ជាតិ
សង្គមជាតិ
«គ្រូបង្រៀនឆ្លាតវៃ ដើម្បីការអប់រំឌីជីថល»ជាប្រធានបទទិវាគ្រូបង្រៀន នៅឆ្នាំនេះ ទិដ្ឋភាពគ្រូកំពុងបង្រៀនសិស្សថ្នាក់ទី១២នៅវិទ្យាល័យបាក់ឌុប នៅថ្ងៃបើកសាលារៀនវិញ ក្រោយពីផ្អាកការសិក្សា អស់រយៈពេល៦ខែដោយសារការរាតត្បាតជំងឺកូវីដ-១៩
× ភ្នំពេញ៖ ទិវាគ្រូបង្រៀននៅថ្ងៃទី៥ ខែតុលាខាងមុខនេះ នឹងប្រព្រឹត្តទៅក្រោមប្រធានបទស្តីពី«គ្រូបង្រៀនឆ្លាតវៃ ដើម្បីការអប់រំឌីជីថល» នៅឯវិទ្យាស្ថានជាតិអប់រំ។ កម្មវីធីនេះនឹងប្រព្រឹត្តទៅដោយមានការចូលរួមពីលោករដ្ឋមន្ត្រីក្រសួងអប់រំ គ្រូ និងសាស្ត្រាចារ្យ ដោយគោរពទៅតាមវិធានការធានាសុវត្ថិភាព។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានបញ្ជាក់ប្រាប់អ្នកសារព័ត៌មានថ្មីៗថា ទិវាគ្រូបង្រៀននៅឆ្នាំនេះ នឹងប្រព្រឹត្តទៅតាមវិធានការរបស់ក្រសួងសុខាភិបាល ដោយរក្សាគម្លាតសុវត្ថិភាពពីគ្នា ហើយមិនមានការចូលរួមច្រើនពីសំណាក់គ្រូបង្រៀន ដូចនឹងឆ្នាំមុនៗឡើយ។ បើតាមលោក រស់ សុវាចា កម្មវិធីនេះនឹងមានការផ្សាយផ្ទាល់ជូនសាធារណជន តាមទំព័រហ្វេសប៊ុករបស់ក្រសួងអប់រំផងដែរ។
លោក រស់ សុវាចា បានរៀបរាប់ដូច្នេះថា៖«សមាសភាពចូលរួមផ្ទាល់មានថ្នាក់ដឹកនាំក្រសួងអប់រំ យុវជន និងកីឡា ប្រធានអង្គភាពថ្នាក់កណ្តាល តំណាងសមាគមបុគ្គលិក សិក្សា ខ្មែរ តំណាងដៃគូអភិវឌ្ឍន៍ តំណាងគ្រឹះស្ថានឧត្តមសិក្សារដ្ឋ-ឯកជន លោកគ្រូ អ្នកគ្រូ និងសាស្ត្រាចារ្យ»។
តាមរយៈកម្មវិធីនេះសិស្សានុសិស្ស និងនិស្សិតអាចនិពន្ធអត្ថបទចម្រៀងកំណាព្យ ឬរឿងនិទាន ឬសរសេរសារជូនពរ សម្រាប់រលឹកគុណដល់គ្រូបង្រៀនដែលបានបង្រៀន ដោយបង្ហោះនៅតាមប្រព័ន្ធផ្សព្វផ្សាយ រួចផ្ញើមកក្រសួងដោយបញ្ជាក់ឈ្មោះគ្រឹះស្ថានសិក្សារបស់ខ្លួនដែលធ្លាប់រៀន ឬកំពុងរៀន និងកំពុងបម្រើការងារជាដើម។ ក្រុមការងារក្រសួង នឹងពិនិត្យជ្រើសរើស ចែករំលែក បន្តលើទំព័រផ្លូវការរបស់ក្រសួង។
នាឱកាសទិវាគ្រូបង្រៀនខាងមុខនេះ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ក៏បានចងក្រង និងបោះពុម្ពសៀវភៅកំណាព្យ«អារ្យធម៌ខ្មែរ» សម្រាប់ចែកជូនដល់គ្រូបង្រៀនមួយចំនួន ដើម្បីអបអរទិវាគ្រូបង្រៀននៅថ្ងៃទី៥ ខែតុលាផងដែរ។
សៀវភៅកំណាព្យ«អារ្យធម៌ខ្មែរ»សម្រាប់អបអរទិវាគ្រូបង្រៀននៅឆ្នាំនេះជាស្នាដៃនិពន្ធលើកទី២របស់លោករដ្ឋមន្ត្រីក្រសួងអប់រំ ។ ឆ្នាំមុន លោកបានតែងនិពន្ធសៀវភៅកំណាព្យដែលមានចំណងជើងថា«កំណាព្យអប់រំ» សម្រាប់ទិវាគ្រូបង្រៀន ៥ តុលា ២០១៩។
បើតាមក្រសួងអប់រំ ការប្រារព្ធទិវាគ្រូបង្រៀននេះ ក្នុងគោលបំណងឲ្យសិស្ស និងនិស្សិតរំលឹកគុណូបការៈដ៏ថ្លៃថ្លារបស់គ្រូបង្រៀន ដែលធ្លាប់បានបង្រៀន និងបណ្តុះបណ្តាលធនធានមនុស្ស សម្រាប់ការពារ កសាង និងអភិវឌ្ឍមាតុភូមិលើគ្រប់វិស័យ។
សូមរំលឹកថា ទិវាគ្រូបង្រៀននៅកម្ពុជា ត្រូវបានប្រារព្ធឡើងតាំងពីឆ្នាំ១៩៩៧ ដោយឆ្នាំនេះជាខួបលើកទី២៣ឆ្នាំហើយ៕
Tag:
អប់រំ
កំណាព្យ
អារ្យធម៌ខ្មែរ
សៀវភៅ
គ្រូបង្រៀន
© រក្សាសិទ្ធិដោយ thmeythmey.com