ជាតិ
លោក ហ៊ុន ម៉ានី ស្ញប់ស្ញែងការខំប្រឹង និងលះបង់របស់គ្រូបង្រៀន ក្នុងដំណាក់កាល COVID-19
× ភ្នំពេញ៖ ក្រោយចុះបេសកកម្មរបស់គណៈកម្មការទី៧ នៅតាមបណ្ដាខេត្តមួយចំនួន លោក ហ៊ុន ម៉ានី បានបង្ហាញការចាប់អារម្មណ៍ និងស្ញប់ស្ញែងចំពោះការខិតខំប្រឹងប្រែង និងការលះបង់របស់គ្រូបង្រៀន ដែលបានចំណាយពេលវេលា ថវិកា និងកម្លាំងកាយចិត្ត ដើម្បីបង្រៀនសិស្សានុសិស្ស ក្នុងដំណាក់កាល កូវីដ១៩។ បើតាមលោក ហ៊ុន ម៉ានី ក្នុងបរិបទកូវីដ១៩ វិស័យអប់រំបានរងការប៉ះពាល់ ដែលទាមទារឱ្យលោកគ្រូ អ្នកគ្រូ បង្កើតវិធីសាស្ត្របង្រៀនបែបថ្មី ស្របតាមគោលការណ៍ណែនាំរបស់ក្រសួងអប់រំ យុវជន និងកីឡា ជាបន្តបន្ទាប់ បន្ថែមពីអ្វីដែលធ្លាប់អនុវត្តកន្លងមក។
កាលពីថ្ងៃទី ២២-២៥ កញ្ញា លោក ហ៊ុន ម៉ានី ប្រធានគណៈកម្មការទី៧ នៃរដ្ឋសភា បានចុះបេសកកម្មទៅកាន់ខេត្តចំនួន២ រួមមាន ខេត្តប៉ៃលិន និងបាត់ដំបង ដើម្បីស្វែងយល់បន្ថែមពីផលលំបាកបង្កដោយកូវីដ១៩ លើគ្រឹះស្ថានសិក្សានៅតាមមូលដ្ឋានផ្ទាល់ និងពិនិត្យស្ថានភាពជាក់ស្តែងរបស់គ្រឹះស្ថានអប់រំ ក្នុងការអនុវត្តដំណើរការបើកឡើងវិញក្នុងដំណាក់កាលទី២ និងស្តាប់នូវបញ្ហាប្រឈម រួមទាំងសំណូមពរ របស់ថ្នាក់ដឹកនាំសាលា លោកគ្រូ អ្នកគ្រូ។
តាមទំព័រហ្វេសប៊ុក លោក ហ៊ុន ម៉ានី លើកឡើងថា៖ «ដើម្បីធានាថាសិស្សានុសិស្សអាចទទួលបានការអប់រំប្រកបដោយសមធម៌ លោកគ្រូ អ្នកគ្រូខ្លះបានធ្វើដំណើរចុះផ្ទាល់ទៅកាន់សហគមន៍ ទោះជួបការលំបាកដូចជាស្ថានភាពផ្លូវរអិលពេលភ្លៀង និងផ្ទះដែលមានឆ្កែកាច ដើម្បីយកក្រដាសមេរៀន កិច្ចការលំហាត់ ចែកដល់សិស្សានុសិស្ស ហើយខ្លះទៀតបានចុះទៅផ្ទះរបស់សិស្សផ្ទាល់ ដើម្បីផ្សព្វផ្សាយណែនាំពីគោលការណ៍របស់ក្រសួងអប់រំ យុវជន និងកីឡា និងស្នើសុំការសហការពីអាណាព្យាបាលក្នុងការជំរុញកូនៗឱ្យខិតខំរៀនសូត្រពីចម្ងាយ។ ទឹកចិត្ត និងកាយវិការនេះ ពិតជាបានឆ្លុះបញ្ចាំងពីសមាណចិត្ត និងមនសិការបស់គ្រូបង្រៀន បើទោះបីជាស្ថានភាពណាក៏ដោយ ក៏ពួកគាត់មិនបោះបង់សិស្សានុសិស្សឡើយ»។
តាមរយៈការខំប្រឹងប្រែង និងការលះបង់របស់លោកគ្រូ អ្នកគ្រូ ប្រធានគណៈកម្មការទី៧ រូបនេះ បានអរគុណដល់គ្រូបង្រៀនយ៉ាងដូច្នេះ៖ «ខ្ញុំផ្ទាល់ សូមថ្លែងកោតសរសើរ និងថ្លែងអំណរគុណដល់លោកគ្រូ អ្នកគ្រូទាំងអស់ចំពោះការខិតខំប្រឹងប្រែងនាពេលកន្លងមក ហើយខ្ញុំសង្ឃឹមថាលោកគ្រូ និងអ្នកគ្រូ និងបន្តអនុវត្តស្របតាមក្រសួងអប់រំ យុវជន និងកីឡា ដើម្បីធានានិរន្តភាពនៃការអប់រំ ដែលចូលរួមចំណែកក្នុងការអភិវឌ្ឍធនធានមនុស្សសម្រាប់ជាកម្លាំងបន្តវេននៅថ្ងៃអនាគត»៕
Tag:
អប់រំ
ហ៊ុន ម៉ានី
គ្រូបង្រៀន
© រក្សាសិទ្ធិដោយ thmeythmey.com