សង្គមអន្តរជាតិ
អន្តរជាតិ
បង្ហាញមុខនៅមហាសន្និបាត UN លើកទីមួយ លោកឌូទើតេ លើកឡើងពីសាលក្រមសមុទ្រចិនខាងត្បូង
ប្រធានាធិបតីហ្វីលីពីន លោករ៉ូឌ្រីហ្គោ ឌូទើតេ នៅក្នុងមហាសន្និបាតអង្គការសហប្រជាជាតិលើកទី៧៥ នៅថ្ងៃទី២២ ខែកញ្ញា ឆ្នាំ២០២០។ រូបភាព៖ AFP
×![]()
ដោយ: ធៀន ភារិន្ទ
ប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ នៅថ្ងៃទី២៣ ខែកញ្ញា (ម៉ោងនៅហ្វីលីពីន) បានលើកឡើងជាប្រវត្តិសាស្ត្រ ពីសាលក្រមរបស់តុលាការមជ្ឈត្តការអចិន្ត្រៃយ៍ក្រុងឡាអេ (PCA) លើជម្លោះសមុទ្រចិនខាងត្បូងឆ្នាំ២០១៦ នៅក្នុងមហាសន្និបាតអង្គការសហប្រជាជាតិ (UNGA) លើកទី៧៥។ នេះជាសុន្ទរកថាលើកដំបូងរបស់លោក ឌូទើតេ នាកិច្ចប្រជុំនេះ។ 
តាមរយៈវីដេអូថតទុកមុនដែលបានចាក់នៅក្នុងមហាសន្និបាតអង្គការសហប្រជាជាតិលើកទី៧៥ លោក រ៉ូឌ្រីហ្គោ ឌូទើតេ ប្រធានាធិបតីហ្វីលីពីន បានលើកឡើងពីបញ្ហាសមុទ្រចិនខាងត្បូង ដែលជាជម្លោះជាមួយចិន និងបណ្តាប្រទេសអាស៊ានផ្សេងទៀត។ ក្នុងនោះ ប្រមុខរដ្ឋហ្វីលីពីនរូបនេះ បានលើកឡើងជាលើកដំបូងពីសាលក្រមរបស់តុលាការមជ្ឈត្តការអចិន្ត្រៃយ៍ក្រុងឡាអេ។
ហ្វីលីពីន នៅតែបន្តការប្តេជ្ញារបស់ខ្លួននៅក្នុងសមុទ្រចិនខាងត្បូង ដោយផ្អែកទៅតាមអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ១៩៨២ និងសេចក្តីសម្រេចរបស់តុលាការមជ្ឈត្តការអចិន្ត្រៃយ៍ក្រុងឡាអេ។ លោក ឌូទើតេបានបញ្ជាក់បែបនេះ ដោយបន្ថែមថា៖ « ពេលនេះសាលក្រម គឺជាផ្នែកនៃច្បាប់អន្តរជាតិ មានតម្លៃលើសពីការសម្របសម្រួល, ការព្រមព្រៀងរបស់រដ្ឋាភិបាល ដែលអាចបន្ថយតម្លៃ ឬបោះបង់ចោល»។
ក្នុងន័យនេះ លោកប្រធានាធិបតីហ្វីលីពីន អះអាងថា លោកជំទាស់ជាដាច់ខាតរាល់ការប៉ុនប៉ងបំផ្លាញសេចក្តីសម្រេចPCA។ បន្ថែមពីលើនេះ ហ្វីលីពីនបានស្នើឲ្យប្រទេសជាច្រើនទៀត គាំទ្រសាលក្រមមួយនេះ និងបង្ហាញជំហររបស់ខ្លួនផងដែរ។ បើតាមលោកឌូទើតេ ការគាំទ្រសេចក្តីសម្រេចរបស់PCA គឺប្រៀបទៅនឹងជ័យជម្នះនៃហេតុផល លើភាពឆេវឆាវ, ច្បាប់ លើភាពគ្មានសណ្តាប់ធ្នាប់ និងមិត្តភាព លើការចង់បានលើសលុប។
រដ្ឋាភិបាលហ្វីលីពីនបានសម្រេចប្តឹងចិនលើរឿងអធិបតេយ្យក្នុងសមុទ្រចិនភាគខាងត្បូង ទៅតុលាការមជ្ឈត្តការអចិន្ត្រៃយ៍ក្រុងឡាអេ តាំងពីឆ្នាំ២០១៣មកម្លេះ ដែលស្ថិតនៅក្នុងអាណត្តិដឹកនាំរបស់ អតីតប្រធានាធិបតីលោក Benigno Aquino III ដោយផ្អែកទៅតាមអនុសញ្ញាសហប្រជាជាតិស្តីពីច្បាប់សមុទ្រឆ្នាំ១៩៨២។
នៅក្នុងឆ្នាំ២០១៦ តុលាការមជ្ឈត្តការអចិន្ត្រៃយ៍ក្រុងឡាអេ បានកាត់សេចក្តីឲ្យហ្វីលីពីនឈ្នះចិន លើជម្លោះសមុទ្រចិនខាងត្បូង ពោលគឺបន្ទាប់ពីលោកឌូទើតេ ឡើងកាន់តែជាប្រធានាធិបតី បានប៉ុន្មានថ្ងៃប៉ុណ្ណោះ។ ជាការឆ្លើយតបចិន បានបដិសេធមិនទទួលស្គាល់ និងគោរពតាមសេចក្តីសម្រេចរបស់តុលាការនោះទេ។
យ៉ាងណាក៏ដោយ សាលក្រមនេះ មិនត្រូវបានលោក ឌូទើតេ អនុវត្តឲ្យបានពេញលេញទេ នៅក្នុងអាណត្តិរបស់លោក ដោយសារជំហររបស់លោកខិតទៅរកចិន។ ចាប់តាំងពីឡើងកាន់តំណែងមក ប្រធានាធិបតីហ្វីលីពីនរូបនេះ បានធ្វើទស្សនកិច្ចទៅចិនរហូតដល់ ៥ដង និងបានចុះហត្ថលេខាលើកិច្ចព្រមព្រៀងជាច្រើន ក្នុងតម្លៃរាប់ពាន់លានដុល្លារ។ ភាគីទាំងពីរបានប្រកាសបង្កើតក្រុមការងាររួមគ្នាលើការរុករកប្រេង និងឧស្ម័នធម្មជាតិ នៅក្នុងតំបន់ជម្លោះក្នុងសមុទ្រចិនខាងត្បូងនៅក្នុងឆ្នាំ២០១៩ផងដែរ។ កិច្ចព្រមព្រៀងលើក្រុមការងារសមុទ្រចិនខាងត្បូងនេះ ត្រូវបានភាគីចិន និងហ្វីលីពីនយល់ព្រមតាំងពីឆ្នាំ២០១៨មកម្លេះ៕
Tag:
ហ្វីលីពីន
ចិន
© រក្សាសិទ្ធិដោយ thmeythmey.com
