COVID-19
អន្តរជាតិ
តុលាការចិន កាត់ទោសសេដ្ឋីម្នាក់ដែលរិះគន់លោក ស៊ី ឲ្យជាប់គុក១៨ឆ្នាំពីបទពុករលួយ
× លោក Ren Zhiqiang សេដ្ឋីអចលទ្រព្យ និងជាអ្នកចេញមុខរិះគន់ប្រធានាធិបតីចិន ស៊ី ជិនភីង ត្រូវបានតុលាការចិន កាត់ទោសឲ្យជាប់ពន្ធនាគាររយៈពេល១៨ឆ្នាំ ពីបទប្រព្រឹត្តអំពើពុករលួយ សូកប៉ាន់ និងលួចបន្លំមូលនិធិសាធារណៈ។ នេះបើតាមទីភ្នាក់ងារព័ត៌មាន Reuters ។
ជាសេដ្ឋីអចលនទ្រព្យ និងមន្ត្រីម្នាក់ក្នុងជួរបក្សកុម្មុយនីស្តចិន លោក Ren Zhiqiang បានបាត់ខ្លួនពីទីសាធារណៈនៅក្នុងខែមីនា បន្ទាប់ពីលោកសសេរអត្ថបទរិះគន់ប្រធានាធិបតីចិន ស៊ី ជិនភីងខ្លាំងៗពាក់ព័ន្ធវិធានការទប់ស្កាត់ជំងឺ COVID-19 ។លោក Ren ជាកូនប្រុសអតីតអនុរដ្ឋមន្ត្រីពាណិជ្ជកម្ម និងជាសមាជិកបក្សកុម្មុយនីស្តចិនរាប់ទសវត្សរ៍ និងមានទំនាក់ទំនងជិតស្និទ្ធជាមួយមន្ត្រីកំពូលៗក្នុងបក្ស។
ក្នុងសវនាការនៅថ្ងៃទី២២ ខែកញ្ញា តុលាការចិននៅទីក្រុងប៉េកាំង បានចេញសាលក្រមដាក់គុកលោករយៈពេល១៨ឆ្នាំ ដោយបានលួចបន្លំទឹកប្រាក់សាធារណៈចំនួន៧,៤ លានដុល្លារ និងទទួលសំណូក ១៨ម៉ឺនដុល្លារ។ សេចក្តីប្រកាសរបស់តុលាការ បានបញ្ជាក់ថា លោក Ren វ័យ៦៩ឆ្នាំ ស្ម័គ្រចិត្តសារភាពរាល់ទោសកំហុសទាំងអស់ ហើយមិនប្ដឹងជំទាស់ឧទ្ធរណ៍ឡើយ។ តុលាការ ក៏ពិន័យឲ្យលោក Ren បង់ប្រាក់៦២ម៉ឺនដុល្លារផងដែរ។ នេះបើតាមទីភ្នាក់ងារព័ត៌មាន Reuters ។
ត្រឡប់ទៅខែមីនាបន្តិច លោក Ren បានបញ្ចេញសំណេររិះគន់លោកប្រធានាធិបតីស៊ី លើបណ្តាញសង្គមចិន Weibo ដែលក្រោយមកត្រូវបានអាជ្ញាធរចិនលុបចោល។ ក្នុងសំណេររិះគន់នោះ លោកបានលើកឡើងថាដោយសំដៅជំងឺ COVID-19 ថា ៖« ជំងឺឆ្លងនេះ បានបង្ហាញពីការពិតដែលបក្ស និងរដ្ឋាភិបាលចិនខ្វល់តែពីការការពារផលប្រយោជន៍ផ្ទាល់ខ្លួន ហើយស្តេច(ប្រធានាធិបតីស៊ី) ខ្វល់តែពីផលប្រយោជន៍ និងតំណែងប៉ុណ្ណោះ»។
បក្សកុម្មុយនីស្តចិន ក៏បានបើកការស៊ើបអង្កេតទៅលើលោក Ren ក្នុងខែមេសា។ លោកត្រូវបានបក្សបណ្តេញចេញនៅក្នុងខែកក្កដា។ នៅថ្ងៃទី១១ ខែកញ្ញាតុលាការក្រុងប៉េកាំង ចាប់ផ្តើមជំនុំជម្រះរឿងក្តី ដោយមានវត្តមានប៉ូលិសការពារបរិវេណអាគារ ខណៈដែលមានវត្តមានរបស់អ្នកគាំទ្រលោក Ren ផងដែរ។
អ្នកជំនាញសិទ្ធិមនុស្ស បានចោទបក្សកុម្មុយនីស្តចិន និងលោក ស៊ី ថា បានប្រើប្រាស់ការបោសសម្អាតអំពើពុករលួយដើម្បីបំបិទសំឡេងអ្នកប្រឆាំង។ តាំងពីឆ្នាំ២០១២ ពេលដែលលោក ស៊ី ឡើងកាន់អំណាចមក រដ្ឋាភិបាលចិន បានបង្ក្រាបលើក្រុមសង្គមស៊ីវិល ដោយរឹតត្បិតសិទ្ធិក្នុងការបញ្ចេញមតិ ក៏ដូចជាឃុំខ្លួនសកម្មជន និងមេធាវីរាប់រយនាក់៕
Tag:
ចិន
ស៊ី ជិនភីង
Ren Zhiqiang
© រក្សាសិទ្ធិដោយ thmeythmey.com