មហាសន្និបាតអង្គការសហប្រជាជាតិ (UN) ឆ្នាំ២០២០នេះ នៅតែក្តៅគគុក ទោះជារៀបចំឡើងតាមប្រព័ន្ធអនឡាញក៏ដោយក្តី។ ប្រធានាធិបតីអាមេរិក ដូណាល់ ត្រាំ បានចោទចិនថា ទុកឲ្យជំងឺ COVID-19 រាតត្បាតពេញពិភពលោក ហើយទាមទារឲ្យ UN ចាប់ចិនទទួលខុសត្រូវចំពោះទង្វើខ្លួននេះ។ ចំណែក ប៉េកាំង បានច្រានចោលការទម្លាក់កំហុសលោក ត្រាំ មកលើខ្លួន ហើយចោទលោក ត្រាំ វិញ ថា កុហក និងប្រើវេទិកា UN ដោយបំពានដើម្បីបង្ករឿងក្តីក្រហាយ និងការបំបែកបំបាក់។
ក្នុងវីដេអូសុន្ទរកថាថតទុកដែលចាក់បញ្ចាំងនៅថ្ងៃទី២២ ខែកញ្ញា ក្នុងសាលមហាសន្និបាត UN លោក ដូណាល់ ត្រាំ បានចោទប្រកាន់រដ្ឋាភិបាលក្រុងប៉េកាំងថា អនុញ្ញាតឲ្យជំងឺ COVID-19 រាតត្បាតពេញពិភពលោក។ មេដឹកនាំរូបនេះសង្កត់ធ្ងន់ថា៖«អង្គការសហប្រជាជាតិ ត្រូវតែចាប់ចិនឲ្យទទួលខុសត្រូវចំពោះទង្វើពួកគេ»។
លោក ត្រាំ បានព្យាយាមបង្វែររលករិះគន់ប្រជាជនអាមេរិកលើវិធានការទប់ទល់COVID-19 របស់រដ្ឋបាលលោក ដោយទម្លាក់កំហុសលើចិនជំនួសវិញ។ ប្រធានាធិបតីអាមេរិករូបនេះ បានចោទរដ្ឋាភិបាលក្រុងប៉េកាំងថា បើកផ្លូវឲ្យប្រជាជនខ្លួនចាកចេញពីប្រទេសចិននៅដំណាក់កាលដំបូងនៃការផ្ទុះរាលដាល COVID-19 ខណៈបិទខ្ទប់ការធ្វើដំណើរក្នុងស្រុក។
«រដ្ឋាភិបាលចិន និងអង្គការសុខភាពពិភពលោក ដែលគ្រប់គ្រងដោយចិន បានប្រកាសទាំងខុសឆ្គងថា គ្មានភស្តុតាងណាយមួយដែលបង្ហាញពីការឆ្លងពីមនុស្សទៅមនុស្សឡើយ»។ លោក ដូណាល់ ត្រាំ លើកឡើងបែបនេះ មុននឹងបន្ថែមថា ក្រោយមកពួកគេបានកុហកទៀតថា មនុស្សដែលគ្មានរោគសញ្ញាជំងឺ នឹងមិនឆ្លងជំងឺនេះទៅអ្នកដទៃនោះទេ។
យ៉ាងណាមិញ អគ្គរដ្ឋទូតចិនប្រចាំអង្គការសហប្រជាជាតិ លោក Zhang Jun បានបដិសេធការចោទប្រកាន់់របស់លោក ត្រាំ ប្រឆាំងចិន ដោយចាត់ទុកថា គ្មានមូលដ្ឋានច្បាស់លាស់ ។ តាមការចុះផ្សាយរបស់ទីភ្នាក់ងារព័ត៌មាន Reuters លោកសង្កត់ធ្ងន់ថា ពាក្យកុហកដែលនិយាយដដែលៗរាប់ពាន់ដងនៅតែជាពាក្យកុហក ហើយចោទក្រុងវ៉ាស៊ីនតោនថា រំលោភបំពានវេទិកា UN ដើម្បីបង្ករឿងក្តៅក្រហាយ និងបង្កើតការបែកបាក់គ្នា។
ដោយឡែក ប្រធានាធិបតីចិន ស៊ី ជិនភីង ក្នុងវីដេអូថតទុកមុនដែរនោះ បានសង្កត់ធ្ងន់ទៅកាន់មហាសន្និបាត UN ថា ប្រទេសចិន គ្មានបំណងប្រយុទ្ធទាំងក្នុងសង្គ្រាមត្រជាក់ ឬសង្គ្រាមក្តៅជាមួយប្រទេសណាមួយឡើយ។ ទន្ទឹមនេះ មេដឹកនាំរូបនេះក៏បានស្នើឲ្យមានកិច្ចសហប្រតិបត្តិការបន្ថែមទៀតក្នុងគោលដៅទប់ទល់នឹងជំងឺរាតត្បាតសកល COVID-19 ។
ក្រៅពីបញ្ហាជំងឺរាតត្បាតសកល COVID-19 ដែលបច្ចុប្បន្នសម្លាប់មនុស្សជាង៩៦,៧ម៉ឺននាក់នៅទូទាំងពិភពលោក លោក ត្រាំ ក៏បានប្រាប់ឲ្យអង្គការសហប្រជាជាតិផ្តោតលើបញ្ហាពិតប្រាកដរបស់ពិភពលោក។ ត្រង់នេះ លោកបានរៀបរាប់បញ្ហាដូចជា អំពើភេរវកម្ម ការគាបសង្កត់លើស្ត្រី ពលកម្មដោយបង្ខំ ការជួញដូរគ្រឿងញៀន ការជួញដូរផ្លូវភេទនិងមនុស្ស និងការកាត់ទោសផ្នែកសាសនា ជាដើម។
ថ្លែងទៅកាន់មហាសន្និបាត UN នេះដែរ ប្រធានាធិបតីបារាំង អេម៉ានុយអែល ម៉ាក្រុង បានអំពាវនាវឲ្យបង្កើតបេសកកម្មអន្តរជាតិមួយក្រោមឆត្រ UN ដើម្បីទៅស៊ើបអង្កេតបញ្ហារំលោភសិទ្ធិមនុស្សលើជនជាតិវីហ្ក័រកាន់សាសនាឥស្លាមនៅតំបន់ស៊ីនជាំង។ បើតាមរបាយការណ៍ UN កន្លងមក ជនម៉ូស្លីមវីហ្ក័រ ប្រមាណ១លាននាក់ ត្រូវបានចាប់ឃុំឃាំងនៅមន្ទីរលត់ដំ។
ចំណែកអគ្គលេខាធិការអង្គការសហប្រជាជាតិ អាន់តូនីញ៉ូ ហ្គូតេរ៉េស បានព្រមានថា ពិភពលោក កំពុងធ្វើដំណើរក្នុងទិសដៅដ៏គ្រោះថ្នាក់បំផុតមួយក្នុងចន្លោះភាពតានតឹងរវាងចិននិងសហរដ្ឋអាមេរិក។ លោកសង្កត់ធ្ងនថា៖«យើងត្រូវប្រឹងប្រែងកាច់ចង្កូតចេញពីសង្គ្រាមត្រជាក់ថ្មីមួយនេះ»៕