ជាតិ
ជ្រលងសម្ពាធទាបនាំឲ្យតំបន់សមុទ្រអាចមានខ្យល់បក់ខ្លាំង និងរលកខ្ពស់ពីថ្ងៃទី២៤-២៧ ខែកញ្ញា
×![]()
ស្ថានភាពអាកាសធាតុ នឹងមានការប្រែប្រួល ដោយសារជ្រលងសម្ពាធទាប នឹងអូសបន្លាយឆ្លងកាត់ភាគខាងជើងប្រទេសកម្ពុជា ខណៈបណ្ដាខេត្តនៅតំបន់សមុទ្រ អាចនឹងមានភ្លៀងធ្លាក់រាយប៉ាយក្នុងកម្រិតពីមធ្យមទៅច្រើន។ នៅថ្ងៃទី២៤-២៧ ខែកញ្ញា តំបន់មាត់សមុទ្រអាចនឹងមានខ្យល់បោកបក់ខ្លាំង និងរលកសមុទ្រខ្ពស់ៗ។ នេះបើតាមសេចក្ដីជូនដំណឹងរបស់ក្រសួងធនធានទឹក និងឧតុនិយម នៅថ្ងៃទី២២ ខែកញ្ញា ឆ្នាំ២០២០។
ការព្យាករអាកាសធាតុនេះ បានឱ្យដឹងថា ចាប់ពីថ្ងៃទី២៣-២៩ ខែកញ្ញា នេះ ស្ថានភាពបែបនេះ នឹងធ្វើឱ្យប្រទេសកម្ពុជាទាំងមូលមានភ្លៀងធ្លាក់រាយប៉ាយ ក្នុងកម្រិតពីមធ្យមទៅច្រើន។ ចំណែកឯបណ្ដាខេត្តនៅតំបន់វាលទំនាបកណ្ដាលវិញ ភ្លៀងអាចនឹងធ្លាក់ក្នុងកម្រិតពីមធ្យមទៅច្រើនដូចគ្នា ហើយមានលាយឡំជាមួយនឹងបាតុភូត ផ្គរ រន្ទះ និងខ្យល់កន្ត្រាក់ទៀតផង។ដោយឡែកបណ្ដាខេត្តនៅតំបន់ជួរភ្នំដងរែក និងខ្ពង់រាបឦសានវិញ ក៏អាចនឹងមានភ្លៀងធ្លាក់ដែរ ប៉ុន្តែក្នុងកម្រិតពីមធ្យមទៅបង្គួរ។
ក្រសួងធនធានទឹក អំពាវនាវឱ្យប្រជាពលរដ្ឋនៅតំបន់មាត់សមុទ្រ និងតំបន់វាលទំនាបកណ្ដាល មានការប្រុងប្រយ័ត្នខ្ពស់ចំពោះបាតុភូត ខ្យល់កន្ត្រាក់ ផ្គរ និងរន្ទះ ផ្សេងៗ ដែលអាចនឹងកើតមានឡើងជាយថាហេតុ៕
Tag:
អាកាសធាតុ
© រក្សាសិទ្ធិដោយ thmeythmey.com
