ពីនេះ ពីនោះ
សុខភាព
ប្រយ័ត្ន! កម្រិតអេម៉ូក្លូប៊ីនក្នុងឈាមខ្ពស់ពេកមែនទេ? កុំរំលងអត្ថបទនេះ
× មូលហេតុដែលឈាមរបស់អ្នកមានពណ៌ក្រហមនោះ គឺដោយសារវត្តមាននៃអេម៉ូកក្លូប៊ីនដែលជាប្រូតេអ៊ីនមួយប្រភេទក្នុងកោសិកាគ្រាប់ឈាមក្រហមជួយដឹកជញ្ជូនម៉ូលេគុលអុកស៊ីសែន។ កម្រិតនៃអេម៉ូក្លូប៊ីនទាបអាចបង្កបញ្ហាកង្វះគ្រាប់ឈាមក្រហម! ដូច្នេះអ្នកចាំបាច់គួររក្សាឱ្យបាននូវកម្រិតអេម៉ូក្លូប៊ីនត្រឹមត្រូវមិនទាប ឬខ្ពស់ពេក។ ប៉ុន្តែត្រូវធ្វើបែបណានៅពេលអេម៉ូក្លូប៊ីនក្នុងឈាមឡើងខ្ពស់? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអ្វីដែលអ្នកគួរធ្វើពេលអេម៉ូក្លូប៊ីនក្នុងឈាមឡើងខ្ពស់ ៖
១. ឈប់ជក់បារី
ការជក់បារីអាចជះផលប៉ះពាល់គួរឱ្យព្រួយបារម្ភជាច្រើនចំពោះសុខភាព ហើយអ្នកចាំបាច់ត្រូវបញ្ឈប់ទម្លាប់ជក់បារីឱ្យបានឆាប់បំផុតនៅពេលកម្រិតអេម៉ូក្លូប៊ីនក្នុងឈាមឡើងខ្ពស់។ រាងកាយនឹងផលិតអេម៉ូក្លូប៊ីនកាន់តែច្រើនដោយសារកង្វះអុកស៊ីសែនព្រោះការជក់បារី។
២. ទទួលទានទឹកឱ្យបានច្រើន
កង្វះជាតិទឹកក្នុងរាងកាយអាចបណ្ដាលឱ្យឈាមប្រែជាខាប់ ហើយកម្រិតនៃអេម៉ូក្លូប៊ីនក៏កើនឡើងតាមនោះ។ ប្រសិនបើអ្នកកំពុងមានបញ្ហាខ្សោះជាតិទឹកក្នុងរាងកាយ ហើយទៅធ្វើតេស្តឈាមនោះលទ្ធផលនៃបរិមាណអេម៉ូក្លូប៊ីនក្នុងឈាមប្រាកដជាទទួលរងឥទ្ធិពល។ ដូច្នេះដើម្បីជាការប្រសើរចូរទទួលទានទឹកឱ្យបានច្រើនគ្រប់គ្រាន់ជាប្រចាំ។
៣. កាត់បន្ថយការទទួលទានអាហារសម្បូរជាតិដែក
នេះក៏ព្រោះតែជាតិដែកបង្កើនការផលិតអេម៉ូក្លូប៊ីន។ ដូច្នេះនៅពេលមានបញ្ហាកម្រិតអេម៉ូក្លូប៊ីនក្នុងឈាមឡើងខ្ពស់ ចូរព្យាយាមកម្រិត ឬបន្ថយការទទួលទានអាហារសម្បូរជាតិដែកវិញ។ ពិគ្រោះជាមួយវេជ្ជបណ្ឌិតថាតើអ្នកគួរបញ្ឈប់ការទទួលទានថ្នាំគ្រាប់ជាតិដែក ឬវីតាមីនចម្រុះដែលមានផ្ទុកជាតិដែកដែរឬយ៉ាងណា?
៤. កាត់បន្ថយការទទួលទានវីតាមីន C
ទោះបីជាវីតាមីន C គ្មានឥទ្ធិពលអ្វីធ្វើឱ្យរាងកាយផលិតអេម៉ូក្លូប៊ីន ប៉ុន្តែសារធាតុចិញ្ចឹមនេះជួយបង្កើនការស្រូបយកជាតិដែក។ ហើយដូចដែលបានលើកឡើងក្នុងចំនុចខាងលើ ជាតិដែកបង្កើនការផលិតអេម៉ូក្លូប៊ីន៕
© រក្សាសិទ្ធិដោយ thmeythmey.com