លោក គីម ជុងអ៊ុន មេដឹកនាំកូរ៉េខាងជើង នៅថ្ងៃទី២៥ ខែកញ្ញានេះ បានសសេរលិខិតទៅកាន់ប្រធានាធិបតីកូរ៉េខាងត្បូង មូន ចេអ៊ីន ដោយបានសុំទោសចំពោះការបាញ់សម្លាប់មន្ត្រីកូរ៉េខាងត្បូងម្នាក់។ លោក គីម អះអាងថា រឿងនេះមិនគួរកើតឡើងឡើយ។
ក្នុងលិខិតផ្ញើដោយរណសិរ្សរួបរួមកូរ៉េខាងជើងដែលស្ថាប័នទទួលបន្ទុកទំនាក់ទំនងជាមួយកូរ៉េខាងត្បូងទៅកាន់ប្រធានាធិបតីលោក មូន ចេអ៊ីន ប្រមុខដឹកនាំកូរ៉េខាងជើង លោកគីម ជុងអ៊ុន បានបង្ហាញការសោកស្ដាយចំពោះឧបទ្ទវហេតុដែលកើតឡើង ដែលធ្វើឲ្យសាធារណៈជនកូរ៉េខាងត្បូងអន់ចិត្ត ហើយដែលជារឿងដែលមិនគួរឲ្យកើតឡើង។
«ខ្ញុំ សុំទោសចំពោះរឿងដែលមិនរំពឹងទុក និងគួរឲ្យសោកស្តាយដែលកើតឡើងក្នុងដែនទឹករបស់យើង ដែលនាំឲ្យមានការខកចិត្តពីប្រធានាធិបតី មូន ចេអ៊ីន និងប្រជាជនកូរ៉េខាងត្បូង»។ នេះជាការបញ្ជាក់របស់លោក គីម ជុងអ៊ុនក្នុងលិខិតដដែល។
យោងតាមយោធាកូរ៉េខាងត្បូង មន្ត្រីកូរ៉េខាងត្បូងដែលធ្វើការនៅក្រសួងសមុទ្រ និងនេសាទ បានបាត់ខ្លួនពីទូកល្បាតមួយនៅក្បែរកោះ Yeonpyeong នៅក្បែរព្រំដែនទឹកខណ្ឌចែកឧបទ្វីបកូរ៉េ នៅមុនរសៀលថ្ងៃទី២១ ខែកញ្ញា។ នេះបើយោងតាមភ្នាក់ងារសារព័ត៌មាន Yonhap។
ក្នុងលិខិតរបស់ខ្លួន កូរ៉េខាងជើង បានអះអាងថា បុរសមិនស្គាល់អត្តសញ្ញាណមួយរូប បានឆ្លងចូលព្រំដែនទឹកកូរ៉េខាងជើងដោយគ្មានការអនុញ្ញាត និងមិនបានឆ្លើយតបត្រឹមត្រូវនៅពេលសួរដោយទាហានកូរ៉េខាងជើង។ ក្រោយពេលបុរសនោះមិនបង្ហាញអត្តសញ្ញាណ ទាហានកូរ៉េខាងជើងបាញ់បុរសនោះចំនួន១០គ្រាប់។
ទោះជាយ៉ាងណាក្តី កូរ៉េខាងជើងបានបញ្ជាក់ថា ខ្លួនមិនបានដុតសាកសពមន្ត្រីកូរ៉េខាងត្បូងរូបនេះឡើយ ហើយទាហានកូរ៉េខាងជើងគ្រាន់តែចាក់សាំងដុតសម្ភារដែលមន្ត្រីរូបនេះយកមកតាមខ្លួនប៉ុណ្ណោះ ដើម្បីបង្ការជំងឺ COVID-19។ ចំណែកទាហានកូរ៉េខាងត្បូងវិញ អះអាងថា ខ្លួនមិនទាន់រកឃើញសាកសពរបស់មន្ត្រីរូបនេះឡើយ។
ស្របពេលជាមួយគ្នានេះដែរ មន្ត្រីកូរ៉េខាងត្បូងលើកឡើងថា បុរសរូបនោះទំនងជាព្យាយាមភៀសខ្លួនទៅកូរ៉េខាងជើង ដោយពាក់អាវពោងទៅជាមួយ។ កូរ៉េខាងជើងបញ្ជាក់ថា ខ្លួននៅបន្តស៊ើបអង្កេតពីមូលហេតុនៃការភៀសខ្លួននេះ។
កាលពីខែកក្កដាកន្លងទៅ មេបញ្ជាការកងទ័ពអាមេរិកប្រចាំកូរ៉េខាងត្បូង និយាយថា កូរ៉េខាងជើង បានចេញបញ្ជាឲ្យកងទ័ពរបស់ខ្លួនបាញ់សម្លាប់អ្នកណាដែលឆ្លងដែន សំដៅទប់ស្កាត់ការរាលដាលជំងឺ COVID-19 ។ កូរ៉េខាងជើងថែមទាំងបានបិទព្រំដែនជាមួយចិនតាំងតែពីខែមករា ដើម្បីទប់ស្កាត់ជំងឺឆ្លង។ ក្នុងខែកក្កដាដដែល កូរ៉េខាងជើងបានដាក់ប្រទេសក្នុងស្ថានភាពអាសន្នកម្រិតខ្ពស់បំផុត៕