ជាតិ
សង្គមជាតិ
×![]()
ដោយ: សារព័ត៌មានថ្មីៗ
ខ្ញុំត្រូវ អ្នកឯងខុស! ទូរសព្ទសុំអន្តរាគមន៍! នេះជាទង្វើដែលកើតឡើងជាញឹកញាប់ក្នុងហេតុការណ៍គ្រោះថ្នាក់ចរាចរណ៍។ ប៉ុន្តែទោះបីជាយ៉ាងណាក៏ដោយ ពលរដ្ឋខ្មែរមួយចំនួនក៏មានវប្បធម៌នៃការយោគយល់គ្នាផងដែរ។ សារព័ត៌មានថ្មីៗ សូមលើកយកករណីគំរូមួយដែលបង្ហោះនៅលើគណនីហ្វេសប៊ុកឈ្មោះ Sara Vuth ដែលបានអះអាងថា ខ្លួនបានធ្វេសប្រហែសបើករថយន្តជ្រុលទៅកៀរបុរសម្នាក់ដួលបាក់ឆ្អឹងដងកាំបិត។ គាត់បានដឹកជនរងគ្រោះទៅពេទ្យ ហើយជនរងគ្រោះ និងក្រុមគ្រួសារ សុទ្ធតែមានការយោគយល់ចំពោះគាត់។ 
«បន្ទាប់ពីយកឡានទៅជួសជុលរួចខ្ញុំក៏បានយកឡាននោះទៅសាកនៅផ្លូវ៦០ម៉ែត្រ ដោយសារការធ្វេសប្រហេសរបស់ខ្ញុំ ខ្ញុំក៏បានកៀរបងប្រុសម្នាក់បណ្តាលឲ្យដួលបាក់ដងកាំបិត និងប្រះឆ្អឹងប្រអប់ជើងបន្តិច»។ នេះជាការរៀបរាប់ដំណើររឿងរបស់ម្ចាស់គណនីហ្វេសប៊ុក Sara Vuth ដោយអះអាងថា ជាលើកដំបូងហើយដែលគាត់ជួបបញ្ហាបែបនេះ។
ក្រោយរថយន្តជ្រុលហួសទៅមុខប្រមាណ៣០០ម៉ែត្រ លោក Sara Vuth ក៏បានត្រឡប់ទៅមើលជនរងគ្រោះវិញ ដោយឃើញគាត់រលាត់ដៃជើង ហើយក្រោយមកគាត់មានអារម្មណ៍ថា បាក់ដៃស្តាំ។ «ខ្ញុំក៏សុំគាត់ថា បងចាំយើងដោះស្រាយគ្នាតាមក្រោយបានអត់ សំខាន់ខ្ញុំចង់យកបងទៅពេទ្យសិន គាត់ក៏ព្រមតាមខ្ញុំ ហើយខ្ញុំក៏បានយកទូរសព្ទពីគាត់ថតសកម្មភាពកន្លែងកើតហេតុនោះទុកឲ្យគាត់ ហើយប្រញាប់ជូនគាត់ទៅមន្ទីរពេទ្យ»។
ក្រោយការលាងរបួស និងថត X-Ray ជនរងគ្រោះបានបាក់ដងកាំបិតជាបីបំណែកផ្សេងគ្នា និងប្រះឆ្អឹងកែងជើង។ ម្ចាស់គណនីហ្វេសប៊ុក Sara Vuth បានអះអាងថាបន្ថែមថា ខ្លួនបានប្រាប់ហេតុការណ៍ត្រួសៗ ទៅសាច់ញាតិជនរងគ្រោះ។ លោកបានរៀបរាប់ទាំងអារម្មណ៍រំភើបថា៖ «អ្វីដែលខ្ញុំហួសចិត្តនោះ គឺបងប្រុសដែលរងគ្រោះ និយាយទៅសាច់ញាតិគាត់ថា កុំឲ្យរករឿងខ្ញុំ។ ប៉ុន្មានម៉ោងក្រោយមកគាត់ក៏ធ្វើការវះកាត់រួច ខ្ញុំក៏ដើរទៅជិតគ្រួសាររបស់គាត់ហើយសំពះសុំទោសគាត់ម្តងទៀត»។
ក្រោយការសូមអភ័យទោស លោក Sara Vuth បានពិភាក្សារកដំណោះស្រាយ ប៉ុន្តែក្រុមគ្រួសារជនរងគ្រោះ បាននិយាទៅកាន់គាត់ថា កុំបន្ទោសខ្លួនឯង ព្រោះគ្រោះថ្នាក់មើលមិនឃើញនោះទេ ដោយពួកគាត់សុំឲ្យចេញតែថ្លៃព្យាបាល និងមិនទាមទារសំណងអ្វីឡើយ។ «ខ្ញុំគាំងមួយសន្ទុះ ខ្ញុំនិយាយអីអត់ចេញ ដែលមកជួបមនុស្សចិត្តព្រះដូចជាគ្រួសារគាត់។ ភ្លាមនោះខ្ញុំក៏មានអារម្មណ៍ថាខ្ញុំជំពាក់គាត់ហើយ។ ក្រោយមកទៀតពួកយើងក៏ចាប់ផ្តើមនិយាយគ្នាលេង រហូតដល់ខ្ញុំលែងសូវមានសម្ពាធ ទៅជាកក់ក្តៅទៅវិញ »។
ក្រោយការរៀបរាប់របស់ខ្លួន Sara Vuth បានលើកឡើងថា ការទទួលខុសត្រូវគឺធំធេងខ្លាំងណាស់ មិនមែនលុយអាចដោះស្រាយអ្វីគ្រប់យ៉ាងបាននោះទេ។ បង្ហោះបានជាង៥ម៉ោង Status មួយនេះ ទទួលបានការចុច Like និង Share ក្នុងរង្វង់១៥០០ ដោយភាគច្រើន រីករាយចំពោះស្មារតីទទួលខុសត្រូវរបស់អ្នកបង្កហេតុ និងការយោគយល់ពីសំណាក់ជនរងគ្រោះ និងក្រុមគ្រួសារ៕
Tag:
ចរាចរណ៍
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
