ដូចមេដឹកនាំតាមបណ្តាប្រទេសដទៃទៀតដែរ សម្តេចនាយករដ្ឋមន្ត្រី ហ៊ុន សែន ត្រូវបានអញ្ជើញឲ្យថ្លែងសុន្ទរកថា ទៅកាន់កិច្ចប្រជុំពិភាក្សាទូទៅនៃមហាសន្និបាតអង្គការសហប្រជាជាតិលើកទី៧៥ នៅថ្ងៃទី២៦ ខែកញ្ញា ឆ្នាំ២០២០ តាមរយៈការចាក់ផ្សាយវីដេអូ ដែលថតទុកជាមុន។
សម្តេចនាយករដ្ឋមន្ត្រីកម្ពុជា មានទស្សនទាន៥ចំណុច ចែករំលែកដល់កិច្ចប្រជុំនៃស្ថាប័នអង្គការអន្តរជាតិដ៏បំផុតមួយនេះ រួមមាន ភាពតានតឹងផ្នែកភូមិសាស្ត្រនយោបាយថ្មីៗ និងផលប៉ះពាល់ចំពោះពិភពលោក, ជំងឺរាតត្បាតកូវីដ-១៩ និងការស្តាសេដ្ឋកិច្ចសង្គមឡើងវិញ, បញ្ហា និងការប្រឈមជាសាកល, និង ការបដិសេធចំពោះភាពអយុត្តិធម៌ [មកលើកម្ពុជា]។
ចំពោះចំណុចទី៥ ស្តីពីការបដិសេធចំពោះភាពអយុត្តិធម៌ សម្តេចនាយករដ្ឋមន្ត្រី លើកឡើងថា ក្នុងនាមជាប្រទេសតូចមួយ ដែលស្រឡាញ់សន្តិភាពនិងប្រកាន់ភ្ជាប់នូវគោលការណ៍ប្រជាធិបតេយ្យ កម្ពុជា អាចដើរតួនាទីចូលរួមចំណែករបស់ខ្លួន នៅក្នុងសហគមន៍អន្តរជាតិបាន លុះត្រាតែច្បាប់នានា ដែលគ្រប់គ្រងប្រព័ន្ធអន្តរជាតិ ត្រូវបានអនុវត្តប្រកបដោយ «សមភាព»។
ប៉ុន្តែ សម្តេចនាយករដ្ឋមន្ត្រី សម្តែងការសោកស្តាយ ដែលជារឿយៗ ប្រទេសមួយចំនួន ព្រោះតែអាស្រ័យលើមហិច្ឆតានយោបាយ និងរបៀបវារៈឱកាសលាក់ពុតរបស់ខ្លួន កម្ពុជា ត្រូវប្រឈមមុខនឹងស្តង់ដារពីរ ប្រកបដោល្បិចកល និងការសម្រេចចិត្តលម្អៀង ពោលគឺ «ភាពអយុត្តិធម៌» [មកលើកម្ពុជា]។
ភាពយុត្តិធម៌នេះ បានធ្វើឲ្យសម្តេចនាយករដ្ឋមន្ត្រី នឹកឃើញដល់ស្លាកស្នាមប្រវត្តិសាស្ត្រ។ សម្តេច រម្លឹកថា ជាង៤០ឆ្នាំមុន កម្ពុជា ត្រូវបានរំដោះចេញពីរបបខ្មែរក្រហម ដែលរបបនេះ បានសម្លាប់ប្រជាជនឯងជាងពីរលាននាក់ ហើយអ្នកនៅមានជីវិតទាំងបាក់ស្បាតនិងសល់តែបាតដៃទទេ គឺជាអ្នកដែលស្តារប្រទេសជាតិពីគំនរផេះផង់។
ប្រមុខរដ្ឋាភិបាលកម្ពុជា រៀបរាប់បន្តថា អ្វីដែលគួរឲ្យហួសចិត្តទៀតនោះ គឺអ្នកនៅមានជីវិតទាំងអស់នោះ បែរជាទទួលរងទណ្ឌកម្មពីសមាជិកភាគច្រើននៃអង្គការសហប្រជាជាតិ ហើយថែមទាំងអនុញ្ញាតឲ្យមេដឹកនាំខ្មែរក្រហម កាន់កាប់អាសនៈរបស់កម្ពុជានៅអង្គការសហប្រជាជាតិទៅវិញ។
ប្រមុខរដ្ឋាភិបាលលកម្ពុជា បន្ថែមថា រដ្ឋាភិបាលបរទេសទាំងនោះ ដែលបានផ្សព្វផ្សាយឥតឈប់ឈរពីលទ្ធិប្រជាធិបតេយ្យនិងសិទ្ធិមនុស្ស គឺជាអ្នករារាំងប្រជាជនកម្ពុជា ក្នុងការទទួលបានចំណីអាហារ សុខុមាលភាព ការអប់រំ ផ្ទះសម្បែង ការអភិវឌ្ឍ និងជាពិសេសសុខសន្តិភាព អស់រយៈពេលជាង១២ឆ្នាំ។
រម្លឹកពីភាពជូរចត់នៃប្រវត្តិសាស្ត្ររួចហើយ មេដឹកនាំកម្ពុជា ក៏បាននិយាយតិចតួចពីរឿងប្រព័ន្ធអនុគ្រោះពន្ធ EBA។ មេដឹកនាំកម្ពុជា ចាត់ទុក ការដក EBA មួយផ្នែកឬស្នើនឹង២០ភាគរយ ដោយសហភាពអឺរ៉ុប ក្នុងកាលៈទេសៈដែលកម្ពុជា កំពុងប្រឹងប្រែងតស៊ូជម្នះជំងឺរាតត្បាតកូវីដ-១៩ ថាជា «រឿងច្រំដែលនៃប្រវត្តិសាស្ត្រ»។
យ៉ាងណា មេដឹកនាំកម្ពុជា អះអាងថា កម្ពុជា នៅតែប្តេជ្ញាចិត្តយ៉ាងពេញទំហឹង ដូចដែលធ្លាប់បានធ្វើ៤០ឆ្នាំមកហើយ ក្នុងការការពារអធិបតេយ្យភាពនិងការថែរក្សាសន្តិភាព ដែលកសាងបានយ៉ាងលំបាកលំបិន និងទទួលបានការសាទរពីប្រជាជនកម្ពុជាទាំងមូល។
មេដឹកនាំកម្ពុជា ប្រាប់ទៅបណ្តាមេដឹកនាំនៃប្រទេសនានាថា ប្រជាជនកម្ពុជា ដែលបានឆ្លងកាត់សោកនាដកម្មដ៏ខ្លោចផ្សាបំផុត កំពុងងើបឈរឡើងជាប្រជាជាតិមួយស្មើមុខមាត់ ស្មើភាព និង ស្មើសិទ្ធិ ជាមួយបណ្តាប្រជាជាតិដទៃលើសាកលលោក៕