ជាតិ
ក្រសួងសុខាភិបាល៖ ទារកមិនបៅទឹកដោះម្តាយ នឹងធ្វើឲ្យខួរក្បាលលូតលាស់យឺត និងបាត់បង់ភាពវៃឆ្លាត ទារកកំពុងបំបៅទឹកដោះម្តាយ
× ភ្នំពេញ៖ ក្រសួងសុខាភិបាល បានណែនាំដល់មាតា ដែលទើបតែឆ្លងទន្លេរួច គួរតែបំបៅទឹកដោះ ទារកឲ្យបាន៦ខែដំបូង ដើម្បីជួយបង្កើនភាពឆ្លាតវ៉ៃ និងទប់ស្កាត់មរណភាពទារកបាន២០ភាគរយ ។ នេះបើតាមក្រសួងសុខាភិបាល ។
ក្រសួងសុខាភិបាល បានបញ្ជាក់ថា ការបំបៅកូនដោយប្រើម្សៅទឹកដោះគោជំនួសការបៅទឹកដោះម្តាយ នឹងធ្វើឲ្យទារកប្រឈមជំងឺផ្សេងៗដូចជា ជំងឺរាគ ជំងឺសួត ជំងឺហឺត ភាពឆ្លាតវៃចុះខ្សោយ ជំងឺទឹកនោមផ្អែម ជំងឺលើសសម្ពាធឈាម ជំងឺបេះដូង បញ្ហាលើសទម្ងន់ជាដើម។ បើតាមក្រសួងសុខាភិបាល ការបំបៅកូន ដោយទឹកដោះ នឹងជួយឲ្យទារកកាត់បន្ថយជំងឺរាគរូសបាន១១ដង ជំងឺរលោកសួតបាន១៥ដង។
ក្រសួងសុខាភិបាល បានរៀបរាប់ដូច្នេះថា៖«ទឹកដោះម្តាយគឺជាអាហារដ៏ល្អឥតខ្ចោះសម្រាប់ទារក និងកូន។ គ្មានផលិតផលណាល្អជាងទឹកដោះម្តាយឡើយ ព្រោះទឹកដោះម្តាយមានផ្ទុករាល់សារជាតិចិញ្ចឹមដែលទារកត្រូវការ។ សារធាតុចិញ្ចឹមសំខាន់ៗដែលមាននៅក្នុងទឹកដោះម្តាយ រួមមានប្រូតេអ៊ីន ដែលជាអាហារសាងសង់សម្រាប់អភិវឌ្ឍការលូតលាស់របស់រាងកាយកុមារ ជាតិស្ករឡាក់តូស ដែលជួយផ្តល់កម្លាំងដល់កុមារ ជាតិខ្លាញ់ទ្រទ្រង់កោសិការាងកាយកុមារ ថែរក្សាសីតុណ្ហភាព។ ទឹកដោះម្តាយសម្បូរទៅដោយជីវជាតិអា បេ សេ ដេ ជាតិដែក ប៉ូតាស្យូម កាល់ស្យូម និងរ៉ែខនិជ សម្រាប់ការពារពីជំងឺផ្សេងៗ»។
ដើម្បីជៀសវាងឲ្យកុមារកាត់បន្ថយជំងឺផ្សេងៗ និងបញ្ហាកង្វះអាហារូបត្ថម្ភកុមារ ក្រសួងសុខាភិបាលបានណែនាំដល់មាតាបំបៅទឹកដោះដល់ទារក និងកុមារ។ សម្រាប់អ្នកភាគីពាក់ព័ន្ធដែលកំពុងធ្វើការផ្នែកគាំពារកុមារ និងទារក ក៏ត្រូវបង្កើតយុទ្ធនាការអប់រំ និងផ្សព្វផ្សាយអំពីសារសំខាន់នៃការបំបៅទឹកដោះម្តាយ និងហានិភ័យនៃការមិនបំបៅទឹកដោះម្តាយ។
កាលពីពេលថ្មីៗនេះ អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ បានចុះទៅប្រមូលទឹកដោះគោម៉ាក (Nutrilatt) ដែលមានលេខកូជ ៤៨៧, ៤៨៨, ៥៣៦, ៥៣៧, ៥៣៨, ៥៣៩ នៅតាមផ្សារទំនើប និងផ្ទះលក់ទំនិញមួយចំនួន ក្រោយពីផលិតផលទាំងនេះបានធ្វើឲ្យប៉ះពាល់ដល់សុខភាពកុមារ៕
Tag:
មាតា
ទឹកដោះ
ជំងឺ
ទារក
© រក្សាសិទ្ធិដោយ thmeythmey.com