COVID-19
អន្តរជាតិ
ប្រធានាធិបតីលីបង់ អំពាវនាវរកជំនួយកសាងប្រទេសឡើងវិញ ក្រោយការផ្ទុះកំពង់ផែបេរូត
ប្រធានាធិបតីលីបង់ Michael Aoun ថ្លែងសារក្នុងវីដេអូទៅកាន់មហាសន្និបាតអង្គការសហប្រជាជាតិ។
×![]()
នៅចំពោះមុខមហាសន្និបាតអង្គការសហប្រជាជាតិនាថ្ងៃទី២៣ ខែកញ្ញា ប្រធានាធិបតីលីបង់ Michael Aoun បានអំពាវនាវដល់សហគមន៍អន្តរជាតិ ផ្តល់ជំនួយដល់លីបង់ដើម្បីកសាងប្រទេសឡើងវិញ បន្ទាប់ពីហេតុការណ៍ផ្ទុះកំពង់ផែទីក្រុងបេរូតដែលបណ្តាលឲ្យបាត់បង់ជីវិតមនុស្សជាង២រយនាក់ និងខូចខាតជាទឹកប្រាក់រាប់ពាន់លានដុល្លារ។ ការអំពាវនាវនេះ ធ្វើឡើងចំពេលដែល លីបង់កំពុងជួបវិបត្តិសេដ្ឋកិច្ច នយោបាយ មនុស្សធម៌ និងជំងឺឆ្លង COVID-19 ថែមទៀត។
ថ្លែងក្នុងវីដេអូដែលថតទុកជាមុន ប្រមុខរដ្ឋលីបង់ លោក Michael Aoun អះអាងថា ប្រទេសរបស់លោក ត្រូវការជាចាំបាច់ការគាំទ្រពីសហគមន៍អន្តរជាតិដើម្បីកសាងប្រទេសសារជាថ្មីនៅក្រោយការផ្ទុះនៅកំពង់ផែទីក្រុងបេរូត។ ប្រធានាធិបតីលីបង់ បានលើកឡើងថា ការផ្ទុះនេះបណ្តាលឲ្យខាតបង់តម្លៃសេដ្ឋកិច្ចចំនួន៣,៥ពាន់លានដុល្លារ ខូចខាតជាសម្ភារៈ៤,៥ពាន់លានដុល្លារ និងបណ្តាលឲ្យមនុស្ស៣សែននាក់បាត់បង់ផ្ទះសម្បែង គ្មានអគ្គីសនី និងទឹកប្រើប្រាស់។
បន្ថែមពីនេះ ករណីឆ្លងជំងឺ COVID-19 នៅលីបង់បានកើនឡើងយ៉ាងច្រើនក្រោយករណីផ្ទុះឃ្លាំងសារធាតុគីមីមួយនេះ។ នេះបើតាមការបញ្ជាក់របស់លោក Aoun ។
ក្នុងការកសាងទីក្រុងបេរូតពីគំនរបាក់បែកវិញ ប្រធានាធិបតីលីបង់បានលើកជាជម្រើសថា៖«គេអាចបែងចែកតំបន់ដែលខូចខាតតាមភូមិសាស្ត្រ និងអនុញ្ញាតឲ្យប្រទេសនីមួយៗដែលចង់ជួយតំបន់នោះ ចាប់ផ្តើមការសាងសង់ឡើងវិញដោយផ្ទាល់តែម្តង»។ យោងតាមធនាគារពិភពលោក ទីក្រុងបេរូត ត្រូវការទឹកប្រាក់២ពាន់លានដុល្លារភ្លាមៗសម្រាប់ការសាងសង់។
ចំពោះការស្តារទីក្រុងបេរូតឡើងវិញនេះ ប្រធានាធិបតីបារាំង អេម៉ានុយអែល ម៉ាក្រុង ដែលធ្លាប់ស្វះស្វែងរកជំនួយឲ្យលីបង់ បានព្រមានថា អ្នកនយោបាយលីបង់នឹងត្រូវទទួលទណ្ឌកម្មបើសិនជាហ៊ានពុករលួយលើលុយជំនួយ។ លោកក៏បញ្ជាក់ផងដែរថា បារាំងនឹងមិនផ្តល់ជំនួយដល់លីបង់ឡើង បើសិនជាអ្នកនយោបាយមិននាំគ្នាធ្វើកំណែទម្រង់ និងបង្កើតរដ្ឋាភិបាលថ្មី។
បន្ថែមពីនេះទៅទៀតប្រទេសម្ចាស់ជំនួយ ដែលធ្លាប់ផ្តល់ជំនួយរាប់ពាន់លានដុល្លារក្នុងសន្នីសិទទីក្រុងប៉ារីសឆ្នាំ២០១៨ ក៏បានប្តូរលក្ខខណ្ឌក្នុងការផ្តល់ជំនួយក៏ដូចជាទាមទារឲ្យមានកំណែទម្រង់ប្រព័ន្ធនយោបាយជាដើម។ ចំណែកបារាំងវិញ បានរៀបចំរួចរាល់ហើយសន្នីសិទលើកទី២សម្រាប់ផ្តល់ជំនួយដល់លីបង់នៅពាក់កណ្តាលខែតុលា។ ប៉ុន្តែរដ្ឋាភិបាលលីបង់ត្រូវបង្ហាញសហគមន៍អន្តរជាតិថា ពួកគេពិតជាមានបំណង់ធ្វើកំណែរទម្រង់ និងបោសសម្អាតអំពើពុលរលួយទើបទទួលបានជំនួយ។
ក្រៅតែរឿងកំពង់ផែក្រុងបេរូត លីបង់ក៏ប្រឈមនឹងបញ្ហាមនុស្សធម៌ផងដែរ។ លីបង់ ដែលមានប្រជាជនត្រឹម៦លាន ទទួលជនភៀសខ្លួនពីស៊ីរី និងប៉ាឡេស្ទីនរហូតដល់ទៅជិត២លាននាក់។ បញ្ហាជនភៀសខ្លួននេះ បានក្លាយជាបន្ទុកសេដ្ឋកិច្ច សង្គម សុខភាព និងមនុស្សធម៌ដល់លីបង់ជាប្រទេសម្ចាស់ផ្ទះ។
បន្ថែមពីនេះ ប្រធានាធិបតីលីបង់ ក៏លើកពីផងដែរពីការបំពានដែនអាកាស ផ្លូវទឹក និងការទន្ទ្រានយកដីពីអ៊ីស្រាអែល។ លោក Aoun បានទាមទារអ៊ីស្រាអែលឲ្យគោរពកាតព្វកិច្ចអន្តរជាតិ។
Tag:
លីបង់
មហាសន្និបាតអង្គការសហប្រជាជាតិ
© រក្សាសិទ្ធិដោយ thmeythmey.com
