អន្តរជាតិ
រដ្ឋាភិបាលជប៉ុន ប្រាប់ប្រជាជនឲ្យរកការប្រឹក្សាពេលមានបញ្ហា ក្រោយមានករណីអត្តឃាតបន្តបន្ទាប់
ប្រធានលេខាធិការគណៈរដ្ឋមន្ត្រីជប៉ុន លោក Katsunobu Kato ។ រូបភាព AFP
×![]()
រដ្ឋាភិបាលជប៉ុន បានទទូចឲ្យពលរដ្ឋស្វះស្វែងរកជំនួយ ប្រសិនបើពួកគេពិបាកដោះស្រាយបញ្ហាដែលជួបប្រទះក្នុងជីវិត។ ការអំពាវនាវនេះ ធ្វើឡើតក្រោយការស្លាប់របស់តារាភាពយន្ត
ដោយពុំបាននិយាយចំៗដល់ករណីណាមួយឡើយ ប្រធានលេខាធិការគណៈរដ្ឋមន្ត្រីជប៉ុន លោក Katsunobu Kato នៅថ្ងៃទី២៨ ខែកញ្ញា បានកត់សម្គាល់ថា ពលរដ្ឋខ្លះកំពុងជួបការលំបាកក្នុងការដោះស្រាយបញ្ហាក្នុងជីវិតពួកគេអំឡុងវិបត្តិ COVID-19 ។ ត្រង់នេះ លោកលើកឡើងពីកំណើននៃករណីធ្វើអត្តឃាតចាប់តាំងពីខែកក្កដាមក។
«យើងត្រូវតែទទួលស្គាល់ការពិតថា មនុស្សជាច្រើនបានបញ្ចប់ជីវិតដ៏មានតម្លៃពួកគេ» ។ លោក Kato ដែលជាអតីតរដ្ឋមន្ត្រីសុខាភិបាលជប៉ុនក្រោមអាណត្តិលោកនាយករដ្ឋមន្ត្រី ស៊ិនហ្សូ អាបេ អះអាងបែបនេះ ដោយទទូចឲ្យសាធារណជនស្វះស្វែងជំនួយ តាមរយៈសេវាកម្មនានារបស់រដ្ឋាភិបាល។ នេះបើតាមទីភ្នាក់ងារព័ត៌មាន AFP ។
ករណីស្លាប់របស់ តារាសម្តែង Yuko Takeuchi ដែលស្គាល់ថា «Miss Sherlock» បានធ្វើឲ្យប្រជាជាតិជប៉ុនទាំងមូលភ្ញាក់ផ្អើលនិងរន្ធត់ចិត្តជាខ្លាំង។ នៅមុនករណីស្លាប់របស់តារាភាពយន្តរូបនេះ ក៏មានតារាជប៉ុនល្បីៗមួយចំនួនបានធ្វើអត្តឃាតជាបន្តបន្ទាប់ក្នុងឆ្នាំ២០២០នេះផងដែរ។
កាលពីដើមខែកញ្ញា តារាសម្តែងស្រីដ៏ល្បីឈ្មោះ Sei Ashina បានត្រូវបានប្រទះឃើញដេកស្លាប់ក្នុងបន្ទប់ ក្នុងទម្រង់ជាការធ្វើអត្តឃាត ខណៈតារាសម្តែងប្រុស Haruma Miura ដែលសម្តែងក្នុងរឿង Attack on Titan ក៏ត្រូវបានរាយការណ៍ថាសម្លាប់ខ្លួនផងដែរក្នុងខែកក្កដាកន្លងទៅ។
ចំណែក តារាស្រី Hana Kimura អាយុ ២២ ឆ្នាំ សម្តែងក្នុងកម្មវិធីទូរទស្សន៍របស់ Netflix «Terrace House» ក៏ត្រូវបានប្រទះឃើញស្លាប់ក្នុងខែឧសភា ក្រោយរងការព្យុះរិះគន់តាមអនឡាញ ។ ក្នុងខែសីហា ប្រទេសជប៉ុន មានករណីអត្តឃាតជិត ១៩០០ករណី ដែលកើន ១៥,៣ បើធៀបនឹងឆ្នាំមុន៕
Tag:
ជប៉ុន
អត្តឃាត
Yuko Takeuchi
© រក្សាសិទ្ធិដោយ thmeythmey.com
