COVID-19
អន្តរជាតិ
ហុងកុង នឹងបើកសួនកម្សាន្ត Disneyland ជាថ្មីនៅថ្ងៃសុក្រសប្ដាហ៍នេះ
×
ដោយ៖កង ម៉េងហុង
ក្រុមហ៊ុន Disneyland របស់ហុងកុងបាននិយាយនៅថ្ងៃទី២២ ខែកញ្ញា ថា សួនកម្សាន្ត Disneyland នឹងបើកដំណើរការឡើងវិញ បន្ទាប់ពីអាជ្ញាធរទីក្រុងចាប់ផ្ដើមបន្ធូរវិធានការរឹតត្បិត។ ប៉ុន្តែ វិធានសុខាភិបាល នឹងត្រូវអនុវត្តយ៉ាងតឹងរ៉ឹងបំផុតពេលដំណើរការសួនកម្សាន្តនេះឡើងវិញ សំដៅទប់ស្កាត់ការឆ្លងថ្មី។
បើតាមការប្រកាសរបស់ Disneyland ការបើកដំណើរការឡើងវិញសួនកម្សាន្តចម្រុះក្នុងទីក្រុងហុងកុង នឹងត្រូវកំណត់ចំនួនអ្នកចូលកម្សាន្ត ហើយថ្ងៃចូលកម្សាន្ត ក៏ត្រូវបានកាត់បន្ថយដែរ។ ភ្ញៀវទាំងអស់ ត្រូវតែពាក់ម៉ាស ហើយឧទ្យាននេះនឹងត្រូវបិទនៅថ្ងៃអង្គារនិងថ្ងៃព្រហស្បតិ៍។ ចំណែកការសម្តែងផ្ទាល់ក្នុងសាល ក៏នឹងត្រូវផ្អាកបន្តទៀត។
នេះជាការបើកដំណើរលើកពីររបស់សួនកម្សាន្តនេះគិតតាំងពីជំងឺ COVID-19 រាតត្បាតមក។ Disneyland បានបើកដំណើរការម្ដងកាលពីខែមិថុនា ពេលស្ថានភាពជំងឺនេះក្នុងទីក្រុងហុងកុង ធូរស្រាល តែក៏ត្រូវបង្ខំចិត្តបិទម្ដងទៀតនៅពាក់កណ្ដាលខែកក្កដា ពេលដែលករណីឆ្លងក្នុងទីក្រុងហក់ឡើងវិញ។ សួនកម្សាន្តនេះ នឹងបើកជាថ្មីចាប់ពីថ្ងៃទី២៥ ខែកញ្ញាទៅ ជាមួយវិធានការដូចខាងលើ។
បើតាមទីភ្នាក់ព័ត៌មាន Reuters ខណៈករណីឆ្លងធ្លាក់ចុះជាបន្តបន្ទាប់ រដ្ឋាភិបាលក្រុងហុងកុងបានបន្ធូរបន្ថយការរឹតត្បិតដើម្បីបង្ការការឆ្លងជំងឺនេះកាលពីសប្តាហ៍មុនរួមទាំងការបើកសួនកម្សាន្តឡើងវិញ។ ហុងកុងមានករណីឆ្លងសរុបចំនួន ៥០៣៩ ករណី និងអ្នកជាសះស្បើយមានចំនួន ៤៧០៨នាក់ចំណែកឯចំនួនអ្នកស្លាប់មាន ១០៣នាក់៕
© រក្សាសិទ្ធិដោយ thmeythmey.com