ជាតិ
សម្ដេច ហ៊ុន សែន ស្នើសុំវ៉ាក់សាំងប្រឆាំងកូវីដ-១៩ ពីរុស្ស៊ី ជំនួបពិភាក្សារវាង សម្ដេច ហ៊ុន សែន និង លោក ANATOLY BOROVIK ឯកអគ្គរដ្ឋទូតរុស្ស៊ីប្រចាំកម្ពុជា ថ្ងៃទី២៤កញ្ញា ២០២០។ (រូបពីទំព័រហ្វេសប៊ុករបស់ SPM)
× ភ្នំពេញ៖ សម្ដេចនាយករដ្ឋមន្រី្ត ហ៊ុន សែន បានស្នើសុំជំនួយវ៉ាក់សាំងកូវីដ-១៩ពីរុស្ស៊ី ដើម្បីទប់ស្កាត់ការឆ្លងរាលដាលនៃជំងឺកាចសាហាវនេះ។ ការស្នើសុំនេះ ធ្វើឡើងក្នុងជំនួបរវាង សម្ដេច ហ៊ុន សែន និង លោក អាណាថូលី បូរូវីក (ANATOLY BOROVIK) ឯកអគ្គរដ្ឋទូតនៃសហព័ន្ធរុស្សីប្រចាំកម្ពុជា នៅថ្ងៃទី២៤កញ្ញា។
បើតាមការចេញផ្សាយលើទំព័រហ្វេសប៊ុករបស់សម្ដេច ហ៊ុន សែន ជំនួបពិភាក្សាការងារជាមួយលោក អាណាថូលី បូរូវីក គឺបានជជែកគ្នាពីទំនាក់ទំនងការទូតរវាងប្រទេសទាំងពីរ ដែលមានរយៈពេល៦៤ឆ្នាំ និងការរកឃើញវ៉ាក់សាំងរបស់ប្រឆាំងនឹងកូវីដ-១៩ របស់ប្រទេសរុស្ស៊ី។
សម្ដេច ហ៊ុន សែន ចាត់ទុកការរកឃើញវ៉ាក់សាំងប្រឆាំងនឹងជំងឺកូវីដ-១៩នេះ ជាសញ្ញាវិជ្ជមានមួយ សម្រាប់ពិភពលោក។ «ការរកឃើញវ៉ាក់សាំងប្រឆាំងនឹងជំងឺកូវីដ-១៩នេះ អាចជួយដល់ពិភពលោកយើងក្នុងការប្រយុទ្ធប្រឆាំងជំងឺដែលកំពុងធ្វើឲ្យមានបញ្ហាប្រឈមជាច្រើនរួមទាំងញ្ហាសេដ្ឋកិច្ច សង្គម និងការទំនាក់ទំនងរវាងប្រទេសជាច្រើននៅក្នុងពិភពលោក»។ នេះជាការលើកឡើងរបស់សម្ដេច ហ៊ុន សែន ។
កាលពីថ្ងៃទី១១សីហា លោក វ្លាឌីមៀ ពូទីន ប្រធានាធិបតីរុស្សុី បានប្រកាសថា ប្រទេសខ្លួនបានរកឃើញវ៉ាក់សាំងប្រឆាំងកូវីដ-១៩ មុនគេលើពិភពលោក។ វ៉ាក់សាំងដែលមានឈ្មោះ Sputnik V នេះ បានដាក់ធ្វើតេស្តលើមនុស្ស ៤ម៉ឺននាក់ ដោយគិតចាប់ពីខែកញ្ញានេះតទៅ។ យ៉ាងណាក៏ដោយ វ៉ាក់សាំងនេះ កំពុងចោទពីសំណួរជាច្រើនជុំវិញបញ្ហាប្រសិទ្ធភាព ជាពិសេសបណ្តាប្រទេសអឺរ៉ុប និងអង្គការWHO។
នៅថ្ងៃទី១៤សីហា ទូរទស្សន៍រដ្ឋវៀតណាបានចេញផ្សាយថា ក្រសួងសុខាភិបាលរបស់ប្រទេសខ្លួនបានសម្រេចចុះឈ្មោះទិញវ៉ាក់សាំងរបស់រុស្ស៊ី។
សូមបញ្ជាក់ថា ចិន អាមេរិក និងអាល្លឺម៉ង់ជាដើម ក៏កំពុងសាកល្បងវ៉ាក់សាំងប្រឆាំងជំងឺកូវីដ-១៩ ដែរ។ ចិន ត្រូវបានមើលឃើញថា នាំមុខគេក្នុងការអភិវឌ្ឍវ៉ាក់សាំងនេះ ដោយវ៉ាក់សាំងរបស់ក្រុមហ៊ុនចិនកំពុងស្ថិតនៅដំណាក់កាលទីបីនៃការអភិវឌ្ឍ។
មិនតែប៉ុណ្ណោះ ចិនក៏បានសន្យាផ្ដល់វ៉ាក់សាំង ដល់ប្រទេសក្នុងតំបន់ទន្លេមេគង្គផងដែរ ក្រោយបញ្ចប់ការធ្វើតេស្តជាស្ថាពរ។ នាយករដ្ឋមន្ត្រីចិន លី ខឺឈាំង បានសន្យាបែបនេះ នៅក្នុងប្រជុំកំពូលមេគង្គ-ឡានឆាង លើកទី៣ ពាក់ព័ន្ធនឹងការ«ពង្រឹងភាពជាដៃគូ ដើម្បីវិបុលភាពរួម» តាមរយៈប្រព័ន្ធវីដេអូ នៅថ្ងៃទី២៤ សីហានេះ៕
Tag:
កូវីដ-១៩
រុស្ស៊ី
កម្ពុជា
© រក្សាសិទ្ធិដោយ thmeythmey.com