ចិន​ទៅកាន់​អាមេរិក​៖ អ្នកបង្កើត​បញ្ហា​គ្រប់គ្រាន់​ហើយ​សម្រាប់​ពិភពលោក
COVID-19
អន្តរជាតិ
ចិន​ទៅកាន់​អាមេរិក​៖ អ្នកបង្កើត​បញ្ហា​គ្រប់គ្រាន់​ហើយ​សម្រាប់​ពិភពលោក
25, Sep 2020 , 1:59 pm        
រូបភាព
​ប្រេសិត​ចិន​ប្រចាំ​អង្គការ​សហ​ប្រជ​ជាតិ ចាង ជុន បាន​ពន្លះ​អាមេរិក​ខ្លាំងៗ​នា​កិច្ចប្រជុំ​ក្រុមប្រឹក្សាសន្តិសុខ​អង្គការសហប្រជាជាតិ​នៅ​ថ្ងៃទី​២៤ ខែកញ្ញា ដើម្បី​ឆ្លើយ​នឹង​ការរិះគន់​របស់​អាមេរិក​លើ​ចិន​ក្នុងការ​ដោះស្រាយ​វិបត្តិ​ជំងឺ COVID-19 ។ លោក ចាង និយាយ​ច្បាស់ៗ​ថា អាមេរិក​បង្កបញ្ហា​គ្រប់គ្រាន់​ហើយ​សម្រាប់​ពិភពលោក ហើយ​ថា អាមេរិក​កំពុងតែ​នៅ​ម្នាក់ឯង​ឯកោ ដោយ​ឈរ​ប្រឈមមុខ​នឹង​សហគមន៍​អន្តរជាតិ​ទាំងមូល​។

 
​ជំងឺ COVID-19 នៅតែ​ជា​ប្រធានបទ​ក្ដៅ​ក្នុងការ​សង្គ្រាម​វោហារសាស្ត្រ​រវាង​អាមេរិក និង​ចិន​អំឡុង​ជំនួប​នៅ​អង្គការសហប្រជាជាតិ​។ នៅ​ថ្ងៃ​បើក​កិច្ចប្រជុំ​មហាសន្និបាត លោក ដូ​ណា​ល់ ត្រាំ ទទូច​ឲ្យ​ពិភពលោក​ចាប់​ចិន​ទទួលខុសត្រូវ​ចំពោះ​ការធ្វើ​ឲ្យ​រាលដាល​ជំងឺ COVID-19 ។ ប្រធានាធិបតី​ចិន ស៊ី ជិន​ភីង ក៏បាន​តប​ទៅវិញ​រួចហើយ​។ មកដល់​ថ្ងៃទី​២៤ ខែកញ្ញា មន្ត្រី​ចិន និង​អាមេរិក ក៏​ឆ្លើយឆ្លង​គ្នា​ម្ដងទៀត​រឿង COVID-19 ។​
 
​នា​កិច្ចប្រជុំ​កម្រិត​ខ្ពស់​ក្រុមប្រឹក្សាសន្តិសុខ​ស្ដីពី​អភិបាលកិច្ច​ក្រោយ COVID-19 តំណាង​អាមេរិក​ប្រចាំ​អង្គការសហប្រជាជាតិ Kelly Craft បាន​និយាយ​ដោយ​កំហឹង ជាមួយនឹង​ការ​រំឭក​ឡើងវិញ​ពី​សុន្ទរកថា​របស់លោក ត្រាំ ដែល​ទាមទារ​ឲ្យ​ចិន​ទទួលខុសត្រូវ​ចំពោះ​បញ្ហា​ដែល​កើតឡើង​។ លោកស្រី Craft និយាយ​បែបនេះ ក្រោយ​ប្រមុខ​ការទូត​ចិន និង​រុស្ស៊ី ពួត​គ្នា​រិះគន់​អាមេរិក​ដោយ​លោក Sergey Lavrov ថា ប្រទេស​ខ្លះ​យក COVID-19 ដើម្បី​បម្រើ​ប្រយោជន៍​ខ្លួន ឯ​លោក វ៉ាង យី ថា មហាអំណាច​គួរ​គិតពី​មនុស្សជាតិ​មុន​។​
 
