COVID-19
អន្តរជាតិ
លោក ពូទីន ប្រកាសផ្តល់វ៉ាក់សាំង COVID-19 ដោយឥតគិតថ្លៃដល់បុគ្គលិក UN ប្រធានាធិបតីរុស្ស៊ី វ៉្លាឌីមៀ ពូទីន ថ្លែងសារក្នុងវីដេអូទៅកាន់មហាសន្និបាតអង្គការសហប្រជាជាតិ។
× ប្រធានាធិបតីរុស្ស៊ី វ្ល៉ាឌីមៀ ពូទីន បានប្រកាសក្នុងមហាសន្និបាតអង្គការសហប្រជាជាតិនៅថ្ងៃទី២២ ខែកញ្ញាថា រុស្ស៊ីនឹងផ្តល់វ៉ាក់សាំង COVID-19 ដោយមិនគិតថ្លៃដល់បុគ្គលិកអង្គការសហប្រជាជាតិ (UN) ទាំងអស់។ កាលពីថ្ងៃទី១៣ ខែសីហាកន្លងទៅលោក ពូទីន បានប្រកាសថារុស្ស៊ីជោគជ័យក្នុងការបង្កើតវ៉ាក់សាំង COVID-19 ដែលមានឈ្មោះថា Sputnik V ។
ប្រមុខរដ្ឋរុស្ស៊ី វ្ល៉ាឌីមៀ ពូទីន បានប្រកាសថា បុគ្គលិកអង្គការសហប្រជាជាតិនៅទីក្រុងញ៉ូវយក និងនៅជុំវិញពិភពលោកនឹងទទួលបានវ៉ាក់សាំង COVID-19 មិនគិតថ្លៃពីរុស្ស៊ី បើសិនជាពួកគេចង់បាន។ លោក ពូទីន អះអាងថា មនុស្សគ្រប់រូបអាចប្រឈមនឹងវីរុសដ៏សាហាវនេះ ហើយវីរុសបង្កជាជំងឺCOVID-19 នេះ ក៏មិនអត់អោនឲ្យបុគ្គលិកអង្គការសហប្រជាជាតិនៅទីស្នាក់ការកណ្តាល ឬនៅតំបន់ដទៃឯទៀតឡើយ។
«រុស្ស៊ី ត្រៀមរួចរាល់ជាស្រេចដើម្បីផ្តល់បុគ្គលិកអង្គការសហប្រជាជាតិ នូវជំនួយចាំបាច់ និងសព្វគ្រប់ ហើយជាពិសេស ការផ្តល់វ៉ាក់សាំងមិនគិតថ្លៃដល់បុគ្គលិកអង្គការនេះ សម្រាប់អ្នកស្ម័គ្រចិត្តហ៊ានចាក់វ៉ាក់សាំង»។ លោកអះអាងថា សំណើផ្តល់វ៉ាក់សាំងនេះ ឆ្លើយតបទៅនឹងទាមទារពីបុគ្គលិកអង្គការអន្តរជាតិមួយនេះ។ នេះបើយោងតាមទីភ្នាក់ងារសារព័ត៌មាន AP ។
ចំពោះការស្នើផ្តល់វ៉ាក់សាំងពីសំណាក់មេដឹកនាំរុស្ស៊ីនេះ អ្នកនាំពាក្យអង្គការសហប្រជាជាតិ លោក Stephane Dujarric អរគុណចំពោះការផ្តល់ជូននេះ ហើយនឹងបន្តសិក្សាពីសំណើខាងលើ។ ចំណែកអ្នកនាំពាក្យអង្គការសុខភាពពិភពលោក(WHO) លោកស្រីវេជ្ជបណ្ឌិត Margaret Harris បដិសេធមិនផ្តល់យោបល់អ្វីទាំងអស់។
ជុំវិញវ៉ាក់សាំង Sputnik V របស់រុស្ស៊ីនេះដែរ ព្រឹត្តិបត្រសុខភាព Lancet របស់អង់គ្លេស បានសសេរដោយយោងតាមអ្នកអភិវឌ្ឍវ៉ាក់សាំងរុស្ស៊ីថា Sputnik V មានសុវត្ថិភាព និងពន្លឿនការឆ្លើយតបរបស់អង់ទីករក្នុងចំណោមអ្នកធ្វើតេស្តទាំងអស់៤០រូប នៅដំណាក់កាលទី២ ។ ទោះជាយ៉ាងណាក្តី ព្រឹត្តិបត្រសុខភាព Lancet បានកត់សម្គាល់ថា អ្នកចូលរួមទាំង៤០រូប ត្រូវបានគេតាមដានតែរយៈពេល៤២ថ្ងៃប៉ុណ្ណោះ ហើយការធ្វើតេស្តមានទ្រង់ទ្រាយតូច។
កាលពីថ្ងៃទី២១ ខែកញ្ញាកន្លងទៅសារព័ត៌មានរុស្ស៊ីបានចុះផ្សាយថា នាយក WHO តំបន់អឺរ៉ុប លោក Hans Kluge បានសសើរវ៉ាក់សាំង Sputnik V នេះ ក្រោយជំនួបជាមួយរដ្ឋមន្ត្រីសុខាភិបាលរុស្ស៊ី Mikhail Murashko។ សារព័ត៌មានរដ្ឋរុស្ស៊ីថែមទាំងបានចុះផ្សាយថា លោក Kluge ថែមទាំងបានសសើររុស្ស៊ីចំពោះការអភិវឌ្ឍវ៉ាក់សាំង និងថា វ៉ាក់សាំង Sputnik V នេះ មានសុវត្ថិភាព និងប្រសិទ្ធភាព។
ការអភិវឌ្ឍវ៉ាក់សាំង COVID-19 របស់រុស្ស៊ី ត្រូវបានអ្នកជំនាញសុខាភិបាលចាត់ទុកថាលឿនហើយក៏ដូចជាប់ការសង្ស័យដែរ ដ្បិតអីរុស្ស៊ីពុំបានបញ្ចេញលទ្ធផល និងទិន្ន័យនៃការធ្វើតេស្តជាផ្លូវការ និងពុំសូវជាបានធ្វើតេស្តទ្រង់ទ្រាយធំ។ យ៉ាងណាក្តី ប្រធានាធិបតីរុស្ស៊ីអះអាងថា វ៉ាក់សាំងនេះបានប្រសិទ្ធិភាព និងសុវត្ថិភាព ដោយកូនស្រីរបស់លោកក៏ទទួលបានវ៉ាក់សាំងនេះដែរ៕
Tag:
រុស្ស៊ី
មហាសន្និបាត
COVID-19
© រក្សាសិទ្ធិដោយ thmeythmey.com