារ និងមិនទទួលបានប្រាក់បៀវត្សឡើយ។
សូមបញ្ជាក់ថា បុរសទីបេរូបនេះ បានកើតនៅក្នុងប្រទេសចិន ដែលក្រោយមកបានទទួលសិទ្ធិជ្រកកោននយោបាយនៅអាមេរិក ក្រោមហេតុផលថាអាជ្ញាធរចិន បានធ្វើទណ្ឌកម្មលើរូបលោកព្រោះជាជនជាតិភាគតិចទីបេ។ ប៉ុន្តែ ការស៊ើបអង្កេតមួយបានបង្ហាញថា ឪពុកម្តាយរបស់បុរសនេះ គឺជាសមាជិកបក្សកុម្មុយនិស្តចិន៕
© រក្សាសិទ្ធិដោយ thmeythmey.com