​ក្នុង​វគ្គ​បន្ទាប់​នៃ​កិច្ចប្រជុំ អគ្គរដ្ឋទូត​ចិន​ប្រចាំ​អង្គការសហប្រជាជាតិ ចាង ជុន ក៏​ពន្លែង​ប៉ុន្មាន​ឃ្លា​ទៀត​ដាក់​អាមេរិក​។ ដោយ​ចង់​សំដៅ​អាមេរិក លោក ចាង និយាយថា កិច្ចប្រជុំ​ថ្ងៃទី​២៤ ខែកញ្ញា ជា​ព្រឹត្តិការណ៍​នៃ​សាមគ្គីភាព និង​កិច្ចសហប្រតិបត្តិការ ប៉ុន្តែ​មន្ត្រី​អាមេរិក​ខ្លះ​បញ្ចេញ​សំឡេង​ផ្ទុយ​ពី​បរិយាកាស​កិច្ចប្រជុំ​ទៅវិញ​។ លោក​ថែមទាំង​ចោទ​អាមេរិក​ថា ផ្សាយ​ព័ត៌មាន​មិន​ពិត និង​បំពាន​គោលការណ៍​កិច្ចប្រជុំ​។​
 
«​ខ្ញុំ​ត្រូវតែ​និយាយថា ល្មមៗ​បាន​ហើយ​។ អ្នក​បាន​បង្កើត​បញ្ហា​គ្រប់គ្រាន់​ហើយ​សម្រាប់​ពិភពលោក​។​» លោក ចាង និយាយ​បែបនេះ មុន​ថ្លែង​ការពារ​ចំណាត់ការ​របស់​រដ្ឋាភិបាល​ចិន​ក្នុងការ​ទប់ស្កាត់​ជំងឺ COVID-19 ។ បេសកជន​ចិន​រូបនេះ បន្ត​វាយប្រហារ​វិធានការ​រ​បស់​អាមេរិក​វិញ​ដោយ​ថា បរាជ័យ​របស់​អាមេរិក ជា​កំហុស​របស់​អាមេរិក​ខ្លួន​ប៉ុណ្ណោះ​។ មកទល់ពេលនេះ អាមេរិក​មាន​ករណី​ចំនួន​ជិត​៧​លាន​ករណី និង​ស្លាប់​លើស​២០​ម៉ឺន​នាក់​។​
 
​លោក ចាង បាន​សួរ​អាមេរិក​ថា ជា​ប្រទេស​មាន​ប្រព័ន្ធ​សុខាភិបាល​រីកចម្រើន​មួយ​ក្នុង​លោក ហេតុអ្វី​បណ្ដាល​ឲ្យ​មាន​ករណី​ឆ្លង និង​ស្លាប់​ច្រើនជាង​គេឯង​? ប្រទេស​ជាច្រើន​ដែលមាន​ករណី​ឆ្លង​ច្រើន បាន​ទប់ទល់​ជំងឺ​នេះ​រួចហើយ ហេតុអ្វី​អាមេរិក​ធ្វើ​មិនបាន​? ក្នុងន័យ​ទាត់ចោល​ការ​ចោទ​របស់​អាមេរិក អ្នកការទូត​ចិន​រូបនេះ​ប្រាប់​ឲ្យ​អាមេរិក​ដោះស្រាយ​បញ្ហា​ក្នុងស្រុក​របស់ខ្លួន​ឲ្យ​បាន ជាជាង​ចង្អុលមុខ​គេឯង ហើយ​អ្នកនយោបាយ​អាម​រិ​ក​ខ្លះ​ទៅវិញ​ទេ ដែល​គួរ​ទទួលខុសត្រូវ​ចំពោះ​អ្វីដែល​កើតឡើង​៕

Tag:
 អាមេរិក​
  ចិន​
  COVID-19
© រក្សាសិទ្ធិដោយ thmeythmey.com